بايقوڭىر. 28 ءساۋىر. «قىزىلوردا وبلىسىنىڭ جاڭا ينۆەستيتسيالىق ستراتەگياسى» تاقىرىبىندا V «بايقوڭىر» ينۆەستيتسيالىق فورۋمى ءوتىپ جاتىر. بۇل تۋرالى egemen.kz ءتىلشىسى حابارلادى.
فورۋم قاتىسۋشىلارى ەڭ الدىمەن بايقوڭىر قالاسىنداعى مۇراجايدى ارالاپ كورىپ, «سويۋز» زىمىران تاسىعىشىنىڭ ۇشىرىلۋ ءساتىن تاماشالادى. ال فورۋمعا 400-دەن اسا وتاندىق جانە الىس-جاقىن 12 شەت مەملەكەتتەن تۋريستىك سالا وكىلدەرى, ۇلتتىق كومپانيا, عىلىمي-زەرتتەۋ, دامىتۋ ينستيتۋتتارى مەن بانك سەكتورلارى جانە مەملەكەتتىك ورگان وكىلدەرى ايماقتىڭ ينۆەستيتسيالىق مۇمكىندىگىن باعامداۋ ءۇشىن باس قوستى.
فورۋمنىڭ العاشقى كۇنىندە بايقوڭىر قالاسىندا «قىزىلوردا وبلىسى تۋريزم سالاسىنىڭ ينۆەستيتسيالىق تارتىمدىلىعى» تاقىرىبىندا پلەنارلىق ءماجىلىس ءوتتى. اۋقىمدى جيىنعا قىزىلوردا وبلىسىنىڭ اكىمى قىرىمبەك كوشەرباەۆ, يندۋستريا جانە دامۋ مينيسترلىگى تۋريزم يندۋسترياسى دەپارتامەنتىنىڭ ديرەكتورى تيمۋر دۇيسەنعاليەۆ, «بايتەرەك» ۇبح» باسقارما توراعاسى قۋاندىق بيشىمباەۆ پەن ەلىمىزدىڭ جانە شەتەل ينۆەستورلارى, كاسىپكەرلەرى, قارجىلىق سەكتور وكىلدەرى قاتىستى. جيىندا التى ماسەلە قارالدى. وندا تۋريزم سالاسىنىڭ ايماق دامۋىنداعى «ەكسپو-2017» كورمەسىنىڭ ءرولى مەن حالىقارالىق جانە ەۋروپا نارىعىندا قىزىلوردا وبلىسى ءتۋريزمىن دامىتۋ سياقتى ماسەلەلەر تالقىعا ءتۇستى.
باسقوسۋدا ءسوز العان وبلىس اكىمى قىرىمبەك كوشەرباەۆ ءتۋريزمدى دامىتۋ كەز-كەلگەن ايماقتىڭ ەكونوميكالىق احۋالىن جاقسارتاتىنى ءسوزسىز دەي كەلە, بارلىق فورۋم قوناقتارىن وڭىردەگى ءتۋريزمدى دامىتۋعا شاقىردى. «جەرگىلىكتى بيلىك ينۆەستورلاردىڭ قىزىلوردا وبلىسىندا جۇمىس ىستەۋىنە بارلىق جاعداي جاساۋعا دايىن», – دەدى ايماق باسشىسى.
شىعىس ەۋروپالىق «FVW Median GmbN» فوندىنىڭ ماركەتينگ بويىنشا ديرەكتورى ميروسلاۆ رونچاك قىزىلوردا وبلىسىنا تۋريستەردى تارتۋ ءۇشىن ەڭ الدىمەن قىزمەت كورسەتۋ سالاسىنىڭ حالىقارالىق ستاندارتتارعا ساي بولۋى كەرەكتىگىن ايتتى. سونىمەن قاتار, شەتەلدىكتەردى قازاق حالقىنىڭ سالت-داستۇرىمەن تاڭداي قاقتىرتۋعا بولادى دەگەن ول, «گەرمانيالىق تۋريستەردى بايقوڭىر عارىش ايلاعى مەن ارال تەڭىزى قىزىقتىرادى. ءتىپتى ولار, قازاقستان دەگەن ءسوزدى ەستىسە, ەڭ اۋەلى بايقوڭىردى اۋزىنا الادى», – دەپ اتاپ ءوتتى.
قازاقستان تۋريستىك اسسوتسياتسياسىنىڭ ديرەكتورى راشيدا شايكەنوۆا تۋريستەردى ارنايى ۇيىمداستىرىلعان شارالار ارقىلى دا قىزىقتىرۋعا بولاتىنىن ايتادى. راشيدا شايكەنوۆا قىزىلوردا وبلىسىندا قورقىت اتا كەشەنىندە ونەر فەستيۆالىن, شيەلى اۋدانىندا «بەيبىت اتوم كۇنىن», «تۇيەلەر كەرۋەنى» مەن «قىمىز» فەستيۆالىن ۇيىمداستىرۋدى ۇسىندى.
مۇنان سوڭ فورۋمعا قاتىسۋشىلار «قورقىت اتا» مەموريالدى كەشەنىن ارالاپ كوردى.
ايتا كەتەيىك, وسىعان دەيىن وتكىزىلگەن 4 ينۆەستيتسيالىق فورۋمنىڭ ناتيجەسىندە 49 مەموراندۋمعا قول قويىلعان بولاتىن. قىزىلوردا وبلىسى ەۋروپالىق قايتا قۇرۋ جانە دامۋ بانكىمەن (ەقدب) جالپى قۇنى 63 ملرد. تەڭگەنى قۇرايتىن 8 جوبانى جۇزەگە اسىرۋدا.
فورۋمنىڭ باستى ماقساتى شەتەلدىك جانە وتاندىق ينۆەستورلارمەن جانە يندۋستريالدى, تۋريستىك, اگرارلىق سالاداعى كومپانيالارمەن ءوزارا ءتيىمدى ىنتىماقتاستىق ورناتۋ, ينۆەستيتسيالىق كليماتتى ودان ءارى جاقسارتىپ, قارجىلىق ينفراقۇرىلىمدى دامىتۋ. فورۋم جۇمىسى ەرتەڭ دە جالعاسادى. ايماق ءۇشىن ماڭىزدى ونداعان مەموراندۋمعا قول قويىلادى دەپ كۇتىلۋدە.
ەرجان بايتىلەس.
دەرەك, سۋرەت: egemen.kz.
