فوتو: shutterstock.com
تەمىرتاۋ قالاسى ءۋاليحانوۆ كوشەسىندە ورنالاسقان پاتەرلەردىڭ بىرىنەن پوليتسەيلەر مەن تجم قىزمەتكەرلەرى ءۇش ادامنىڭ ءمايىتىن تاپقان. ءۇي تۇرعىندارى يتتەردىڭ ۇنەمى ءۇرىپ, قىڭسىلايتىنىنا, سونداي-اق پاتەردەن ساسىق ءيىس شىعاتىنىنا شاعىمدانعان.
انىقتالعانداي, پاتەردەن ءبىر ايەل ادام مەن ەكى ەر جىگىتتىڭ ءمايىتى تابىلعان.
ء«بىز ايەلدىڭ قاتەرلى ىسىككە شالدىققانىن بىلەمىز. يتتەردىڭ مارقۇم ادامداردىڭ بەتىن تىستەپ العانى انىق, بىراق كوپ ەمەس», دەدى مارقۇم ايەلدىڭ كورشىسى.
قاراعاندى وبلىسىنىڭ پوليتسيا دەپارتامەنتى ءۇش ادامنىڭ ولىمىنە قاتىستى قىلمىستىق ءىس قوزعالعانىن حابارلادى.
«مايىتتەردەن زورلىق-زومبىلىقتىڭ بەلگىلەرى تابىلعان جوق. ولاردىڭ ولىمىنە قاتىستى قىلمىستىق ءىس قوزعالدى. وقيعانىڭ ءمان-جايىن انىقتاۋ ءۇشىن تەرگەۋ امالدارى ءجۇرىپ جاتىر», دەپ حابارلادى وبلىستىق پد.
