سۋرەت: inbusiness.kz
مەنىڭشە داۋىس بەرۋ ۋچاسكەلەرى جاقسى ۇيىمداستىرىلعان. ءبىزدىڭ ۋچاسكەمىزدە باق-تان جانە ۇكىمەتتىك ەمەس ۇيىمداردان بايقاۋشىلار وتىردى. ادامدار جاقسى كوڭىل كۇيمەن كەلىپ, داۋىس بەرىپ جاتتى. ولار بۇل ءىس-شارانىڭ ماڭىزىن تۇسىنگەنىنە ءشۇبا جوق. ويتكەنى اەس سالۋ تاقىرىبى ءبىر جىلدىڭ ىشىندە كوپ تالقىلاندى. اسىرەسە, كەيىنگى 2-3 ايدا الەۋمەتتىك جەلىدە دە, بۇقارالىق اقپارات قۇرالدارىندا دا كوپ جازىلدى, ايتىلدى. سوندىقتان حالىقتىڭ ءبارى بۇدان حاباردار ەكەنىنە سەنىمدىمىن. ولار دا وسى تاريحي شەشىمگە ءوز ۇلەسىن قوسۋعا تالپىنىپ, داۋىس بەرۋ ۋچاسكەسىنە كەلىپ, تاڭداۋ جاساپ جاتتى.
ءبىز الدىندا رەفەرەندۋمعا سايلاۋشىلاردىڭ قاتىسۋ مولشەرى 60 پايىزعا دەيىن بارادى دەپ ويلاعانبىز. الايدا رەسمي اقپاراتقا سۇيەنسەك, 60 پايىزدان اسىپ كەتتى. بالكىم, مۇنىڭ ءبارى كەيىنگى كەزدەرى جاپپاي جۇرگىزىلگەن ءتۇسىندىرۋ جۇمىستارىنىڭ ناتيجەسى شىعار.
مەن ءوزىم دە ەلىمىزدىڭ بىرقاتار وڭىرىندە بولىپ, حالىقپەن جۇزدەستىم. ول باسقوسۋلاردا اەس قۇرىلىسىنا قاتىستى ءتۇرلى وزەكتى سۇراقتار قويىلدى. اسىرەسە حالىقتى اەس-ءتىڭ قاۋىپسىزدىگى, قورشاعان ورتانى قورعاۋ, قۇرىلىس بارىسىندا بولۋى ىقتيمال جەمقورلىق, وعان كادر دايارلاۋ جانە تاجىريبەنىڭ جوقتىعى سەكىلدى ماسەلەلەر الاڭداتاتىنىن بىلدىك. «اقجول» پارتياسى وسى ماسەلەلەرگە بايلانىستى ەنەرگەتيكا ءمينيسترى الماسادام ساتقاليەۆتى, «قازاقاتومونەركاسىپ» باسشىلارىن شاقىرىپ, ۇلتتىق كەڭەستىڭ ارنايى ءۇش ساعاتتىق پلەنۋمىن وتكىزدىك. حالىق تاراپىنان ايتىلعان وتكىر سۇراقتاردى ءبىز ماماندارعا دا قويدىق. سوندا ءبىر تاڭعالعانىم, باستاپقىدا اەس قۇرىلىسىنا قارسى بولىپ وتىرعان كەيبىر ارىپتەستەرىم دە جيىننىڭ سوڭىندا اەس سالۋدى ءبىراۋىزدان قولداپ داۋىس بەردى. ويتكەنى ءبىز ونىڭ كەرەك ەكەنىنە كوزىمىزدى جەتكىزدىك. سوندىقتان ءبىز رەفەرەندۋمدى قولدايتىن حالىق شتابى قۇرامىنا دا كىرىپ, تۇسىندىرمە جۇمىستارىن جۇرگىزۋگە تىكەلەي ارالاستىق.
قازىر ەلەكتر ەنەرگياسىنىڭ تاپشىلىعى ەلگە ينۆەستيتسيا تارتۋعا, ينۆەستيتسيالىق جوبالاردى ىسكە اسىرۋعا, جاڭا تەحنولوگيالاردى ەنگىزۋگە كەدەرگى بولىپ وتىر. حالىقپەن جۇزدەسۋلەردە دە باستاپقىدا ولاردىڭ تاراپىنان قارسىلىقتى, جايسىزدىقتى كورسەك, بارلىعىن ورنى-ورنىمەن تۇسىندىرە كەلە اەس كەرەك ەكەنىنە كوزى جەتكەنىن بايقادىق. جالپى ايتقاندا, ءبىز وتكىزگەن كەزدەسۋلەردە ادامداردىڭ شامامەن 85 پايىزى ەلىمىزدە اتوم ەلەكتر ستانساسىن سالۋدى قولدايتىنىن ءبىلدىردى. ءيا, اراسىندا اەس قۇرىلىسىنا مۇلدەم قارسى شىققان ادامدار دا تابىلدى. بۇل دا ولاردىڭ قۇقىعى. ءار ازامات ءوز كوزقاراسىن بىلدىرۋگە تولىق حاقى بار. رەفەرەندۋم دا سول ءۇشىن ۇيىمداستىرىلىپ, جۇزەگە استى.
ازات پەرۋاشەۆ,
ءماجىلىس دەپۋتاتى
