سۋرەت: senate.parlam.kz
سەنات توراعاسى ەلىمىزدە وتكەن اەس سالۋ ماسەلەسىنە قاتىستى رەسپۋبليكالىق رەفەرەندۋمنىڭ قورىتىندىسىنا توقتالىپ ءوتتى. م.اشىمباەۆ رەفەرەندۋمعا وتانداستارىمىزدىڭ بەلسەندى قاتىسقانىن العا تارتىپ, بۇل ازاماتتاردىڭ مەملەكەت باسشىسىنىڭ ادىلەتتى قازاقستان قالىپتاستىرۋ جولىنداعى بارلىق باستاماسىن قولدايتىنىن تاعى دا ءبىر كورسەتىپ بەرگەنىن ايتتى. سونداي-اق ول ەل پرەزيدەنتىنىڭ رەفەرەندۋم وتكىزۋ تۋرالى شەشىمى مەملەكەتتىڭ بولاشاعى ءۇشىن اسا ماڭىزدى قادام ەكەنىنە نازار اۋداردى.
سونىمەن قاتار بيۋرو وتىرىسىندا 8-9 قازان كۇندەرى استانادا وتەتىن الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ XXII وتىرىسى مەن ءى جاس ءدىني ليدەرلەردىڭ فورۋمىنا دايىندىق بارىسى پىسىقتالدى. اتالعان ءىس-شارالارعا 19 ەلدەن كەلگەن 30 دەلەگاتسيا وكىلدەرى قاتىسادى.
بيۋرو مۇشەلەرى وسى اپتادا وتەتىن پالاتا وتىرىسىنىڭ دا كۇن ءتارتىبىن تالقىلادى. وتكەن اپتادا مەملەكەت باسشىسىنىڭ جارلىعىمەن مارات قوجاەۆ سەنات دەپۋتاتى بولىپ تاعايىندالعان ەدى. وسىعان بايلانىستى جالپى وتىرىستا انت بەرۋ, تۇراقتى كوميتەتكە مۇشە ەتىپ سايلاۋ سياقتى ۇيىمداستىرۋ ماسەلەلەرى قارالادى.
بۇعان قوسا سەنات وتىرىسىنىڭ كۇن تارتىبىنە «قازاقستان رەسپۋبليكاسىنىڭ ۇكىمەتى مەن قاتار مەملەكەتىنىڭ ۇكىمەتى اراسىنداعى باسىم سالالارداعى جوبالاردى دامىتۋ ءۇشىن ۇزاقمەرزىمدى ستراتەگيالىق ارىپتەستىك ورناتۋ تۋرالى كەلىسىمدى راتيفيكاتسيالاۋ تۋرالى» زاڭ شىعارىلدى.
اتالعان زاڭ نورمالارى ەكى ەلدىڭ تەلەكوممۋنيكاتسيا, ەنەرگەتيكا, مۇناي-حيميا جانە باسقا دا سالالارداعى بىرلەسكەن جوبالارىن ىسكە اسىرۋعا, سونداي-اق ساۋدا-ەكونوميكالىق ىنتىماقتاستىقتى نىعايتۋعا ارنالعان.
سونىمەن قاتار بيۋرو وتىرىسىندا ماجىلىستەن كەلىپ تۇسكەن زاڭدار جۇمىس ءۇشىن تۇراقتى كوميتەتتەرگە ءبولىنىپ بەرىلدى.
