اتىراۋداعى اۋىرعان جۇمىسشىلاردىڭ دياگنوزى انىقتالدى

اتىراۋ. 28 قاڭتار. اتىراۋداعى «تەڭىز» كەنىشىندە اۋىرعان جۇمىسشىلاردىڭ دياگنوزى بەلگىلى بولدى. بۇل تۋرالى egemen.kz ءتىلشىسى حابارلادى. بۇعان دەيىن حابارلاعانىمىزداي, 26 قاڭتاردا جىلىوي اۋداندىق تۇتىنۋشىلار قۇقىعىن قورعاۋ باسقارماسىنا «تەڭىزشەۆرويل» كومپانياسىنىڭ «تەڭىز» ۆاحتالىق قالاشىعىنداعى كلينيكاسىنان «يمستالكوم» سەرىكتەستىگىنىڭ 2 قىزمەتكەرى اراسىندا «مەنينگوكوككتى جۇقپا, مەنينگوكوكتسەميا» دياگنوزىنا كۇدىكتى جاعدايلار تۋرالى جەدەل حابارلامالار كەلىپ تۇسكەن. ناۋقاستىڭ ءبىرى كوز جۇمدى. وسىعان بايلانىستى قۇرامىندا وبلىستىق ينفەكتسيونيست-دارىگەر, ەپيدەميولوگ-دارىگەر, ۆيرۋسولوگيا جانە باكتەريولوگيا زەرتحاناسىنىڭ مەڭگەرۋشىلەرى بار بريگادا قۇرىلىپ, «تەڭىز» ۆاحتالىق قالاشىعىنا ىسساپارعا جىبەرىلگەن ەدى. «ەپيدەميولوگيالىق تەكسەرۋ كەزىندە قايتىس بولعان ادامدا اۋرۋدىڭ كلينيكالىق بەلگىلەرى (باستىڭ اۋرۋى, تاماعىنىڭ اۋىرسىنۋى, دەنە قىزۋىنىڭ 37,7 گرادۋسقا دەيىن جوعارىلاۋى) 21 قاڭتاردا باستالعانى انىقتالدى. ناۋقاس مەديتسينالىق كومەككە جۇگىنبەگەن, ءوز بەتىنشە ەمدەلىپ, پاراتسەتومول, تاعى باسقا دارىلەر قابىلداعان. دارىگەرلىك كومەككە جۇگىنگەن كەزدە ناۋقاستا جۇرەك جۇمىسىنىڭ السىرەۋى, وكپەنىڭ ءىسىنۋى بەلگىلەرى بولىپ, اۋىر حالدە بولعان. ەكىنشى ناۋقاستا اۋرۋ بەلگىلەرى 23 قاڭتاردا باستالعان. جاعدايى ورتاشا اۋىر, تۇراقتى, قازىرگى كەزدە وبلىستىق جۇقپالى اۋرۋلار اۋرۋحاناسىندا ەم قابىلداۋدا. اۋرۋلارمەن تىعىز قارىم-قاتىناستا بولعان 3 قىزمەتكەر «تەڭىزشەۆرويل» سەرىكتەستىگىنىڭ كلينيكاسىنا وقشاۋلانىپ, انتيبيوتيكتەرمەن پروفيلاكتيكالىق ەم الۋدا. دياگنوزدارى كلينيكالىق دالەلدەنگەن, لابوراتوريالىق زەرتتەۋ جۇقپالى اۋرۋلار اۋرۋحاناسى زەرتحاناسىندا جالعاسۋدا» دەپ حابارلادى اتىراۋ وبلىستىق تۇتىنۋشىلار قۇقىعىن قورعاۋ دەپارتامەنتى باسشىسىنىڭ ورىنباسارى ەربولات ۋايسوۆ. جولداسبەك شوپەعۇل. دەرەك: egemen.kz. سۋرەت: aikyn.kz.