وسى ورايدا 2024-2025 وقۋ جىلىندا مەكتەبىمىزدىڭ ءپان كابينەتتەرى جابدىقتالىپ, زاماناۋي قۇرىلعىلارمەن قامتىلدى. ەسەيحان اۋىلىنداعى «قاراتاۋ» ورتا مەكتەبىندە حيميا, بيولوگيا كابينەتتەرى زاماناۋي تالاپقا ساي جاڭارتىلدى. جوعارىدا اتالعان ءپان كابينەتتەرى ساباق بارىسىنا قاجەت بولاتىن قۇرىلعىلاردىڭ بارلىعىمەن قامتىلعان سوڭ, ءار ءپاننىڭ ەرەكشەلىگىنە قاراي جاڭا پارتالار مەن ورىندىقتار الىندى.
بۇل كابينەتتەردىڭ تاعى ءبىر ەرەكشەلىگى, سوڭعى ۇلگىدەگى سەنسورلى تەلەديدار ورناتىلعان. مۇعالىمدەر ساباق بارىسىندا عالامتور جەلىسىن ەركىن پايدالانعاندىقتان, قاجەتتى مالىمەتتەردى تەز تاۋىپ, ساباقتارىن جەڭىل جۇرگىزە الادى. ياعني ساباق بەرۋ ۇدەرىسى ەداۋىر وڭايلاپ وتىر. بۇعان قوسا وقۋشىلاردىڭ ساباققا دەگەن قىزىعۋشىلىعى ارتقانى بايقالادى. ءوز كەزەگىندە مۇنىڭ ءبىلىم الۋشىلاردىڭ پاندەردى تەرەڭ مەڭگەرۋىنە ۇلكەن ۇلەس قوساتىنى, ال تالاپتىلارىنىڭ مەكتەپتە بەرىلەتىن ءبىلىمدى عىلىممەن ۇشتاستىرۋعا مۇمكىندىك الاتىنى انىق.
تاعى ءبىر قۋانتارلىق جاعداي, مەكتەبىمىزدىڭ بۇرىنعى تۇلەگى عازيز بەكبەرديەۆ اعامىزدىڭ دەمەۋشىلىگىمەن ماتەماتيكا كابينەتى دە تولىقتاي زاماناۋي مەكتەپ جيھازدارىمەن جابدىقتالىپ, بيىلعى وقۋ جىلىندا قولدانىسقا بەرىلدى. مەكتەبىمىزدىڭ اتىمتاي جومارت تۇلەگىنە العىسىمىز شەكسىز. قوعام مۇددەسىن ءار كەز بيىك قوياتىن, تۋعان جەرىنىڭ ابىرويىن اسقاقتاتىپ جۇرگەن ازاماتتاردان ۇلگى الايىق.
شولپان تاجەنوۆا,
قاراتاۋ ورتا مەكتەبىنىڭ ديرەكتورى
جامبىل وبلىسى,
تالاس اۋدانى,
ەسەيحان اۋىلى
بالا جۇرەگىن باۋراعان
ۇلى اباي: «بالانى ەڭ اۋەلى مەيىر-شاپاعاتقا, ودان سوڭ اقىل-پاراساتقا, اقىرىندا ناعىز پايدالى عىلىمعا, ەڭبەككە باۋلى», دەپ وسيەت ەتكەن. كوز قۋانىشى – بالالارىن بالاباقشاعا بەرە وتىرىپ, ولاردىڭ كەلەشەك كەلبەتى مەن تاربيەسىنىڭ قالىپتى بولۋىن قالامايتىن اتا-انا جوق شىعار. سول ۋاقىتتا بالاڭنىڭ قاسىندا كۇنى بويى بولاتىن تاربيەشىنىڭ رۋحاني ادامگەرشىلىگى مەن ونەگەسى, بار بولمىسى تازالىققا تۇنىپ تۇرسا, ۇرپاعىڭنىڭ دا ومىردەن الار ورنى ەرەكشە بولاتىنىنا كۇمان جوق.
وسى ورايدا بالدىرعانداردى ك ۇلىمدەپ قارسى الىپ, بار ونەرىن ۇيرەتۋدەن جالىقپايتىن جان تۋرالى ايتقىم كەلەدى. ول №22 «الەم» بالاباقشاسىنىڭ تاربيەشىسى – جازيرا سەركەشوۆا. اتا-انامەن دۇرىس قارىم- قاتىناس ورناتا ءبىلۋ, ورتاق بالا تاربيەسى تاقىرىبىندا ەركىن اڭگىمە ايتۋ, بالانىڭ جاقسى جاعى مەن كەمشىلىگىن تۇزەتۋگە بىرلەسە جۇمىس ىستەۋ دە – ۇلكەن جاۋاپكەرشىلىك, ونىڭ كاسىبي قىزمەتىنىڭ باستى قاعيداتى دا وسىعان سايادى.
«ەڭ العاش وسى بالاباقشاعا قابىلداپ, ۇستازدىق جولدىڭ قىر-سىرىن ۇيرەتكەن سول كەزدەگى مەكەمە باسشىسى قارلىعاش جولداسوۆاعا العىسىمدى بىلدىرە وتىرىپ, بالانىڭ بالاباقشادان جاقسى ءتالىم-تاربيە العانىن قالايمىن, سول ءۇشىن دە ايانباي ەڭبەك ەتەمىن. ەركىندىككە جول بەرەمىن. بالانىڭ ءوزىن ەركىن سەزىنۋى ونىڭ ءبارىن بىلۋگە دەگەن تالپىنىسى مەن قۇلشىنىسىن ارتتىرادى», دەيدى جازيرا بولاتقىزى اعىنان جارىلىپ.
بالا – پاك, تاپ-تازا ءمولدىر بۇلاقتىڭ باستاۋى. وسى بۇلاقتىڭ كوزىن اشىپ, تۇنىعىنا قانۋ ءۇشىن جىلى جۇرەك, ايالى الاقان, ءار بالانى ەرتەڭگى ەل تۇلعاسى دەپ قۇرمەتتەۋ قاجەت دەسەك, ونىڭ ادامي ار-وجدانىن, نامىسىن, مىنەز-قۇلقىن قالىپتاستىرۋدا ۇلكەن ءرول اتقاراتىن جازيرا بولاتقىزىنداي تاربيەشىلەردىڭ كوپ بولعانى ابزال.
ءسوزىمدى قورىتىندىلاي كەلە, بالالاردىڭ بويىنا تاربيە مەن ءبىلىم ءنارىن سىڭىرۋگە بارىن سالىپ جۇرگەن روزا مادەنوۆا باسقاراتىن №22 «الەم» بالاباقشاسىنىڭ ۇجىمىن ۇستازدار مەرەكەسىمەن قۇتتىقتايمىز. وسكەلەڭ ۇرپاق تاربيەلەۋدەگى ورەلى جۇمىستارى مەن ولشەۋسىز ەڭبەكتەرى ءۇشىن العىس ايتامىز.
باۋىرجان ىسقاق,
اتا-انالار اتىنان
استانا
