اقتوبەدە كادر كوميسسياسىنىڭ وتىرىسى ءوتتى

اقتوبە. 28 قاڭتار. اقتوبە وبلىسىنىڭ اكىمى ارحيمەد مۇحامبەتوۆتىڭ توراعالىق ەتۋىمەن وتكەن كادر كوميسسياسىنىڭ وتىرىسىندا «ا» كورپۋسىنىڭ مەملەكەتتىك اكىمشىلىك قىزمەتىنىڭ كادر رەزەرۆىنە ۇمىتكەرلەرمەن اڭگىمەلەسۋ  بولىپ ءوتتى. بۇل تۋرالى egemen.kz ءتىلشىسى حابارلادى. پرەزيدەنت جانىنداعى كادر ساياساتى جونىندەگى ۇلتتىق كوميسسيا وتكەن جىلدىڭ جەلتوقسان ايىندا «ا» كورپۋسى كادر رەزەرۆىنە ىرىكتەۋ  جاريالاعان بولاتىن. سوعان سايكەس اقتوبە وبلىسىنان 20 ۇمىتكەر قۇجاتتارىن تاپسىرعان-دى. بيىلعى قاڭتار ايىنىڭ ورتا تۇسىندا استانادا وتكىزىلگەن تەستىلەۋدىڭ ناتيجەسىندە ون ۇمىتكەر سىناقتىڭ شەكتى مانىنەن جوعارى ناتيجە كورسەتتى. وبلىستىق كادر كوميسسياسىنىڭ وتىرىسىندا ون ۇمىتكەرگە ءۇش بلوك بويىنشا الدىن الا دايىندالعان سۇراقتار ۇسىنىلىپ, اڭگىمەلەسۋ وتكىزىلدى. كوميسسيا مۇشەلەرى ۇمىتكەر, ونىڭ قازىرگى قىزمەتىندەگى لاۋازىمدىق مىندەتتەرىنىڭ سيپاتى, نەگىزگى جەتىستىكتەرى جونىندە اقپارات الىپ قانا قويماي, قوعامدىق قىزمەتكە قاتىسۋىن, سونداي-اق مەملەكەتتىك قوعامدىق-ساياسي قۇرىلىمدى ءبىلۋ, دامۋ ستراتەگياسىن بايىپتاۋ دەڭگەيىن انىقتادى. سونىمەن بىرگە, ۇمىتكەرلەردىڭ «ا» كورپۋسىنىڭ كادر رەزەرۆىنە كىرۋ سەبەپتەرى مەن ۇعىنۋى, مەملەكەتتىك قىزمەتتىڭ قوعام, مەملەكەت ءۇشىن ماڭىزدىلىعىن ءتۇسىنۋى, مەملەكەتتىك قىزمەتكەرگە قويىلاتىن تالاپتار, تالاپتانۋشىنىڭ ەتيكا مەن قۇندىلىقتار باعدارى, ولاردىڭ ۇيىمداستىرۋشىلىق, كوشباسشىلىق قابىلەت-قارىمدارى, مىنەز-قۇلقى ساراپقا سالىندى. كوميسسيا وتىرىسىنا پرەزيدەنت اكىمشىلىگىنىڭ مەملەكەتتىك ينسپەكتورى شالقار بايبەكوۆ قاتىستى. كادر كوميسسياسىنىڭ جۇمىسىن قورىتىندىلاي كەلە ارحيمەد مۇحامبەتوۆ ۇمىتكەرلەرگە العا قويعان ماقساتتارىنا جەتۋگە تىلەك ءبىلدىردى. ساتىبالدى ءساۋىرباي. دەرەك: egemen.kz. سۋرەت: aktobe.gov.kz.