3D-باسىپ شىعارۋ ارقىلى ارحيتەكتۋرالىق نىساندار سالۋعا ماماندانعان «Icon» كومپانياسى تەحاس ءشول دالاسىندا El Cosmico دەپ اتالاتىن ەرەكشە كەمپينگ قوناقۇيىن سالۋعا كىرىستى. الەمدەگى العاشقى تولىقتاي 3D-مەن باسىپ شىعارىلعان قوناقۇي جوباسى مارفا قالاسىنىڭ ماڭىنداعى 24 گەكتاردان استام اۋماقتا ورنالاسادى. El Cosmico قوناقۇيىنىڭ تۇجىرىمداماسى «Bjarke Ingels Group» ساۋلەت فيرماسىمەن بىرلەسىپ ازىرلەنگەن. قوناقۇي قۇرىلىسى 2026 جىلى اياقتالادى.
كۆانتتىق كومپيۋتەردەگى جاڭا سەرپىلىس
Google مەن IBM كومپانيالارى 1000 كۋبيتتىق كۆانتتىق كومپيۋتەر جاساپ شىعاردى.
بۇل تەحنولوگيا كومپيۋتەردىڭ ەسەپتەۋ مۇمكىندىگىن بىرنەشە ەسەگە ارتتىرۋ ارقىلى عىلىم مەن تەحنولوگياداعى كۇردەلى ماسەلەلەردى شەشۋگە جول اشادى. كۆانتتىق كومپيۋتەرلەر اسا كۇردەلى ەسەپتەردى جىلدام شەشىپ, جاساندى ينتەللەكت, كريپتوگرافيا سياقتى سالالاردى دامىتۋعا مۇمكىندىك بەرەدى. مىسالى, كۆانتتىق كومپيۋتەردىڭ كومەگىمەن جاڭا ءدارى-دارمەك پەن ماتەريال جاساۋ ۇدەرىسى ايتارلىقتاي جەڭىلدەيدى. قۋاتتى كۆانتتىق ەسەپتەۋ جۇيەلەرى ارقىلى مەديتسينا مەن تەحنولوگيانىڭ دامۋى جاڭا دەڭگەيگە كوتەرىلەدى.
قايىرلى قارسىلىق
ول قاراپايىم ايەل بولا تۇرا, ءوزىنىڭ باتىلدىعى مەن قايسارلىعى ارقاسىندا ۇلتتىڭ تاريحىنا وزگەرىس ەنگىزدى.
1955 جىلى اۆتوبۋستاعى قارسىلىق اقش-تاعى ناسىلدىك تەڭدىككە باعىتتالعان كۇرەستىڭ باسى بولدى. روزا پاركس 1 جەلتوقسان كۇنى مونتگومەري قالاسىنداعى اۆتوبۋستىڭ بىرىنە وتىرادى. ول افروامەريكالىق جولاۋشىلارعا ارنالعان ورىندىققا جايعاسقان بولاتىن. اۆتوبۋس تولى بولعاندىقتان, اق ءناسىلدى جولاۋشى كەلگەندە, جۇرگىزۋشى روزادان ءوز ورنىن بوساتۋىن تالاپ ەتەدى. بىراق ول تالاپتى ورىنداۋدان باس تارتادى. روزانىڭ بۇل ارەكەتى مونتگومەري اۆتوبۋسىنداعى قارسىلاستىڭ باستالۋىنا تۇرتكى بولدى. بۇل قارسىلىقتىڭ ناتيجەسىندە, اقش جوعارعى سوتى سەگرەگاتسياعا قارسى شەشىم شىعارىپ, اۆتوبۋس جۇيەسىندەگى ناسىلدىك بولىنۋشىلىك زاڭسىز دەپ تانىلدى. سونداي-اق 1996 جىلى اقش پرەزيدەنتى بيلل كلينتون روزا پاركستى «ەركىندىك مەدالىمەن» ماراپاتتايدى. بۇل – اقش-تاعى ەڭ جوعارى ازاماتتىق ماراپاتتىڭ ءبىرى.
