«سولتۇستىك قازاقستان جاستارى ەلباسىمەن بىرگە!»

پەتروپاۆل. 28 ءساۋىر. سولتۇستىك قازاقستاندا قازاقستان رەسپۋبليكاسى پرەزيدەنتتىنىڭ سايلاۋى بارلىق جاعىنان جوعارى دەڭگەيدە ءوتتى. سايلاۋدا پرەزيدەنتتىككە كانديدات نۇرسۇلتان نازارباەۆ  ايقىن باسىمدىقپەن جەڭىسكە جەتتى. حالىقتىڭ ىقىلىسى, ەلباسىنا دەگەن سەنىمى زور بولدى. بۇل تۋرالى egemen.kz ءتىلشىسى حابارلادى. سايلاۋدا جاستار دا بەلسەندىلىك تانىتتى. سولاردىڭ ءبىرى - وبلىستىق دەپۋتاتتار قاۋىمداستىعىنىڭ توراعاسى ۆلاديمير ۆيتچەنكو ەلباسىمىزدىڭ  سايلاۋداعى  تاماشا جەڭىسى ەلىمىزدىڭ  الداعى دامۋ جولدارىن ايقىنداپ, بەرىك  نەگىز سالىپ بەرگەنىن ايتادى.   «مەن ءوزىم نۇرسۇلتان ءابىش ۇلىنىڭ  سەنىمدى تۇلعاسى  رەتىندە جاستارمەن كوپ جۇزدەستىم. سوندا ولاردىڭ پرەزيدەنتىمىزدىڭ  ساياساتىن تولىق قولدايتىنىن بايقادىم.  بۇل تەكتەن-تەك  ەمەس.  الەم  مويىنداعان تۇلعا  ءتۇتىنى ءتۇزۋ ۇشقان  ورتاق شاڭىراقتىڭ ءال-اۋقاتى مەن تۇرمىسىن از ۋاقىتتىڭ ىشىندە تۇزەي ءبىلدى. ونىڭ ىشىندە وسكەلەڭ ۇرپاق  ءۇشىن دە بارلىق جاساي جاسالعان. مەملەكەتتىك باعدارلامالاردىڭ قاي قايسىسىن الساق جاستار مۇراتى ءبىرىنشى كەزەكتە ەسكەرىلەدى», دەدى ول. سونىمەن بىرگە ول مەملەكەت باسشىسى سالاماتتى ءومىر سالتىنا دا ۇلكەن كوڭىل ءبولىپ كەلە جاتقانىن, ساۋلەتتى سپورت عيماراتتارى تۇرعىزىلىپ, ماتەريالدىق-تەحنيكالىق بازالار نىعايتىلۋدا ەكەنىن, جاقىندا وبلىستا زاماناۋي سپورت سارايى اشىلىپ,  اتاقتى  ۆەلوشاباندوز, لوندون وليمپياداسىنىڭ  التىن جۇلدەگەرى  الەكساندر ۆينوكۋروۆتىڭ ەسىمىمەن اتالاتىنىن ايتتى. «بۇگىندە قازاقستاندىقتار ءۇشىن تورتكۇل دۇنيە ەسىگى  اشىق. مەن كەكۋشينكاي-كاراتەدەن ۇلتتىق كوماندانىڭ قۇرامىندا ەۋروپا مەن ازيا ەلدەرىن شارلادىم. تابانىمىز تيگەن ءاربىر ەلدە  ءبىزدى قۇشاق جايا قارسى الىپ, قوناقجايلىلىق تانىتتى.  سەبەبى, بارعان جەرلەرىمىزدە نۇرسۇلتان نازارباەۆتى بىلمەيتىن ادام كەمدە-كەم. ماعان ەلباسىمىزدىڭ قاتىسۋىمەن وتكەن ءىس-شارالاردا بولۋ باقىتى دا بۇيىردى. سولاردىڭ بىرىندە ماعان قول بەرىپ امانداسقانىن ەشقاشان ۇمىتپايمىن. وسى ءبىر ءسات بويىما وراسان قۋات-جىگەر بەرىپ,  قاناتتاندىردى, العا ۇمتىلدىردى», دەدى ول. ونىڭ ايتۋىنشا, قازىر جاستار ءۇشىن دە «قازاقستان – 2050» ستراتەگياسى, «نۇرلى جول» باعدارلاماسى, بەس حالىقتىق رەفورما باستى باعدارلار بولىپ قالا بەرەدى.  بەيبىتشىلىك پەن كەلىسىم-كوزدىڭ قاراشىعىنداي ساقتالاتىن جالپىحالىقتىق بايلىعىمىز. پرەزيدەنتىمىزبەن بىرگە جاڭا جەڭىستەرگە جەتە بەرەتىن بولامىز. ءومىر ەسقالي. دەرەك, سۋرەت: egemen.kz