قازاقستاندىق فيلم حالىقارالىق بايقاۋدا جەڭىمپاز اتاندى

استانا. 28 ءساۋىر. «چەرنىي كۆادرات» تەلەۆيزيالىق باعدارلاماسى اياسىندا تۇسىرىلگەن قازاقستاندىق «بولشەكتەلگەن ءولىم» ءفيلمى دەتەكتيۆ جانرىنداعى حالىقارالىق بايقاۋدا جەڭىمپاز اتاندى. بۇل تۋرالى zakon.kz حابارلادى. «دەتەكتيۆ فەست» حالىقارالىق فەستيۆالى قوعامداعى ادام قۇندىلىعى مەن بوستاندىعىن, سونداي-اق, ءوزىن-ءوزى باعالاۋ قۇقىعىن ناسيحاتتايتىن الەمدەگى جالعىز بايقاۋ. وسىمەن 16-رەت ۇيىمداستىرىلعان فەستيۆالعا 55 ەلدەن, 435 كينوتۋىندى ۇسىنىلدى. مۇنىڭ 60-ى تولىقمەتراجدى بولسا, 56-سى كوپ سەريالدى فيلم. ال قالعانى دەرەكتى فيلمدەر. بايقاۋعا قاتىسقان قازاقستاندىق تۋىندىنىڭ قۇرىلىمى قىلمىس الەمىندەگى قاتىگەزدىك پەن كولەڭكەلى بيزنەسكە قاتىستى وقيعانى باياندايدى. ايتا كەتەيىك, ماسكەۋ قالاسىندا وتكىزىلگەن ءداستۇرلى حالىقارالىق بايقاۋدا وتاندىق فيلم ۇزدىك دەپ تانىلىپ, جەڭىمپازى اتاندى. تالعات رايىمبەك. دەرەك, سۋرەت: zakon.kz.