سۋرەتتى تۇسىرگەن اۆتور
ء«بىزدىڭ ۋچاسكەدە موڭكە ۇلى كوشەسىندەگى كوپقاباتتى ۇيلەردىڭ بىرقاتار تۇرعىندارى تىركەلگەن. بارلىعى 2444 سايلاۋشىمىز بار. سونىڭ 8-ءى ۇيدەن داۋىس بەرەمىز دەپ ءوتىنىش جاسادى. ازىرگە ءبارى ويداعىداي ءوتىپ جاتىر. ۋچاسكە ءدال ۋاقىتىندا جۇمىسىن باستادى. ەڭ العاش بولىپ الماگۇل رامازانوۆا ەسىمدى تۇرعىن كەلدى. ول كىسىگە شاعىن سىيلىعىمىزدى بەردىك», دەيدى №421 ۋچاسكەلىك رەفەرەندۋم كوميسسياسىنىڭ توراعاسى ساۋلە ايتقاليەۆا.
ال №427 ۋچاسكەسىندە ءانۇران ورىندالعان ساتىنە ءبىز دە كۋا بولدىق. رەفەرەندۋم كوميسسياسىنىڭ توراعاسى اسەم ءشاريپوۆا بۇل ۋچاسكەدە 1801 داۋىس بەرۋشى تىركەلگەنىن ايتتى. جالپى كوميسسيا قۇرامى 7 ادامنان تۇرادى, 5 باقىلاۋشى كەلىپ تىركەلگەن. باقىلاۋشىلاردىڭ اراسىندا «جاريا» ۇيىمىنان, «اmanat» پارتياسىنان بار. دەنساۋلىعىنا بايلانىستى 9 ادام داۋىس بەرۋدى ءوز ۇيىنەن جاساۋعا ءوتىنىش بەرگەن ەكەن.
«ولارعا تۇسكە تامان بارامىز. ۋرناسى مورلەنگەن, كولىگىمىز دايىن», دەيدى اسەم مالىكقىزى.
№421 ۋچاسكەدە العاشقى 10 مينۋتتىڭ ىشىندە 15 ادام كەلىپ, داۋىس بەرگەنىن كوردىك. ء«سىز قازاقستاندا اتوم ەلەكتر ستانساسىن سالۋعا كەلىسەسىز بە؟» دەگەن جالعىز ساۋال قويىلعان بيۋللەتەنگە داۋىس بەرۋشىلەر اراسىندا جاستار دا, ۇلكەندەر دە بار.
«مەنىڭ جاسىم 88-گە قاراي كەتتى. كەمپىرىم ساندەش – 85-تە. بۇگىن ءبىز دە ەرتە تۇرىپ, ەل بولاشاعى ءۇشىن ماڭىزدى ساۋالعا جاۋاپ بەردىك. قازاقستان ەرتەڭگى كۇنى ەشكىمگە كىرىپتار بولماۋى ءۇشىن بۇل تاڭداۋ ماڭىزدى دەپ ەسەپتەيمىن», دەيدى ەڭبەك ارداگەرى, اقجايىق اۋدانىنىڭ قۇرمەتتى ازاماتى سايىن مولداعاليەۆ.
ەگدە جاسىنا قاراماي ەلگەزەكتىك تانىتقان قوس قاريا №421 ۋچاسكەلىك رەفەرەندۋم كوميسسياسىنىڭ توراعاسى ساۋلە ايتقاليقىزىنىڭ قولىنان شاعىن سىيلىققا يە بولدى.
باتىس قازاقستان وبلىسىندا بۇگىن رەفەرەندۋم بويىنشا 496 ۋچاسكە جۇمىس ىستەپ جاتىر.
