سۋرەت: Inform.kz
شارۋاسى شالقايا باستاعان شالعاي اۋىلدارعا ەكىنشى تىنىس بەرەتىن بۇل باعدارلامانىڭ پايداسى كوپ: ەلدى مەكەندە تۇرعىن ءھام جۇمىس قولى كوبەيەدى, مەكتەپتە وقۋشى سانى ارتادى. كەلگەن جاننىڭ دا ەسەبى تۇگەل: باسىنا ءۇي, قوراسىنا مال بىتەدى.
اقجايىق اۋدانىنىڭ اكىمى مۇرات سەردالين جاڭا تۇرعىندار بولات بەكمىرزاەۆ پەن بادامشا ابىلقايىروۆاعا باسپانا كىلتى مەن ارنايى سەرتيفيكات تابىستادى. اۋىلداعى «مۇقاش» شارۋا قوجالىعىنىڭ جەتەكشىسى الاۋجان مۇقاشەۆ پەن «الىبەك» شارۋا قوجالىعىنىڭ جەتەكشىسى الىبەك ەرعالي ەكى ۇيەلمەنگە ءبىر-بىردەن ءىرى قارا سىيعا تارتتى.
ءاۋ باستا وسى باعدارلامانى ۇيىمداستىرۋشىلار كوپبالالى وتباسىلاردىڭ اۋىلعا كەلۋىن ماقسات ەتكەن بولاتىن. شىنىندا, سولاي بولدى. ەندى بيتىلەۋ اۋىلىندا ءتۇتىن تۇتەتەتىن بەكمىرزاەۆ اۋلەتىندە 4 ۇل-قىز بولسا, شوقاەۆتاردىڭ 6 بالاسى بار. مىنە, يساتاي تايمان ۇلى اتىنداعى ورتالاۋ مەكتەپتىڭ دە شاكىرتى كوبەيىپ جاتىر.
– وسىنداي يگى باستاماعا ۇيىتقى بولعان وبلىس باسشىلىعىنا, جاپ-جاڭا باسپانامەن قامتاماسىز ەتكەن اۋدان اكىمدىگىنە, ءىرى قاراسىن تارتۋ ەتكەن قوجالىق جەتەكشىلەرىنە, قۋانا قارسى العان بيتىلەۋلىكتەرگە شىنايى العىس ايتامىن. بۇعان دەيىن باسىمىزدا باسپانا جوق, قالادا پاتەر جالداپ ءبىراز جىل جۇردىك. ءارى بالالار كىشكەنتاي بولعان سوڭ ءۇي شارۋاسىمەن وتىردىم. جولداسىمنىڭ جالدامالى جۇمىستان تاپقان ناپاقاسىنا كۇن كورەتىنبىز. قالادان اۋىلعا كوشۋ تۋرالى ۇسىنىس تۇسكەندە, ءبارىمىز دە قۋانا كەلىستىك, – دەيدى التى بالانىڭ اناسى, «كۇمىس القا» يەگەرى ارمانگۇل شوقاەۆا.
بيتىلەۋ اۋىلىنىڭ جاڭا تۇرعىندارى كىرىپ وتىرعان باسپانانىڭ ارقايسىسى 18 ملن تەڭگە تۇرادى. تابيعي گازى, تازا سۋى قوسىلىپ تۇر.
– «قالادان اۋىلعا» باعدارلاماسى اياسىندا اقجايىق اۋدانىنداعى سايقۇدىق اۋىلىنا ءبىر وتباسى كوشىپ كەلدى. ءتىنالى اۋىلىندا ەكى جەكە باسپانا ساتىپ الىندى. قازىر اقبۇلاق اۋىلىندا تۇرعىن ءۇي سالۋ جونىندە كاسىپكەرلەرمەن كەلىسسوز جاساپ جاتىرمىز, – دەدى اۋدان باسشىسى مۇرات سەردالين.
باتىس قازاقستان وبلىسى
