ساعىندىرعان ءسابيرا اپا

80 جىلدىق تاريحى بار بايىرعى ءبىلىم ورداسى سانالاتىن و.تاڭسىقباەۆ اتىنداعى الماتى ساندىك-قولدانبالى ونەر كوللەدجىندە كسرو حالىق ءارتىسى, مەملەكەتتىك سىيلىقتىڭ لاۋرەاتى, قازاق ساحناسىنىڭ اناسى ءسابيرا مايقانوۆانى ەسكە الۋعا ارنالعان تەاترلاندىرىلعان كەش ءوتتى. ءيا, بىلتىرعى جىل – قازاق ساحنا ونەرىنىڭ مايتالمانى, انالاردىڭ اناسى اتانعان ءسابيرا مايقانوۆانىڭ جىلى دەسەك تە بولعانداي. ماسەلەن, ناۋرىز ايىندا الماتىدا ۇلى اكتريساعا ارنالعان تەاتر فەستيۆالى وتسە, قىركۇيەك ايىندا تۋعان جەرى قىزىلوردا قالاسى مەن وبلىسىندا سىر ەلى ۇلان-اسىر توي جاساپ, شىنايى قۇرمەت كورسەتتى. الماتىدا قازان ايىندا ءوزى ۇزاق جىلدار قىزمەت ىستەگەن اكادەمتەاتردا, جەلتوقساندا استاناداعى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا ءجۇز جىلدىق مەرەيتويىنا ارنالعان سالتاناتتى كەش ءوتتى. مىنە, ءسابيرا اپايدىڭ تويى ءالى دە جالعاسىپ, الماتى ساندىك-قولدانبالى ونەر كوللەدجى اكتريسانىڭ تۋعان-تۋىستارىن, ساحناداعى بىرگە ويناعان ارىپتەستەرىن, الماتىلىق زيالى قاۋىمدى شاقىرىپ, ادەمى كەش سىيلادى. وندا ءسابيرا اپايدىڭ فوتوگالەرەياسى, ساحنالىق كوستيۋمدەرىنىڭ دەمونستراتسياسى, قازاقستاننىڭ حالىق سۋرەتشىلەرى ايشا عالىمباەۆا مەن گۇلفايرۋس يسمايلوۆا سالعان كەسكىندەمەلىك پورترەتتەرى, سونداي-اق كوللەدجدىڭ تەاتر ساحناسىن بەزەندىرۋ ءبولىمىنىڭ سپەكتاكلدەرگە ارنالعان ماكەتتەرى مەن ەسكيزدەرى قويىلدى. – ەل بولىپ قازاق ساحنا ونەرىنىڭ اناسى ءسابيرا اپايدىڭ مەرەيتويىن اتاپ ءوتىپ جاتقان كەزدە, ءبىز دە سىرت قالماۋدى ءجون كوردىك, – دەيدى ونەر كوللەدجىنىڭ ديرەكتورى, پروفەسسور سەيىتقالي شالاباەۆ. سەبەبى, سەكسەن جىلدىق تاريحى بار (بۇرىنعى گوگول اتىنداعى كوركەمسۋرەت ۋچيليششەسى) ءبىلىم وشاعىندا كەڭەس زامانىنان وزگەرمەي كەلە جاتقان تەاتر ساحناسىن بەزەندىرۋ ءبولىمى بار. سوندىقتان مۇنداي كەشتىڭ بۇگىندە بىزدە وقىپ جاتقان ستۋدەنتتەرگە تاربيەلىك ءمانى زور. تۇلەكتەرىمىزدىڭ اتاقتى ارتىستەردىڭ ويناعان كلاسسيكالىق تۋىندىلارىنداعى ساحنالىق كورىنىستەرىن, دەكوراتسيا­لارىن كورىپ, بويلارىنا ءسىڭىرۋ ماقساتىندا وسىنداي كەزدەسۋلەردى ءجيى-ءجيى ۇيىمداستىرىپ تۇرامىز. بۇل جولى س.مايقانوۆانىڭ قازاق ايەلى, انالارىنىڭ بەينەسىن سومداعانداعى ەپيزودتارىن, ساحنانىڭ بەزەندىرىلۋىن بۇگىنگى جاستارعا ۇمىتتىرماي, تاريحپەن بىرگە باۋلىپ, تاجىريبە مەن ءبىلىم, تاربيەنى قاتار بەرۋدى ءجون كوردىك. اسىرەسە, كەشتە ستۋدەنتتەردى سانالى عۇمىرىنىڭ 63 جىلىن قازاق ساحنا ونەرىنىڭ قارا شاڭىراعى م.اۋەزوۆ اتىنداعى اكادەمتەاترىنا ارناعان ءسابيرا مايقانوۆانىڭ «شوقان ۋاليحانوۆتاعى» زەينەپتىڭ, «قاراكوزدەگى» مارجان, ابايداعى قانىكەيدىڭ, «انا – جەر-اناداعى» تولعانايدىڭ رولدەرىن ورىنداعاندا كيگەن ساحنا كيىمدەرى قىزىقتىردى. ال اكتريسانىڭ ۇرپاقتارى اتىنان قىزى گۇلدار ءابدىراشيتوۆا اناسى جايلى ەستەلىك ايتىپ, تەبىرەنە سويلەدى. – وزدەرىڭىز بىلەسىزدەر, انام كوپتەگەن تاريحي رولدەردى سومدادى. ونىڭ ىشىندەگى شوقتىعى بيىگى «انا – جەر-اناداعى» تولعانايدىڭ ءرولى. سول سپەكتاكل بولاتىن كۇنى ەشكىممەن سويلەسپەيتىن, ەشكىمدى كورمەيتىن, تەلەفونعا دا شاقىرمايتىنبىز. ول كىسىگە ەشكىم قارسى كەلمەيتىن. انامىزدىڭ مىنەزى «قاراگوزدەگى» مارجانعا ۇقسايتىن. بىراق جۇرەگى وتە جۇمساق, ادامداردى وتە جاقسى كورەتىن. قولىنان كەلگەن كومەگىن, جاقسىلىعىن ايامايتىن, – دەپ گۇلدار ابدىلقىزى اناسىن ەسكە السا, اكتريسامەن بىرگە قىزمەت ىستەگەن سۋرەتشى-دەكوراتور ەسەنگەلدى تۇياقوۆ ول كىسىنىڭ ءوزى ويناعان رولدەرىنە بەرىلەتىنى سونشالىقتى, سپەكتاكل بىتكەندە كيىمدەرى سۋ بولىپ, تەرلەپ شىعاتىنىن, بۇل اكتريسانىڭ كەرەمەت تالانتتى, ەڭبەكقورلىعىن كورسەتەتىنىنە توقتالدى. سونداي-اق, قر ەڭبەك سىڭىرگەن قايراتكەرى اللا مولداعاليەۆا, بەلگىلى سۋرەتشى ۆ.سيدوركين, ت.ب. ەستەلىكتەر ايتتى. كەشتىڭ ءون بويىندا اكتريسا جايلى ولەڭدەر وقىلىپ, دەرەكتى فيلم, دەفيلە كورسەتىلدى. گۇلزەينەپ سادىرقىزى, «ەگەمەن قازاقستان». الماتى.