سۋرەتتەردى تۇسىرگەن – ەرلان ومار, «ەQ»
فورۋمنىڭ العاشقى كۇنى «قوعامداعى ۆولونتەرلىك قىزمەتتىڭ ماڭىزدىلىعى: ازيا ەلدەرىنىڭ تۇراقتى دامۋىنا جاردەمدەسۋدەگى ۆولونتەرلىك قىزمەتتىڭ ءرولىن تالقىلاۋ» تاقىرىبىندا اوسشك جاستار كەڭەسىنىڭ 7-وتىرىسى ءوتتى. كەزدەسۋ قوعامداعى ەرىكتىلىكتىڭ ماڭىزدىلىعىنا جانە ونىڭ ازيا ەلدەرىنىڭ تۇراقتى دامۋىنداعى رولىنە ارنالدى.
– قازاقستان پرەزيدەنتى قاسىم-جومارت توقاەۆ 2022 جىلعى شىلدەدەگى وتىرىستا استانادا جاستار كەڭەسىنىڭ قولداۋىمەن اوسشك-كە مۇشە ەلدەردىڭ ەرىكتىلەر قوزعالىسى كوشباسشىلارىنىڭ سلەتىن وتكىزۋدى ۇسىنعان. وسىلايشا, باسقوسۋعا الەمنىڭ ءار تۇكپىرىنەن ۆولونتەرلىك ۇيىمداردىڭ كوشباسشىلارى, بەلسەندى ۆولونتەرلەر, سونداي-اق اوسشك-عا مۇشە مەملەكەتتەردىڭ ۆولونتەرلىك ماسەلەلەرىنە جەتەكشىلىك ەتەتىن مەملەكەتتىك ورگانداردىڭ وكىلدەرى جينالدى. بۇل ءىس-شارا ازيانىڭ ءار ايماعىنان كەلگەن ساراپشىلار مەن ماماندارعا تاجىريبە, يدەيا الماسۋ جانە بىرلەسكەن جوبالاردى جۇزەگە اسىرۋ ءۇشىن تاپتىرماس الاڭ بولاتىنىنا سەنىمدىمىن. مۇندا مادەنيەتارالىق ديالوگكە, قاتىسۋشى ەلدەر اراسىنداعى ىنتىماقتاستىقتى نىعايتۋعا باسا نازار اۋدارىلىپ وتىر. فورۋمدا كوتەرىلگەن تاقىرىپتاردىڭ ارقايسىسىنىڭ وزىندىك ماڭىزى بار. سەبەبى ۆولونتەرلىك قىزمەتتىڭ تەك الەۋمەتتىك ماسەلەلەردە عانا ەمەس, ەلدىڭ ەكونوميكاسىن ىلگەرىلەتۋدە دە قوسار ۇلەسى زور, – دەدى اوسشك باس حاتشىسىنىڭ ورىنباسارى چجان لين.
نەگىزگى وتىرىستان بولەك, پانەلدىك سەسسيالار دا ۇيىمداستىرىلدى. باسقوسۋلار شەتەلدىك سپيكەرلەر قاتىسۋىمەن «الەۋمەتتىك جانە ينكليۋزيۆتى ۆولونتەرلىك», «زياتكەرلىك ۆولونتەرلىك: يننوۆاتسيالىق تاسىلدەر جانە حالىقارالىق تاجىريبە», «توتەنشە جاعدايلارداعى ۆولونتەرلىك قىزمەت», «ەرىكتىلەردىڭ ەكولوگيالىق پروبلەمالاردى شەشۋگە قوسقان ۇلەسى», سونداي-اق «دەنساۋلىق ساقتاۋ سالاسىنداعى ۆولونتەرلەردىڭ ءرولى» تاقىرىبىندا ءوتتى.
– بىزدە ءاربىر جوعارى وقۋ ورنىندا جۇزدەگەن مەديتسينالىق ۆولونتەر بار. گەوگرافيالىق تۇرعىدان اۋقىمدى ايماقتى الىپ جاتقاندىقتان اۋىل-ايماقتارداعى مەديتسينالىق مەكەمەلەرگە ەرىكتىلەرىمىز ءجيى كومەك قولىن سوزۋعا بارادى. جاس ۆولونتەرلەر ەم الۋشىلاردى تىركەۋگە كومەك بەرەدى, ولاردىڭ اۋرۋلارىنا بايلانىستى جەرگىلىكتى تۇرعىنداردى مامانداندىرىلعان دارىگەرلەرگە باعىتتاپ وتىرادى. ياعني ۆولونتەرلەر دەنساۋلىق ساقتاۋ سالاسى سەكتورىنداعى جۇكتەمەنى ازايتۋعا كومەك بەرەدى. بۇگىندە ءۇندىستاندا مەديتسينا باعىتىندا 20 مىڭ ۆولونتەر جۇمىس ىستەيدى, – دەدى ءۇندىستاننان كەلگەن ۆولونتەر سۋبراتا حازرا.
جالپى, الەمدە ءوز ەركىمەن قوعامعا پايداسىن تيگىزۋدى كوزدەيتىن ەرىكتىلەر قاتارى جىل ساناپ ارتىپ كەلەدى. بۇگىندە جاھاندا 970 ميلليون ۆولونتەر بولسا, ونىڭ ىشىندە ءاربىر سەگىزىنشى قازاقستان ازاماتى ەرىكتىلەر قاتارىن تولىقتىرىپ وتىرادى.
– دارىگەرلىك جۇمىسىمنان تىس رەابيليتاتسيا جونىندە تسەرەبرالدى سال اۋرۋىمەن اۋىراتىن بالالارى بار اتا-انالارعا, مەديتسينا سالاسىنداعى قىزمەتكەرلەرگە YouTube پلاتفورماسىندا تەگىن كەڭەس بەرەمىن. اقىسىز تۇردە بالالارعا ەم تاعايىنداپ, وڭالۋ جولىندا قاجەتتى ءادىس-تاسىلدەردى ايتىپ وتىرامىن. قازىر ەلىمىزدە مەن سەكىلدى قوسىمشا ەرىكتىلىكپەن اينالىساتىن ارىپتەستەرىم كوپ. وعان بىردەن-ءبىر سەبەپ كوروناۆيرۋس ەدى. ۆولونتەرلەر سلەتى ەرىكتىلەر جۇمىسىنىڭ ساپاسىن جاقسارتىپ, شەتەلدىكتەرمەن تاجىريبە الماسۋعا مۇمكىندىك بەرەدى, – دەدى رەابيليتولوگ دارىگەر لاتيف پارپيەۆ.
جيىن قورىتىندىسىندا قاتىسۋشىلار اوسشك كەڭىستىگىندە ۆولونتەرلىك قىزمەتتى دامىتۋ بويىنشا بىرلەسكەن ۇسىنىمدار ازىرلەۋگە كىرىستى.
ءىس-شارا بۇگىن دە جالعاسادى. ەرىكتىلەر ىنتىماقتاستىقتى كەڭەيتۋ جانە ۆولونتەرلىك قىزمەت بويىنشا تاجىريبە الماسۋ بويىنشا الداعى قادامداردى تالقىلايدى.
