قوستانايدا جوعالعان ءجاسوسپىرىم تابىلدى

استانا. 28 ءساۋىر. قوستاناي پوليتسەيلەرى ءىز-ءتۇسسىز جوعالىپ كەتكەن 14 جاستاعى ميحايل ولمەزوۆتى ەگىس القابىنان تاپتى. بۇل تۋرالى قوستاناي وبلىستىق ىشكى ىستەر دەپارتامەنتىنىڭ ءباسپاسوز قىزمەتى حابارلادى. ءتارتىپ ساقشىلارى ميحايل ولمەزوۆتى 5 كۇن بويى ىزدەدى. ءتىپتى پوليتسەيلەر ىزدەستىرۋ جۇمىستارىن جۇرگىزۋ ءۇشىن ارنايى توپ قۇرىپ, ءىزشىل ءيتتىڭ كومەگىنە جۇگىنگەن. وسىنىڭ ناتيجەسىندە جوعالعان ءجاسوسپىرىم ارمان اۋىلىنىڭ ماڭىنداعى جازىق القاپتان تابىلدى. ميحايل ولمەزوۆتىڭ اناسى 22 ءساۋىر كۇنى ۇلىنىڭ جوعالعانى جايىندا پوليتسەيلەرگە حابار بەرگەن. ونىڭ ايتۋىنشا, ۇلى كەشكى ۋاقىتتا ۇيىنەن شىعىپ, ريازانوۆ سەلوسىنا كەتكەن ول سودان قايتا ۇيىنە ورالماعان. سونداي-اق, اناسى ميحايلدىڭ سوڭعى ۋاقىتتا بىرنەشە مارتە ۇيىنەن قاشۋعا ارەكەت جاساعانىن ايتتى. قوستاناي قالالىق ىشكى ىستەر باسقارماسىنىڭ باسشىسى مارات ەسەرگەپوۆ: «جوعالعان ءجاسوسپىرىمدى ىزدەستىرۋگە پوليتسەيلەردەن بولەك, اۋىل تۇرعىندارى دا اتسالىستى. ميحايلدى سىرتىنان كورگەندەر ول ۆەلوسيپەدپەن مايكول اۋىلىنا قاراي باعىت العانىن ايتتى. الايدا, ءبىز ونى ارمان اۋىلىنا جاقىن ماڭداعى ەگىس القابىنان تاپتىق», – دەدى. قازىرگى تاڭدا ءجاسوسپىرىم اۋداندىق اۋرۋحاناعا جەتكىزىلگەن. دارىگەرلەر ونىڭ جاۋىننىڭ استىندا قالىپ, دەنەسى مۇزداپ قالعانىن ايتۋدا. قازىر ميحايل ولمەزوۆ دارىگەرلەردىڭ ءجىتى باقىلاۋىندا. تالعات رايىمبەك. دەرەك, سۋرەت: قوستاناي وبلىستىق ىشكى ىستەر دەپارتامەنتىنىڭ ءباسپاسوز قىزمەتى.