ءۇندىستاننىڭ سولتۇستىك بولىگىندەگى اۋلي قالاسى ماڭىنداعى «سۋريا» وقۋ-جاتتىعۋ ورتالىعىندا وقۋ-جاتتىعۋدىڭ سالتاناتتى اشىلۋ ءراسىمى ءوتتى. وقۋ-جاتتىعۋعا قاتىسۋشىلاردى قازاقستان اسكەري قىزمەتشىلەر اتىنان «وڭتۇستىك» وڭىرلىك قولباسشىلىعى اسكەرلەرى قولباسشىسىنىڭ ءبىرىنشى ورىنباسارى – شتاب باستىعى, پولكوۆنيك نۇرلان كارىباەۆ قۇتتىقتادى.
وقۋ-جاتتىعۋ بارىسىندا ەكى ەلدىڭ اسكەري قىزمەتشىلەرى تاۋ دايارلىعى شەڭبەرىندەگى بىرلەسكەن جۇمىس پەن تەرروريزمگە قارسى قاۋىپسىزدىك بويىنشا پراكتيكالىق ساباقتارعا قاتىسادى. قازاقستان دەسانتشىلارى ۇندىلىك ارىپتەستەرىمەن بىرلەسىپ, تاۋلى جەردە پاراشيۋتپەن سەكىرەدى.
– كۇندەلىكتى قىزمەتى تاۋ دايارلىعىنان تۇراتىن اسكەري قىزمەتشىلەر ءۇشىن وقۋ-جاتتىعۋعا قاتىسۋ جاۋىنگەرلىك داعدىلاردى ارتتىرۋعا ەداۋىر ىقپال ەتەدى. «قازۇند-2024» وقۋ-جاتتىعۋىن وتكىزۋ ءۇندىستان مەن قازاقستان قارۋلى كۇشتەرى اراسىنداعى بەرىك بايلانىس پەن دوستىقتى كورسەتەدى, – دەيدى قازاقستان كونتينگەنتىنىڭ كومانديرى پودپولكوۆنيك ارمان سابىروۆ.
العاش رەت قازاق-ءۇندى اسكەري قىزمەتشىلەرىنىڭ بىرلەسكەن وقۋ-جاتتىعۋى 2018 جىلى وتكەن. سودان بەرى اتالعان جاتتىعۋ ەكى ەلدىڭ پوليگوندارىندا كەزەكپەن ۇيىمداستىرىلىپ كەلەدى.
– بىرلەسكەن تاكتيكالىق وقۋ-جاتتىعۋى ءۇندىستان مەن قازاقستان قورعانىس مينيسترلىكتەرى اراسىنداعى ەكىجاقتى ىنتىماقتاستىق جوسپارىن ىسكە اسىرۋ شەڭبەرىندە وتكىزىلەدى. وقۋ-جاتتىعۋ ايماقتاعى تۇراقتىلىق پەن بەيبىتشىلىكتى ساقتاۋ ءۇشىن ماڭىزدى ءارى ءبىز ونىڭ قاۋىپسىزدىگىمىزگە ىقپال ەتەتىنىنە سەنىمدىمىز, – دەيدى ءۇندىستان كونتينگەنتىنىڭ كومانديرى پولكوۆنيك ياوگەش ۋپادحاي.
