ەسىرتكىگە تاۋەلدى ەتەتىن قۇرالداردىڭ ءبىرى – جارناما. سوندىقتان ونىڭ تارالۋىنا قارسى جازۋلاردى بوياۋعا 15-كە جۋىق ەرىكتى قاتىستى. ناۋقاندى استانا قالاسىنىڭ ىشكى ساياسات باسقارماسى كولىك جانە كوممۋنيكاتسيا جوعارى كوللەدجىمەن بىرلەسە ۇيىمداستىردى.
– مۇنداي ءىس-شارالار وسكەلەڭ ۇرپاقتىڭ ومىرگە سانالى كوزقاراسىن قالىپتاستىرۋ, ولاردىڭ بولاشاعىنا كوبىرەك كوڭىل ءبولۋ ءۇشىن ماڭىزدى. جاستاردىڭ شەشىم قابىلداۋدى ۇيرەنىپ, ومىرگە دۇرىس كوزقاراسى قالىپتاسقانىن قالايمىن, – دەيدى «جاڭارۋ سىبايلاس جەمقورلىققا قارسى جالپىۇلتتىق قوزعالىس» رقب فيليالى توراعاسىنىڭ ورىنباسارى داۋلەتكەرەي راحمەتۋللين.
قوعامدىق ماسەلەلەردە جاستاردىڭ بەلسەندىلىگى باسىم. بۇل ءبىر جاعىنان ولاردىڭ ۇستانىمىن قالىپتاستىرۋعا سەپ بولادى.
– ءبىز ناشاقورلىق ماسەلەسىنە بەيجاي قارامايمىز. وسى ءىس-شاراعا العاش رەت قاتىستىم. بۇل – ءوزىمنىڭ ازاماتتىق ۇستانىمىمدى ءبىلدىرۋدىڭ ءبىر جولى, – دەيدى ستۋدەنت دياس بالتاباەۆ.
سونداي-اق استانادا وسى باعىتتاعى رەيدتىك ءىس-شارالار ۇيىمداستىرىلدى. ىلكىمدى ىسكە الماتى اۋدانىنىڭ اكىمدىگى, پروكۋراتۋراسى جانە پوليتسيا باسقارماسى ۇيىتقى بولدى. بۇعان قوسا «جاستار رەسۋرستىق ورتالىعى» كوممۋنالدىق مەملەكەتتىك مەكەمەسىنە قاراستى ۆولونتەرلەر دە كومەككە كەلدى.
– ناقتى باعىت – ەسىرتكى جانە سينتەتيكالىق زاتتاردىڭ جارناماسىن جويۋ. ياعني اۋدانداعى ۇيلەر مەن مەكەمەلەردىڭ قابىرعالارىنا, تروتۋارلار مەن جولعا جازىلعان ەسىرتكى جانە سينتەتيكالىق زاتتاردىڭ جارناماسى بولۋى مۇمكىن ءتۇرلى گراففيتي, QR-كودتار, جازبالار, سۋرەتتەر ءوشىرىلدى. قازىرگى كەزدە جازبالار مەن سۋرەتتەردىڭ پوليتسيا انىقتاعان 15-كە جۋىق ءتۇرى بەلگىلى. بۇدان باسقا دا سىزبالاردى تازالايمىز. ويتكەنى بۇل ۆانداليزمگە جاتادى. اكتسيا الداعى ۋاقىتتا دا جالعاسادى, – دەيدى الماتى اۋدانى اكىمدiگi ىشكى ساياسات ءبولىمىنىڭ باسشىسى ايبىن ايدىن ۇلى.
