ادەپكىدە جىلىنا 12,7 ملن شارشى مەتر كەراموگرانيت شىعارىلادى. جوبانىڭ ەكىنشى كەزەڭىندە زاۋىت تولىق قۋاتىنا كوشىپ, جىلىنا 25,4 ملن شارشى مەتر كەراموگرانيت وندىرىلەدى. كاسىپورىندا 350 جاڭا جۇمىس ورنى اشىلادى. ءبىرىنشى كەزەڭدە وتاندىق نارىقتاعى سۇرانىستىڭ ۇشتەن ءبىرى قاناعاتتاندىرىلسا, ەكىنشى كەزەڭدە ىشكى نارىق اتالعان قۇرىلىس ماتەريالىمەن تولىق قامتاماسىز ەتىلەدى. سۇرانىستان ارتىلعان تاۋاردى الىس-جاقىن شەتەلگە ەكسپورتتاۋعا دا مۇمكىندىك تۋادى.
«زاۋىت – مەگاپوليس ەكونوميكاسىنىڭ اۋقىمدى ينۆەستيتسيالىق جوباسىنىڭ ءبىرى. ءوندىرىس ورنىنىڭ ەسەبىنەن الداعى كەزدە بيۋدجەتتىڭ تابىس سالىعى ارتادى. قانشاما ادام جۇمىسقا الىنادى. مەملەكەت باسشىسىنىڭ تاپسىرماسىنا سايكەس, ينۆەستور تارتىپ, ولارعا قولايلى جاعداي جاساۋ – اتقارۋشى بيلىكتىڭ باستى مىندەتى», دەدى شىمكەنت قالاسىنىڭ اكىمى عابيت سىزدىقبەكوۆ.
«وسىعان وراي ينۆەستورلاردىڭ قاسىنان تابىلىپ, جوبالارىنا جان-جاقتى قولداۋ كورسەتۋگە جەرگىلىكتى اكىمدىك ءبىرىنشى كەزەكتە مۇددەلى. پرەزيدەنتتىڭ تاپسىرماسىن ورىنداۋعا بار مۇمكىندىكتى جۇمساپ كەلەمىز. بۇل كۇندى شىن مانىندە تاريحي ءسات دەسەك بولادى. سەبەبى كەراموگرانيت شىعاراتىن مۇنداي اۋقىمدى ءوندىرىس ورنى ورتالىق ازيادا تۇڭعىش رەت شىمكەنتتە اشىلىپ وتىر. كەلىپ جاتقان ينۆەستورلارعا تەك قۋانۋىمىز كەرەك. جۋىردا قىتاي ەلىنىڭ سيان قالاسىنا ىسساپارمەن بارىپ قايتقان ەدىك. سوندا كوپتەگەن ينۆەستيتسيالىق كەلىسىمگە قول جەتكىزدىك. قىتاي ينۆەستورلارىمەن ارىپتەستىك بايلانىستى ءارى قاراي دا كۇشەيتەمىز. سونىڭ ءبىر مىسالى, كەلەشەكتە مەگاپوليستە قىتاي ينۆەستيتسياسىنا قوقىس وڭدەيتىن ۇلكەن زاۋىت سالىنادى», دەدى ول.
كاسىپكەرلىك جانە يندۋستريالىق-يننوۆاتسيالىق دامۋ باسقارماسى بەرگەن مالىمەتكە سۇيەنسەك, زاۋىتتىڭ قۇرىلىسى 2023 جىلعى ناۋرىزدا باستالعان. كاسىپورىن قىسقا ۋاقىت ىشىندە سالىنىپ ءبىتتى. جوبا ەكسپورتقا نەگىزدەلگەندىكتەن, وندىرىلەتىن تاۋار ىشكى نارىقتان بولەك شەتەلگە دە شىعارىلادى. كەراموگرانيت زاۋىتىنان باسقا بيىل «جۇلدىز» يندۋستريالدى ايماعىندا تاعى ەكى كاسىپورىن قۇرىلادى. ول – تەمىر-بەتون كونسترۋكتسيالارى مەن ەسىك-تەرەزە پروفيلدەرىن شىعاراتىن زاۋىتتار. جالپى, «جۇلدىز» ءوندىرىس الاڭىندا كەلەشەكتە قىرىققا جۋىق جوبا ىسكە اسادى. «Wan Sheng Ceramic» ءوندىرىس ورنى – سول جوبالاردىڭ العاشقىسى.
كەراموگرانيت وندىرەتىن كاسىپورىنعا تيەسىلى اۋماق 30 گەكتاردان اسادى. جاڭا زاۋىت سول جەردىڭ جارتىسىن الىپ جاتىر. 2025 جىلى جوبانىڭ ەكىنشى كەزەڭى ىسكە اسسا, قالعان 15 گەكتارداي جەرگە تاعى دا زاۋىت سالىنادى. ءوندىرىس ورنى تولىق قۋاتىنا كوشكەن ساتتە جۇمىسشىلار سانى 700-دەن اسادى. ەڭ ماڭىزدىسى جۇمىسشىلاردىڭ دەنىن جەرگىلىكتى تۇرعىندار قۇرايدى. ايتا كەتەيىك, «Wan Sheng Ceramic» – شاھارداعى كەراموگرانيت وندىرەتىن ەكىنشى زاۋىت. العاشقىسى «زەردە-كەراميكا» سەرىكتەستىگى دەپ اتالادى. الايدا جەرگىلىكتى كاسىپكەرلەردىڭ قارجىسىنا اشىلعان بۇل كاسىپورىننىڭ وندىرىستىك قۋاتى تومەندەۋ.
جاڭا كەراموگرانيت ءوندىرىسى جوباسىنا تىكەلەي قارجى قۇيعان قىتايلىق ينۆەستور حۋ دجەن گونىڭ ايتۋىنشا, تمد ەلدەرىندە ونىڭ كومپانياسىنىڭ جۇزەگە اسىرىپ جاتقان جوبالارى وتە كوپ.
«شىمكەنت قالاسى اكىمدىگىمەن ارادا بولعان ينۆەستيتسيالىق كەلىسىمنىڭ ناتيجەسىندە, رەسپۋبليكانىڭ ءۇشىنشى مەگاپوليسىنەن وسى كاسىپورىندى سالۋعا نيەت بىلدىردىك. سونداي-اق ءبىزدى ينۆەستورلارعا جاسالعان ءتۇرلى سالىق جەڭىلدىكتەرى, ينفراقۇرىلىم قولداۋلارى قىزىقتىردى. الداعى ۋاقىتتا قالا اكىمدىگى زاۋىتقا تەمىرجول تۇيىعىن سالىپ بەرۋدى ويلاستىرىپ جاتىر», دەدى حۋ دجەن گو.
قىتاي ەلىنىڭ شاھار ەكونوميكاسىنا جۇمساپ وتىرعان ينۆەستيتسياسى وتە قوماقتى. كەلەسى جىلى شىعىستاعى كورشىمىزدىڭ ينۆەستيتسياسىنا مەگاپوليستەن جەلاتين وندىرەتىن جاڭا زاۋىت سالىنادى دەگەن جوسپار بار. بۇدان باسقا دا بىرلەسكەن جوبالار جەتىپ ارتىلادى. وسىعان قاراپ شىمكەنتتە جۇزەگە اسىپ جاتقان بيزنەس باستامالاردىڭ ىشىندە قىتاي ينۆەستورلارىنىڭ الار ۇلەسى جوعارى دەپ ايتۋعا بولادى.
شىمكەنت
