بۇگىندە كىشى سەرجانت ر.باتىرحانوۆتىڭ ەسىمىن ەنشىلەگەن شەكارا بولىمشەسى جاس شەكاراشى ساربازداردى باتىرلىق پەن پاتريوتتىققا ۇندەيتىن تاربيە ورتالىعىنا اينالعان. ءوزى تۋعان قاتونقاراعايدا كوشە مەن مەكتەپتەگى ءمۇيىس باتىردىڭ ەسىمىمەن اتالادى.
ال وسىناۋ ەرلىك قالاي جاسالىپ ەدى؟ 1994 جىلعى 28 قىركۇيەكتە حاكيم بانداسىنىڭ 200-دەن استام قارۋلى سودىرى 9 اۆتوكولىكپەن تاجىكستاننىڭ حوروگ قالاسى ماڭىنداعى مەملەكەتتىك شەكارا ارقىلى اۋعانستانعا وتۋگە بەت العان. ولاردىڭ جولىنا 38 قازاق جانە رەسەيلىك شەكاراشى توسقاۋىل بولىپ تۇرادى.
ۇرىسقا ءبىرىنشى بولىپ كىرگەن رەسەيلىك وفيتسەر كونستانتين سەليۋك پەن رادجان باتىرحانوۆ قارۋلاستارىنا مودجاحەدتەرگە تىلدان شابۋىلداۋعا مۇمكىندىك بەرەدى. الايدا ۇرىستا اۋىر جارالانعان رادجان كوپ قان جوعالتىپ, ەسىن جيماستان قايتىس بولدى. ۇرىستىڭ ناتيجەسىندە مودجاحەدتەر جويىلىپ, سودىرلاردىڭ كەپىلىندەگى ادامدار قۇتقارىلدى.
كورسەتكەن ەرلىگى مەن باتىلدىعى ءۇشىن كىشى سەرجانت ر.باتىرحانوۆ قازا تاپقاننان كەيىن قازاقستان رەسپۋبليكاسى پرەزيدەنتىنىڭ جارلىعىمەن ءىى دارەجەلى «ايبىن» وردەنىمەن ماراپاتتالدى. مىنەكي, مۇنىڭ بارلىعى دا وتاندى شەكسىز ءسۇيۋدىڭ جارقىن ۇلگىسى. ال تاۋەلسىزدىگىمىزدىڭ 30 جىلدىعىنا وراي, باتىر شەكاراشى تاجىكستان رەسپۋبليكاسىنىڭ جوعارى ناگراداسى ءى دارەجەلى «سپيتامەن» وردەنىنىڭ يەگەرى اتانعانى تۋرالى ءسۇيىنشى حاباردىڭ جەتكەنىنە دە ءۇشىنشى جىلدىڭ ءجۇزى بولىپ قالدى.
بيىل 28 قىركۇيەكتە ەلىمىزدىڭ تۇكپىر-تۇكپىرىندە شەكاراشى ر.باتىرحانوۆتىڭ ەسىمىن ۇلىقتاپ, ەرلىگىنە تاعزىم ەتۋگە ارنالعان ءىس-شارالار ءوتتى. سولاردىڭ بىرقاتارىن ۇقك شەكارا قىزمەتى الماتى وبلىسى بويىنشا دەپارتامەنتى دە ۇيىمداستىردى. شەكاراشى ارداگەرلەر مەن جەكە قۇرام ماڭگىلىك الاۋ باسىنا گۇل شوقتارىن قويىپ, ەكىنشى دۇنيەجۇزىلىك سوعىس باتىرلارىنا, سونداي-اق تاۋەلسىزدىك جىلدارى ەرلىكپەن قازا تاپقان شەكاراشىلاردىڭ رۋحىنا تاعزىم جاساعان سوڭ, №102 ورتا مەكتەپتىڭ وقۋشىلارى «جاس شەكاراشى» اسكەري-پاتريوتتىق كلۋبىنىڭ قاتارىنا كىرۋ ءۇشىن انت قابىلدادى.
ايتا كەتەرلىگى, وسى كۇننەن باستاپ سول مەكتەپتىڭ 7 ء«ا» سىنىبى ر.باتىرحانوۆتىڭ ەسىمىمەن اتالعانى تۋرالى اقجارما حاباردى دەپارتامەنت باستىعىنىڭ ورىنباسارى, پولكوۆنيك ا.مۇنالباەۆ ماڭگىلىك الاۋ باسىنا جينالعان كوپشىلىككە جەتكىزدى.
بۇدان ءارى جاس پاتريوتتار ارميا ۇيىنە بارىپ, ي.پانفيلوۆ مۇراجايىن ارالاپ كوردى.
تامارا داۋلەتباەۆا,
ۇقك شەكارا قىزمەتىنىڭ زاپاستاعى پودپولكوۆنيگى
