كورىنبەيتىن مايدان جاۋىنگەر-دارىگەرى ەكى مىڭنان استام وتا جاساعان

كورىنبەيتىن مايداننىڭ جاۋىنگەرلەرى اسكەري حيرۋرگتەردىڭ كۇردەلى مىندەتتەردى ورىندايتىنى ءسوزسىز. ونداي وتاشىلار ونداعان وتان قورعاۋشىلارعا ەم جاساپ, ولاردىڭ ءومىرىن ساقتاپ قالادى. «دارىگەردىڭ, ونىڭ ىشىندە حيرۋرگتىڭ جۇمىسى پسيحولوگيالىق, فيزيكالىق كۇشتى, توزىمدىلىكتى تالاپ ەتەدى. مىسالى, ادام تاعدىرى قىل ۇستىندە تۇرعان كەزدە حيرۋرگكە ونى قۇتقارىپ قالۋ ءۇشىن 8-10 ساعاتتىق وتا جاساۋعا تۋرا كەلەدى», – دەيدى باس اسكەري كلينيكالىق گوسپيتال باستىعىنىڭ عىلىمي-حيرۋرگيالىق قىزمەت جونىندەگى ورىنباسارى, جەتەكشى حيرۋرگ پودپولكوۆنيك ەرجان سمايىل. اسكەري حيرۋرگتەردىڭ جۇمىسى ءبىر عانا قالامەن شەكتەلىپ قال­مايدى, قاجەت بولعان جاعدايدا بري­گادالار قازاقستاننىڭ ەڭ قاشىق دەگەن وڭىرىنە دە بارۋعا دايىن. «بىردە ءبىز جەدەل شاقىرۋمەن باتىسقا باردىق. سول جەرگە جەتكەندە ءبىر ادام ءۇشىن تۇتاس ءبىر دارىگەرلىك بريگادانىڭ وسىنشا قاشىقتىقتان ۇشىپ كەلگەنىنە تاڭ قالعان بولاتىن. ناتيجەسىندە, ءبىز سول جەردە ەكى وتا جاسادىق. سوسىن ءبىر پاتسيەنتتى استاناعا جەتكىزدىك. سول جەردە تاعى ءبىر پاتسيەنتكە ەكى كۇردەلى وتا جاساپ, ناتيجەسىندە ونىڭ ءومىرىن ساقتاپ قالدىق», – دەيدى پودپولكوۆنيك. وسى وقيعادان سوڭ ول «جاۋىنگەرلىك ەرلىگى ءۇشىن» مەدالىمەن ماراپاتتالىپتى. اسكەري دارىگەردىڭ قىزمەت جىلدارىندا بۇل سياقتى وقيعالار از كەزدەسكەن جوق. ە.سمايىل: «ءاس­كە­ري دارىگەرلەردىڭ جۇمىسى, ەڭ ال­دىمەن, وتان قورعاۋشىلارعا ارنال­عانىن, الدا-جالدا باقىتسىز جاع­داي ورىن الا قالسا, ولارعا اسكە­ري دارىگەرلەردىڭ كومەككە كەلە­تىنىن, ولاردى قۇتقارۋ ءۇشىن ءدارى­گەر­لەردىڭ قولدان كەلگەننىڭ ءبارىن جاسايتىنىنا سەنىمدى بولۋلارى كەرەك», دەيدى. ايگۇل سەيىلوۆا, «ەگەمەن قازاقستان».