قاجىمۇقان تۋرالى ءفيلمنىڭ كورسەتىلىمى باستالادى

مادەنيەت جانە اقپارات مينيسترلىگىنىڭ مالىمەتىنشە, 10 قازاننان باستاپ Qajymuqan تۋىندىسى ەلىمىزدىڭ بارلىق كينوتەاترىندا كورسەتىلىمىن باستايدى.

«رەجيسسەر قاناعات مۇستافين تاريحي فيلم ستسەناريىنە 2012 جىلى كىرىسىپ, تاقىرىپتى 10 جىلدان استام ۋاقىت بويى زەرتتەگەن. ءتۇسىرىلىمى 2020 جىلى باستالعان كينوتۋىندى الداعى ايدا كورەرمەن نازارىنا ۇسىنىلادى», دەپ قوستى ۆەدومستۆو.

تۋىندى مادەنيەت جانە اقپارات مينيسترلىگىنىڭ, ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن.

قاجىمۇقان مۇڭايتپاسوۆ – فرانتسۋز كۇرەسىنەن الەم چەمپيونى اتانعان تۇڭعىش قازاق, الەمدىك, وڭىرلىك, رەسەيلىك, كەيىن بۇكىلوداقتىق سۋپەر اۋىر سالماقتاعى كلاسسيكالىق كۇرەس چەمپيوناتتارىنىڭ بىرنەشە دۇركىن جەڭىمپازى.

رەجيسسەردىڭ ايتۋىنشا, قاجىمۇقان ءوزىنىڭ مىقتىلىعىن ءوز زامانىنىڭ ەڭ جاقسى بالۋاندارىن جەڭىپ دالەلدەگەن. ول – پاريجدە, لوندوندا, بەرليندە, ستامبۋلدا, بۋەنوس-ايرەس پەن چيكاگودا قوشەمەتكە بولەنگەن العاشقى قازاق سپورتشىسى. ءفيلمنىڭ ماقساتى – قاجىمۇقاننىڭ ومىرىمەن وسكەلەڭ ۇرپاقتى تانىستىرۋ, ونىڭ جەتىستىكتەرىن ۇلىقتاۋ ءارى ۇلگى الۋ.