وداققا تۇركيا دا قىزىعۋشىلىق تانىتتى

 انكارادا قازاقستان ەلشىسى جانسەيىت تۇيمەباەۆتىڭ, رەسەي ەلشىسى اندرەي كارلوۆتىڭ, بەلارۋس ەلشىسى اندرەي ساۆيننىح پەن قىرعىزستان ەلشىسى يبراھيم ءجۇنىسوۆتىڭ قاتىسۋىمەن جەتەكشى تۇرىك بۇقارالىق اقپارات قۇرالدارى وكىلدەرىنە ارنالعان ءباسپاسوز ءماسليحاتى ءوتتى. ءىس-شارا 2015 جىلعى 1 قاڭتاردان باستاپ ىسكە قوسىلعان ەۋرازيالىق ەكونوميكالىق وداققا (ەاەو) ارنالدى. ءىس-شارا بارىسىندا سپيكەرلەر ەاەو قۇرۋ ماقساتتارىنا, اتاپ ايتقاندا, وداققا مۇشە مەملەكەتتەر حالىقتارىنىڭ ءومىر ءسۇرۋ دەڭگەيىن كوتەرۋدى كوزدەيتىن ەل ەكونوميكالارىنىڭ تۇراقتى دامۋىنا باعىتتالعان ماسەلەلەر تۋرالى اڭگىمەلەدى. تاۋارلاردىڭ, قىزمەتتەردىڭ, كاپيتالدىڭ جانە ەڭبەك رەسۋرستارىنىڭ وداق ىشىندە ەركىن اينالىمىنا, عالامدىق ەكونوميكا جاعدايىندا ۇلتتىق ەكو­نوميكالاردىڭ كووپەراتسيالان­ۋىن جانە باسەكەگە قابىلەتتىلىگىن قامتاماسىز ەتۋ ماسەلەلەرىنە باسا نازار اۋدارىلدى. ج.تۇيمەباەۆ ەۋرازيالىق ينتە­گراتسيا يدەياسىن العاش رەت 1994 جىلى قازاقستان رەسپۋب­لي­كاسىنىڭ پرەزيدەنتى ن.ءا.نازار­باەۆ ايتقان دەپ اتاپ ءوتتى. ول ەل­دەرى­مىز 20 جىل بويى تاۋەلسىز مەم­لە­كەتتەر دوستاستىعى, ەۋرا­زيا­لىق ەكونوميكالىق قوعامداس­تىق, كەدەن وداعى جانە ءبىر­تۇتاس ەكونوميكالىق كەڭىستىك ءتاجى­ريبەلەرىنەن ءوتىپ, ەندى جۇزەگە اسىرىلعانىن اتاپ كورسەتتى. قازاقستان ەلشىسى ەاەو-نىڭ بارشاعا ورتاق حالىقارالىق قۇقىق قاعيدالارى, ونىڭ ىشىندە وداققا مۇشە مەملەكەتتەردىڭ ەگەمەندىك تەڭدىگى مەن اۋماقتىق تۇتاستىعى, ساياسي قۇرىلىمىن ءوزارا سىيلاۋ, ءوزارا ءتيىمدى ىنتىماقتاستىقتى, تاراپتاردىڭ ۇلتتىق مۇددەلەرىن جانە تەڭ قۇقىقتارىن قامتاماسىز ەتۋ, نارىقتىق ەكونوميكا مەن جاۋاپتى باسەكەلەستىكتى ساقتاۋ قاعيدالارى نەگىزىندە قۇرىلعانىن مالىمدەدى. رەسەي, بەلارۋس جانە قىر­عىزستان ەلشىلەرى ەاەو-عا قاتى­سۋشى ەلدەر ەكو­نو­ميكا­لارىنىڭ جانە الەۋمەتتىك سالالارىن دامىتۋ, حالىقتارىنىڭ حال-احۋالىن كو­تە­رۋ سياقتى ماقساتتاردى كوزدەي­تىنىن ايتتى. ەاەو ونىڭ ماقسات­تا­رى مەن قاعيدالارىن بولىسە الا­تىن ءار مەملەكەتتىڭ قوسىلۋىنا اشىق. ءىس-شاراعا قاتىسۋشىلار ەۋ­رازيالىق ەكونوميكالىق وداق­قا جانە ونىڭ تۇركيامەن ىنتى­ماق­تاستىعىنا قىزىعۋشىلىق تانىت­قان تۇرىك جۋرناليستەرىنىڭ سۇراق­تارىنا جاۋاپ بەردى. «ەگەمەن-اقپارات».