رەيتينگتە ۇزدىكتەر قاتارىندا

ساراپتامالىق ورتالىقتار­دىڭ 2014 جىلعا ارنالعان الەم­دىك يندەكس-رەيتينگىسىندە قازاقستان پرەزيدەنتى جانىن­داعى ستراتەگيالىق زەرتتەۋلەر ينستيتۋتى (قسزي) كاۆكاز, ورتالىق جانە وڭتۇستىك ازيا ەلدەرى ورتالىقتارىنىڭ اراسىندا ۇزدىك ۇشتىككە ەنىپ وتىر. سونداي-اق, ەنەرگەتيكا جانە شيكىزات ساياساتى سالاسىنداعى الەمدىك ساراپتامالىق ورتالىقتار اراسىندا العاشقى وتىزدىقتان كورىندى. ولاردىڭ اراسىندا رەند كورپورەيشن (5-ورىن), امەريكا ستراتەگيالىق جانە حالىقارالىق زەرتتەۋلەر ورتالىعى – CSIS (11-ورىن), بريتانيانىڭ ەنەرگەتيكالىق قاۋىپسىزدىك ماسەلەلەر جونىندەگى زەرتتەۋ ورتالىعى  – EUCERS (18-ورىن) سياقتى ساراپتامالىق قۇرىلىمدار بار. اتالعان رەيتينگ پەنسيلۆانيا ۋنيۆەرسيتەتىنىڭ «ساراپتامالىق ورتالىقتار جانە ازاماتتىق قوعام» اتتى زەرتتەۋ باعدار­لاماسى اياسىندا تۇزىلەدى. ساراپتامالىق قۇرىلىمداردىڭ جەتىستىكتەرىنە قاراي باعالاۋ 1989 جىلدان بەرى جۇرگىزىلىپ كەلەدى. زەرتتەۋگە الەمنىڭ بارلىق وڭىرىنەن 6500-دەن اسا «اقىل-وي» ورتالىقتارى الىنادى. ەندى 2014 جىلدىڭ رەيتينگى مەن اتالىمدارى قانداي كريتەريلەر نەگىزىندە تۇزىلگەنىنە توقتالايىق: - عىلىمي-ساراپتامالىق جۇمىستار­دىڭ ساپاسى مەن بەدەلى – جوعارى ساپالى, وبەكتيۆتى, ساياسي زەرتتەۋلەر. جانە ونىڭ مەملەكەت باسشىلىعىنا, باق پەن قوعامعا قولجەتىمدىلىگى; - ورتالىق قىزمەتكەرلەرىنىڭ كاسىبي­لىگى مەن ابىرويى – بىلىكتىلىگى جوعارى, تاجىريبەلى عالىمدار مەن ساراپشىلاردى جيناۋى, زەرتتەۋلەر سالاسىنا مويىندالعان مامانداردى تارتۋى; - جۇرگىزىلگەن زەرتتەۋلەردىڭ عىلىمي وبەك­تيۆتىلىگى, ورتالىقتىڭ عالىمدارى مەن ساراپ­شىلارىنىڭ رەسمي اتتەستاتسياسى, عىلىمي جاريالانىمداردىڭ ساپاسى مەن تۇرلەرى – كىتاپ, جۋرنال, كونفەرەنتسيالار ماتەريالدارى, عىلىمي جانە كاسىبي ءىس-شارالارداعى بايان­دامالاردىڭ, ورتالىق ماماندارى جازعان عىلىمي ماقالالاردىڭ سانى; - ناقتى باعدارلامالارعا, بريفينگتەر مەن رەسمي كەزدەسۋلەردىڭ سانىنا, ساياسي ماتەريالداردىڭ شىعۋىنا بايلانىستى تانىمالدىعى; - زەرتتەۋلەردىڭ ناتيجەسىن تاراتۋ ماق­ساتىندا ەلەكتروندى جانە ءداستۇرلى اقپارات قۇرالدارىن پايدالانا ءبىلۋ مەن نەگىزگى اۋديتوريامەن بايلانىس ورناتۋى. قسزي ەلباسىنىڭ جارلىعىمەن 1993 جىلدىڭ 16 ماۋسىمىندا اشىلعان. ينستي­تۋتتىڭ قۇرىلعان ساتىنەن بەرگى نەگىزگى مىندەتى مەملەكەتتىك عىلىمي-زەرتتەۋ مەكەمەسى رەتىندە قازاقستان پرەزيدەنتىنىڭ جۇمىسىن عىلىمي-ساراپتامالىق تۇرعىدا قامتاماسىز ەتۋ بولىپ تابىلادى. «ەگەمەن-اقپارات».