2007 جىلدان باستاپ Global Innovation Index (WIPO) 133 ەلدىڭ كورسەتكىشتەرىن 80 باعىت بويىنشا باعالاپ كەلەدى. بۇل جەردە ەكونوميكا مەن ءوندىرىستىڭ وسۋىنە يننوۆاتسيالاردىڭ ىقپالىن قاراستىرادى. رەيتينگ وسى سالاداعى جاڭا ستراتەگيالاردى ازىرلەۋدىڭ ماڭىزدى ينديكاتورى رەتىندە قىزمەت ەتەدى. رەيتينگتە جوعارى كورسەتكىشكە يە بولۋ ىسكە اسىرىلىپ جاتقان مەملەكەتتىك رەفورمالاردىڭ حالىقارالىق دەڭگەيدە باعالانعانىن كورسەتەدى. سونداي-اق الەمدىك ارەناداعى بەدەلدى جاقسارتۋعا جانە قازاقستانعا تىكەلەي ينۆەستيتسيالار تارتۋعا ىقپال ەتەدى.
سالتاناتتى راسىمگە دۇنيەجۇزىلىك زياتكەرلىك مەنشىك ۇيىمىنىڭ (WIPO) باس ديرەكتورى داررەن تانگ, Global Innovation Index بىرلەسكەن رەداكتورى ساچا ۆۋنچ ۆينسەنت, مەملەكەتتەر جانە ۇكىمەتتەر باسشىلارى, سونىڭ ىشىندە تۇركيا رەسپۋبليكاسىنىڭ پرەزيدەنتى رەدجەپ تايپ ەردوعان, باربادوس پرەمەر-ءمينيسترى ميا امور موتتلي, ۆەتنام سوتسياليستىك رەسپۋبليكاسىنىڭ پرەمەر-ءمينيسترى فام مين چين, الەۋمەتتىك كاسىپكەرلىك جانە يننوۆاتسيا سالاسىنداعى جەتەكشى ساراپشىلار قاتىستى.
قازاقستان ساپالى ءوسىم كورسەتىپ, جاھاندىق رەيتينگتە 81-ورىننان 78-ورىنعا كوتەرىلىپ, ءۇندىستان مەن يراننان كەيىن ورتالىق جانە وڭتۇستىك ازيا كوشباسشىلارى ۇشتىگىنە ەندى. «مەملەكەتتىك باسقارۋدىڭ تيىمدىلىگى», «زاڭنىڭ ۇستەمدىگى», «وقۋ, ماتەماتيكا جانە جاراتىلىستانۋ عىلىمدارى بويىنشا PISA شكالاسى», «نارىقتىڭ دامۋى», «بيزنەستى جۇرگىزۋ», «تىكەلەي ينۆەستيتسيالاردىڭ تازا اعىنى, ءىجو %» كورسەتكىشتەرى بويىنشا ىلگەرىلەۋ بايقالادى.
رەيتينگتەگى ەڭ ۇلكەن ءوسىم «كرەاتيۆتى تاۋارلار مەن قىزمەتتەر» كورسەتكىشتەرىندە بولدى. بۇل جەردە 93-ورىننان 65-ورىنعا, «ۇلتتىق كوركەم فيلمدەر/ملن ادام» 61-ورىننان 31-ورىنعا, «جوعارعى دەڭگەيدەگى دومەندەر (TLD)/مىڭ ادام» 115-تەن 80-گە دەيىنگى ساتىلاردان كورىندى.
رەيتينگ رەداكتورلارى قازاقستاننىڭ مىنا ينديكاتورلارمەن الەمنىڭ ۇزدىك 30 ەلىنە كىرگەنىن ەرەكشە اتاپ ءوتتى:
«ونلاين ۇكىمەت» – 8-ورىن, «شىعۋ تەگى بويىنشا پايدالى مودەلدەر/ملرد. ساتىپ الۋ قابىلەتىنىڭ پاريتەتى بويىنشا ءىجو» – 10-ورىن, «ەلەكتروندىق قاتىسۋ» – 15-ورىن, «وقۋشىلار مەن مۇعالىمدەردىڭ اراقاتىناسى, ورتا ءبىلىم» – 16-ورىن, «ەڭبەك ونىمدىلىگىنىڭ ءوسۋى, %» – 30-ورىن.
Global Innovation Index-تە قازاقستاننىڭ رەيتينگىن ارتتىرۋعا مەملەكەت باسشىسىنىڭ عىلىم جانە يننوۆاتسيالار ماسەلەلەرى جونىندەگى كەڭەسشىسى ك.زاكاريانىڭ باسشىلىعىمەن مۇددەلى مەملەكەتتىك ورگاندار ساپىنان پرەزيدەنت اكىمشىلىگى جانىنداعى جوبالاۋ ءوفيسىنىڭ جۇمىسى ىقپال ەتتى.
2024 جىلدىڭ 4 قازانىندا دۇنيەجۇزىلىك زياتكەرلىك مەنشىك ۇيىمىنىڭ (WIPO) قولداۋىمەن ەلىمىزدە العاش رەت ازيا ەلدەرى ءۇشىن Global Innovation Index 2024 ەسەبىن جاريالاۋدىڭ وڭىرلىك ءراسىمى وتەدى. ءىس-شاراعا ازيا ەلدەرىنىڭ يننوۆاتسيا مينيسترلەرى مەن پاتەنتتىك ۆەدومستۆولارىنىڭ باسشىلارى, سونداي-اق ديپلوماتيالىق كورپۋستىڭ, حالىقارالىق ۇيىمداردىڭ جانە مۇددەلى ۇكىمەتتىك ەمەس ۇيىمداردىڭ وكىلدەرى قاتىسادى.
دۇنيەجۇزىلىك زياتكەرلىك مەنشىك ۇيىمى (UN WIPO) – بىرىككەن ۇلتتار ۇيىمىنىڭ 15 مامانداندىرىلعان مەكەمەسىنىڭ ءبىرى. ونىڭ قىزمەتى شىعارماشىلىق قىزمەتتى ىنتالاندىرۋعا جانە زياتكەرلىك مەنشىكتى (IP) حالىقارالىق قورعاۋعا ىقپال ەتۋگە باعىتتالعان. WIPO تاۋار بەلگىلەرى مەن پاتەنتتەردى حالىقارالىق تىركەۋدى جەڭىلدەتەدى.
جاھاندىق يننوۆاتسيالىق يندەكس – يننوۆاتسيالاردىڭ ەلدەردىڭ دامۋىنا اسەرىن انىقتاۋ بويىنشا الەم ەلدەرىنىڭ اۋقىمدى ەكونوميكالىق زەرتتەۋى. حالىقارالىق رەيتينگ 2007 جىلدان بەرى 80 ءتۇرلى كورسەتكىشتەن الەمنىڭ 133 ەلىن باعالايدى. بۇل يندەكستىڭ ءوسۋىنىڭ ماڭىزدىلىعى ونى قىتاي, سينگاپۋر, ءباا, تۇركيا, ت.ب. ەلدەردىڭ ۇكىمەتتىك ستراتەگيالارىنا ەنگىزۋ ارقىلى انىقتالادى.
