ونەر بايقاۋىن ءانشىنىڭ تۋعان جەرى – شىڭعىرلاۋ اۋدانى اكىمدىگى باتىس قازاقستان وبلىستىق مادەنيەت, تىلدەردى دامىتۋ جانە ارحيۆ باسقارماسىنىڭ قولداۋىمەن ۇيىمداستىردى. سايىسقا ماڭعىستاۋ وبلىسى, استانا, قىزىلوردا, اقتوبە قالالارى مەن باتىس قازاقستان وبلىسىنىڭ اۋداندارىنان كەلگەن 13 پەن 16 جاس ارالىعىنداعى 18 ونەرپاز قاتىستى.
قازاقستان رەسپۋبليكاسىنىڭ ەڭبەك سىڭىرگەن مادەنيەت قىزمەتكەرى, ءانشى ءارى ايتىسكەر اقىن قاتيموللا بەردىعاليەۆ باستاعان قازىلار القاسىنىڭ ساراپتاۋىنان كەيىن بايقاۋدىڭ فينالدىق كەزەڭىنە 10 ءانشى ءوتتى.
تارتىستى وتكەن بايقاۋدا باس جۇلدەنى قازتالوۆ اۋدانىنىڭ اقپاتەر اۋىلىنان كەلگەن اياجان ەلەمەس جەڭىپ الدى. ءبىرىنشى ورىن شىڭعىرلاۋلىق سۇلۋجان جادىگەرگە بۇيىردى. ەكىنشى ورىن جۇلدەسىن استانالىق تولعاناي ەسىلباي مەن اقتوبەلىك يسلام قۇرمانعازى يەلەنسە, ءۇشىنشى ورىندى ماڭعىستاۋ وبلىسىنان كەلگەن ارايلىم ايسا, ورالدىق ءاليحان داعاروۆ جانە بايتەرەك اۋدانىنىڭ ونەرپازى اقكەنجە قونىسباي ءبولىستى. ال ورالدىق ءاليجان نۇرعالي مەن نۇردانا زينات, استانالىق اقبوتا ەرلانقىزى ديپلومانت اتاندى.
بۇعان قوسا قازتالوۆتىق ءالينا سۇلتان مەن ءسانىم تۇراربەك, قىزىلوردالىق ايارۋ قويشىباي مەن اقەركە جۇباتقانوۆا, ماڭعىستاۋلىق جانسۇلۋ ءالي, قاراتوبەلىك ارمان لۇقپان, شىڭعىرلاۋلىق ارۋ بيسەكەنوۆا ىنتالاندىرۋ سىيلىعىمەن ماراپاتتالدى.
ومىردەن ەرتە كەتكەن قالامپىر راحيموۆانىڭ ءسىڭلىسى جاڭىل اپايعا باتىس قازاقستان وبلىسى اكىمىنىڭ ورىنباسارى قاليار ايتمۇحامبەتوۆ ەلدىڭ ىقىلاسىن كورسەتىپ, گۇل سىيلاپ, يىعىنا قامزول جاپتى.
ايتا كەتەيىك, قالامپىر راحيموۆا شىڭعىرلاۋ اۋدانىنىڭ الماز اۋىلىندا 1949 جىلى دۇنيەگە كەلگەن ەدى. مەكتەپ ءبىتىرىپ, تۋعان اۋىلىندا كلۋب مەڭگەرۋشىسى بولىپ جۇرگەن ونەرلى قىزدى ايگىلى ءانشى, قازاقستاننىڭ حالىق ءارتىسى عاريفوللا قۇرمانعاليەۆ كورىپ, الماتىعا وقۋعا شاقىرعان. وسىلايشا, ول الماتى ەسترادا-تسيرك ونەرى ستۋدياسىندا ع.قۇرمانعاليەۆتەن ءتالىم الىپ, ۇلكەن ساحناعا شىقتى. 1969 جىلدان «گۇلدەر» ءانسامبلىنىڭ ءانشىسى بولدى. «اققۇمنىڭ اقكەربەزى» اتاندى. قايرات بايبوسىنوۆ, قاپاش ق ۇلىشەۆا, روزا رىمباەۆا, سەمبەك جۇماعاليەۆ سىندى ونەر تارلاندارىمەن بىرگە ەلگە تانىلىپ, 1988 جىلى قازاق كسر-ءىنىڭ ەڭبەك سىڭىرگەن ءارتىسى اتاندى. ءانشى گاسترولدىك ساپارمەن شەتەلدى دە, قازاقستاننىڭ تۇكپىر-تۇكپىرىن دە ءجيى ارالايتىن. سونداي ساپاردىڭ بىرىندە قالامپىر راحيموۆا 1988 جىلى جول اپاتىنا ۇشىراپ, نەبارى 39 جاسىندا كوز جۇمدى.
باتىس قازاقستان وبلىسى
