فوتو سەناتتىڭ ءباسپاسوز قىزمەتى
سەناتورلار كەزدەسۋ بارىسىندا اتوم ەلەكتر ستانتسياسىن سالۋ قاجەتتىگى جانە ونىڭ ەل ەكونوميكاسىنا دا, حالىقتىڭ ءال-اۋقاتىنا دا اسەرى تۋرالى ايتتى. بەكبولات ورىنبەكوۆ اتوم ەلەكتر ستانتسياسى ەلىمىزدىڭ كومىر ەلەكتر ستانتسيالارىنا تاۋەلدىلىگىن ەداۋىر تومەندەتۋگە مۇمكىندىك بەرەتىنىن اتاپ ءوتتى. كومىردى نەگىزگى ەنەرگيا كوزى رەتىندە پايدالانۋ قورشاعان ورتانى اۋىر زارداپقا ۇشىراتادى, ونىڭ ىشىندە اۋا مەن سۋدى لاستايدى. بۇل حالىقتىڭ دەنساۋلىعى مەن قورشاعان ورتاعا تەرىس اسەر ەتەدى.
«اەس پايدالانۋعا بەرىلگەندە كومىرقىشقىل گازى مەن باسقا دا زياندى زاتتاردىڭ شىعارىندىسىن ەداۋىر قىسقارتۋعا مۇمكىندىك تۋادى, بۇل كليماتتىڭ وزگەرۋىنە قارسى جاھاندىق كۇرەسكە ەلەۋلى ۇلەس بولادى. شىعارىندىنىڭ ازايۋى اۋا ساپاسىن جاقسارتۋعا جانە ەكولوگيالىق تۇراقتىلىقتى ارتتىرۋعا ىقپال ەتەدى, بۇل ءوز كەزەگىندە بولاشاق ۇرپاققا جايلى جانە قاۋىپسىز ورتا قالىپتاستىرۋعا مۇمكىندىك بەرەدى. اتوم ەنەرگياسىنا كوشۋ ەنەرگەتيكا سالاسىنداعى جاڭا تەحنولوگيا مەن يننوۆاتسيالىق تاسىلدەردى دامىتۋعا ىقپال ەتەدى جانە تۇراقتى ءارى سەنىمدى ەنەرگيامەن جابدىقتاۋدى قامتاماسىز ەتەدى», دەدى بەكبولات ورىنبەكوۆ.
