قۇرىلعانىنا جيىرما جىلدان اسقان, دەگەنمەن, قوندىرعىلارى ەسكىرىپ تۇرعان ەلىمىزدەگى العاشقى ءارى بىرەگەي, ءوز سالاسىندا جالعىز عىلىمي-كلينيكالىق ورتالىققا «سامۇرىق-قازىنا» اق باسقارما توراعاسى نۇرلان جاقىپوۆ 7 ءتۇرلى قازىرگى زامانعى وزىق مەديتسينالىق قۇرال-جابدىقتىڭ سەرتيفيكاتىن تاپسىردى.
«جىلىنا تىرەك-قيمىل اپپاراتىنىڭ جاراقاتتارى مەن اۋرۋلارىنان زارداپ شەگەتىن 8 مىڭ ازاماتىمىز ەندى ەداۋىر ساپالى, جوعارى دەڭگەيدەگى مەديتسينالىق كومەك الادى. جاڭا جابدىق مەديتسينالىق ورتالىق جۇمىسىنىڭ تيىمدىلىگىن ارتتىرۋعا سەپ بولادى دەپ سەنەمىن», دەدى قور جەتەكشىسى قۇتتىقتاۋ سوزىندە.
بۇعان دەيىن ورتالىق ماماندارى ءارتۇرلى حيرۋرگيالىق ارالاسۋلاردىڭ جىلدامدىعى مەن ەرەكشەلىگىنە, ناۋقاستاردىڭ ءومىر ءسۇرۋ ساپاسىنا اسەر ەتكەن ەسكىرگەن قاتارداعى اسپاپتار مەن جابدىقتاردى پايدالانىپ كەلدى. ەندىگى ساتتە ساتىپ الىنعان جابدىقتار سۇيەك-بۇلشىق ەت جۇيەسى جاراقاتتارى مەن اۋرۋلارى سالدارىنان بولۋى مۇمكىن اسقىنۋلار مەن مۇگەدەكتىكتىڭ سانىن ازايتىپ, حالىقتىڭ الەۋمەتتىك وسال توپتارىنا, بالالارعا, ەلىمىزدىڭ بارلىق ايماعىنان كەلەتىن قارتتارعا, مۇمكىندىگى شەكتەۋلى جاندارعا كورسەتىلەتىن مەديتسينالىق جاردەم ساپاسىن جوعارىلاتپاق. سونداي-اق جەتىلدىرىلگەن ەمدەۋ ءادىسى تراۆماتولوگيالىق-ورتوپەديالىق كومەكتىڭ قولجەتىمدىلىگىنە ايتارلىقتاي اسەر ەتەتىن شەبەرلىك سىنىپتارى مەن سەمينار-ترەنينگتەر ارقىلى وڭىرلەرگە جاڭا تەحنولوگيالاردى تاراتۋعا جول اشادى.
مۇگەدەكتىكتەن ساقتاپ, اۋرۋلاردى ءدال انىقتايتىن, كۇردەلى وپەراتسيالار جاساۋعا سەپتەسەتىن وزىق بىرەگەي مەديتسينالىق قوندىرعىلار تۇرعىسىندا Cobas اۆتوماتتى بيوحيميالىق تالداعىشى بيوحيميالىق تالداۋلاردى جەدەل جاساپ, پاتولوگيانىڭ بار-جوعىن ءدال انىقتاسا, Richard Wolf لاپاروسكوپيالىق حيرۋرگيا قۇرالدارى ساۋ تىندەرگە زيان كەلتىرمەي وپەراتسيا جاساۋعا مۇمكىندىك بەرەدى. Mast quadrant رەتراكتورلىق جۇيەسى ومىرتقانىڭ ءارتۇرلى بولىكتەرىنە كۇردەلى حيرۋرگيالىق وپەراتسيا جاساۋعا وڭتايلى قولجەتىمدىلىكتى قامتاماسىز ەتەدى. Sonopet IQ ۋلترادىبىستىق اسپيراتور جۇيەسى – بىرقاتار كۇردەلى وپەراتسيانى ورىنداۋعا, Tivato 700 مۋلتيديستسيپلينارلىق وپەراتسيالىق ميكروسكوپى جۇمساق تىندەردىڭ تەرەڭ اقاۋلارىن ەمدەۋ ءۇشىن تامىرلار مەن جۇيكەگە ميكروسكوپيالىق تىگىستەر تىگۋگە مۇمكىندىك بەرەدى. Humeca سىمسىز دەرماتومى كۇيىك شالعان كەزدە تەرىنى ترانسپلانتاتسيالاۋعا, ال اككۋمۋلياتورلىق كۇش جابدىقتارىنىڭ جيىنتىعى (ارا, بۇرعى) سۇيەككە جاسالاتىن كوپتەگەن وپەراتسياعا قاجەت.
ءوز كەزەگىندە ۇلتتىق عىلىمي تراۆماتولوگيا جانە ورتوپەديا ورتالىعىنىڭ ۇجىمى «سامۇرىق-قازىنا» اق كومپانيالار توبى مەن ونىڭ قايىرىمدىلىق وپەراتورى – «Samruk Kazyna Trust» قورىنا زاماناۋي ەمدەۋ ادىستەرىن ەنگىزۋگە مۇمكىندىك بەرىپ, مەديتسينالىق كومەكتىڭ قولجەتىمدىلىگىن قامتاماسىز ەتكەنى, وتاندىق مەديتسينانى دامىتۋعا قوسقان وراسان زور ۇلەسى مەن حيرۋرگيا سالاسىندا يننوۆاتسيالىق تاسىلدەردى ەنگىزگەنى ءۇشىن العىسىن ءبىلدىردى.ۇلتتىق عىلىمي ورتالىقتا كۇندەلىكتى 50-گە جۋىق وپەراتسيا, 300-گە دەيىن زەرتتەۋ, جىلىنا 8 مىڭنان استام حيرۋرگيالىق ءىس-قيمىل جاسالادى.
الدابەرگەن كەمپىرباي
