بۇل جوبا مادەنيەت جانە اقپارات مينيسترلىگىنىڭ قارجىلىق قولداۋى اياسىندا شىمكەنت قالاسىندا, تۇركىستان, قاراعاندى وبلىستارىندا قاناتقاقتى نەگىزدە قولعا الىندى. مۇنى «قورعان-م» قوعامدىق بىرلەستىگى ىسكە اسىرىپ وتىر.
بىرلەستىك مەنەدجەرى اننا ماليۋتينا ءۇش وڭىردەن 39 ءوتىنىم تۇسكەنىن ايتادى. سونىڭ ارقاسىندا تۇركىستان وبلىسى بويىنشا – 10, قاراعاندى مەن شىمكەنت ءوڭىرى بويىنشا 5 شاعىن گرانت بولىنگەن. شاعىن گرانت قۇنى – 1 ملن تەڭگە. بۇل قارجى مۇگەدەكتىگى بار ازاماتتاردى الەۋمەتتەندىرۋ, جۇمىسپەن قامتۋ ىسىنە باعىتتالادى. بىرلەستىك جاقىندا قاراعاندى وبلىسىنداعى جەڭىمپازداردى ماراپاتتادى.
شاعىن گرانتتىڭ يگىلىگى بار. وڭىرىمىزدەگى ء«ومىر سىيلا» قايىرىمدىلىق قورى – جەڭىمپازداردىڭ ءبىرى. قوردى قۇرعان مارينا بوشەل بۇل قاراجاتتىڭ ۇلكەن كومەك بولاتىنىن ايتادى. قور ەكى جىلدان بەرى قۇرىلتايشىلاردىڭ قولداۋىنىڭ ارقاسىندا جۇمىس ىستەپ كەلگەن. سوندىقتان بۇل – ولاردىڭ قول جەتكىزگەن العاشقى گرانتى.
– قور ءسۇت بەزدەرى وبىرىنا شالدىققان ايەلدەرگە كومەك بەرەدى. بۇگىندە 50-دەن استام ادام بار. مەملەكەت ول ناۋقاستاردىڭ بارىنە كومەكتەسەدى. بىراق ادام ەمنەن كەيىن ادەتتە جالعىز قالادى. ءبىز ارقايسىسىنا كومەكتەسىپ, قامقورلىق, مەيىرىم تانىتامىز. ناۋقاستاردى كاسىپكەرلىككە, تىگىنگە ۇيرەتكىمىز كەلەدى, – دەيدى مارينا بوشەل.
جاقىن كۇندەرى بالقاش قالاسىندا جاڭا يپپوتەراپيا ورتالىعى اشىلادى. گرانتتى ۇتقان مەرۋەرت قاسىموۆا قاراجاتىن سوندا جۇمسايمىن دەيدى.
– مەنىڭ جەكە كاسىبىم جىلقى وسىرۋمەن بايلانىستى. مۇمكىندىگىم بار بولعان سوڭ, ەرەكشە بالالارعا ءبىر قايىرىمدىلىق جاسايىن دەگەن نيەتپەن وسىنداي باستامانى قولعا الدىم. باستاپقىدا 2-3 بالانى قابىلداپ كورەمىن. يپپوتەراپيانىڭ وڭ اسەرى جونىندە دەرەك كوپ. گرانت قاراجاتىنا ارنايى ورىن, ەر-توقىم الۋدى جوسپارلاپ وتىرمىن, – دەيدى گرانت جەڭىمپازى.
جوباعا ۇسىنىلعان بيزنەس جوسپاردىڭ بارلىعىنىڭ ساپالى قۇرالعانىن وبلىس اكىمىنىڭ مۇگەدەكتىگى بار ادامدار ماسەلەلەرى جونىندەگى شتاتتان تىس كەڭەسشىسى نياز سۇندەتاليەۆ ايتىپ وتىر.
– وڭىردەن 9 ءوتىنىم ءتۇستى. كونكۋرستىق كوميسسيانىڭ مۇشەسى رەتىندە جەڭىمپازدى انىقتاعاندا ۇسىنىلعان جۇمىستاردىڭ ماڭىزدىلىعىنا, قاجەتتىلىگى مەن گرانت قاراجاتىن ءتيىمدى پايدالانا بىلۋىنە قارادىق. ويتكەنى مۇندا ۇلكەن جاۋاپكەرشىلىك بار, – دەيدى ول.
گرانت قاراجاتىنىڭ ءتيىمدى جۇمسالۋىنا ءتيىستى باقىلاۋ جاسالادى. جەڭىمپازدار ءار اي سايىن ەسەپ بەرەدى. ونىمەن قوسا, بيزنەس جوسپارىن ءتورت اي مەرزىم ىشىندە جۇزەگە اسىرۋى قاجەت. مۇنى قاداعالاۋ – ۇيىمداستىرۋشىلاردىڭ تىكەلەي مىندەتى, جاۋاپكەرشىلىگى.
جەرگىلىكتى ۇكىمەتتىك ەمەس ۇيىمدار مەن باستاماشىل توپتاردىڭ كومەگىمەن مۇگەدەكتىگى بار ادامداردىڭ ءومىر ءسۇرۋ ساپاسىن ارتتىرۋعا باعىتتالعان جوباعا ايماق الدىن الا جۇرگىزىلگەن بىرقاتار الەۋمەتتىك زەرتتەۋ نەگىزىندە ەنگەن. اۋەلى مۇگەدەكتىگى بار ادامداردىڭ سانى, ولاردىڭ باستى ماسەلەلەرى انىقتالىپ, جەتە زەردەلەنگەن.
– ءىرى مەگاپوليستەردە بۇل ماسەلەنىڭ شەشىلۋى جاقسى, ال شالعاي ەلدى مەكەندەردە مۇمكىندىك مۇلدە جوق. جۇمىسقا ورنالاسۋ ماسەلەسىنە كەلسەك, جۇمىس بەرۋشى مەن جۇمىسكەر اراسىنداعى قارىم-قاتىناس ءتىپتى دۇرىس ەمەس. جۇمىس بەرۋشىلەر ونداي ادامداردى جۇمىسقا العىسى كەلمەيدى. سوندىقتان ۇكىمەتتىك ەمەس ۇيىمداردى تارتۋ ارقىلى وسى ماسەلەنى قوعامعا جەتكىزگىمىز كەلەدى, – دەيدى بىرلەستىك باسشىسى.
قاراعاندى وبلىسى
