ەل پرەزيدەنتى قاسىم-جومارت توقاەۆ بىلتىرعى جولداۋىندا ءبىلىم بەرۋ جۇيەسىنە ەرەكشە ءمان بەرىپ, جاھاندىق قۇزىرەتتەردىڭ ماڭىزىن ەرەكشە اتاپ وتكەن ەدى. مەملەكەت باسشىسى سىني ويلاۋ قابىلەتى مەن بىلىمدىلىك قاسيەتى بار جاستار – ۇلت بولاشاعىن قالىپتاستىرۋداعى نەگىزگى فاكتور ەكەنىن ايتتى. جاستاردى جاڭا سىن-قاتەرلەرگە دايىنداۋ جانە ولاردىڭ الەمدىك ارەنادا باسەكەگە قابىلەتتى بولۋىن قامتاماسىز ەتۋ ءۇشىن ءبىلىم بەرۋ جۇيەسىندە كەشەندى رەفورمالار جاسالىپ جاتىر. «XXI عاسىردا ءبىلىمدى جاستاردىڭ جاڭا سىن-قاتەرلەرگە دايىن بولۋى اسا ماڭىزدى», دەگەن پرەزيدەنت ءبىلىم بەرۋدى جاڭعىرتۋدىڭ ماڭىزدىلىعىنا باسا نازار اۋدارعان بولاتىن.
وسى ورايدا بيىل Arman-PV باسپاسى «جاھاندىق قۇزىرەتتەر» اتتى ارنايى وقۋلىقتار مەن وقۋ-ادىستەمەلىك كەشەن ازىرلەدى. اتالعان جوبا 5-9 سىنىپ وقۋشىلارىنا ارنالىپ, زاماناۋي ءبىلىم بەرۋ تالاپتارىنا سايكەس دايىندالدى. وقۋلىق اۆتورلارى – ەلىمىزدىڭ بەدەلدى پەداگوگ-عالىمدارى, شەبەر ادىسكەرلەر مەن تاجىريبەلى ۇستازدار. ولار وقۋشىلاردى قازىرگى قوعامنىڭ تالاپتارىنا بەيىمدەپ, قاجەتتى قۇزىرەتتەرمەن قارۋلاندىرۋعا باعىتتايتىن ماتەريالدار ۇسىنىپ وتىر.
اتاپ ايتساق, «ەتيكا جانە ادەپ» بولىمىندە وقۋشىلار ادىلدىك پەن جاۋاپكەرشىلىكتى ۇيرەنسە, «ازاماتتىق جانە پاتريوتيزم» بولىمىنەن قوعام الدىنداعى مىندەتتەرىن تەرەڭ تۇسىنەدى. مەدياساۋاتتىلىق جانە قارجىلىق ساۋاتتىلىق جالعان اقپاراتتان قورعانۋ مەن وتباسىلىق بيۋدجەتتى ءتيىمدى باسقارۋعا باۋليدى. ء«ومىر ءسۇرۋ قاۋىپسىزدىگى» توتەنشە جاعدايلاردا ءوزىن-ءوزى قورعاۋ داعدىلارىن دامىتىپ, «ەكولوگيالىق مادەنيەت» وقۋشىلاردى تابيعي رەسۋرستاردى ۇتىمدى پايدالانۋ مەن ەكولوگيالىق جاۋاپكەرشىلىككە تاربيەلەيدى. اتالعان بولىمدەر جاس وسكىندەرگە ەلىمىزدىڭ ستراتەگيالىق ماقساتتارىنا ساي ءبىلىم بەرىپ, ونى كۇندەلىكتى ومىردە قولدانۋعا مۇمكىندىك بەرەدى.
ءبىلىم بەرۋ سالاسىندا وزىق دامىعان ەلدەردى مىسالعا الار بولساق, ماسەلەن, فينليانديا ءبىلىم بەرۋ جۇيەسى وقۋشىلاردى سىني ويلاۋ, شىعارماشىلىق جانە دەربەس شەشىم قابىلداۋ داعدىلارىنا باۋلىپ, جوعارى دەڭگەيگە كوتەردى. بۇل جۇيەنىڭ ەرەكشەلىگى – وقۋشىلاردىڭ ەركىن وي-پىكىر قالىپتاستىرۋىنا جانە شىعارماشىلىق قابىلەتتەرىن اشۋعا تولىق مۇمكىندىك بەرەدى. ال اقش پەن ۇلىبريتانيا جۇيەلەرىندە مەدياساۋاتتىلىق پەن قارجىلىق ساۋاتتىلىققا ايرىقشا كوڭىل بولىنەدى. بۇل ەلدەر وقۋشىلاردى اقپاراتتىق ورتادا دۇرىس شەشىم قابىلداۋعا, قارجىلىق ساۋاتتىلىقتى مەڭگەرۋگە ۇيرەتىپ, ولاردى جاھاندىق قوعامنىڭ بەلسەندى مۇشەلەرى رەتىندە تاربيەلەۋگە باسىمدىق بەرەدى.
قازىرگى تاڭدا وقۋشىلار جاھاندىق قۇزىرەتتەردى قوسىمشا ساباق رەتىندە ءوز قالاۋىمەن وقيدى. الايدا بۇل داعدىلاردىڭ ماڭىزدىلىعىن ەسكەرىپ, ۋاقىت وتە كەلە جاھاندىق قۇزىرەتتەردى نەگىزگى ءپان رەتىندە وقىتۋ قاجەتتىلىگى تۋىندايتىنى ايقىن. بۇل – بولاشاقتىڭ ەنشىسىندە, بىراق زاماناۋي الەمنىڭ تالاپتارى مەن وزگەرىستەرى وسى قۇزىرەتتەردى مەڭگەرۋدى مىندەتتى تۇردە قاجەت ەتەدى. سىني ويلاۋ, مەدياساۋاتتىلىق جانە قارجىلىق ساۋاتتىلىق سەكىلدى داعدىلار – بولاشاق ۇرپاقتىڭ قوعامدا ءوز ورنىن تاۋىپ, تابىستى ءومىر ءسۇرۋى ءۇشىن ەڭ ماڭىزدى قابىلەتتەردىڭ ءبىرى.
Arman-PV باسپاسىنان جارىق كورگەن وقۋلىقتار, تەك تەوريالىق بىلىممەن عانا ەمەس, پراكتيكالىق قۇزىرەتتەردى قالىپتاستىرۋعا باعىتتالعان, بۇل – جاستاردىڭ كەلەشەكتە تابىستى تۇلعا بولىپ قالىپتاسۋىنا كومەكتەسەدى. وسى قۇزىرەتتەردى مەڭگەرگەن ۇرپاق – ەلدىڭ دامۋىنا جانە ونىڭ الەمدىك ارەنادا باسەكەگە قابىلەتتى بولۋىنا ايتارلىقتاي ۇلەس قوساتىن قوزعاۋشى كۇش بولماق.
ايگۇل بەكبولاتوۆا,
Arman-PV باسپاسىنىڭ باس رەداكتورى
