سۋرەت: naryntany.kz
ولار ءبىر پەرزەنت سۇيۋگە زار بولدى. العاشقى جىلدارى ء«الى باستارىڭ جاس قوي, بوپەلى بولارسىڭدار» دەيتىن ۇلكەندەردىڭ ءسوزىن جۇبانىش تۇتىپ جۇرەتىن. كەيىن... كوپكە كورسەتپەسە دە, ەكەۋى وڭاشا قالعاندا اعىل-تەگىل جىلايتىن بولدى. ەمدەلمەگەن دارىگەر, كورىنبەگەن ءتاۋىپ قالمادى. دوس-جاراندارىنىڭ ۇل-قىزدارى ءوسىپ, ءتىپتى تۇرمىس قۇرىپ, وتاۋ كوتەرە باستادى. ال بۇلار ءبىر بالانى ارمانداۋمەن ءجۇردى. اشىق ايتپاسا دا, كوپشىلىك كەلىنشەكتى كىنالايتىنى بەلگىلى. ايەل ادام كەيدە ەركەككە قاراعاندا باتىلداۋ كەلە مە, قالاي؟
بىردە اجار قۇرمەتكە اجىراسۋ تۋرالى ويىن ايتتى.
– سەنىڭ سوڭىڭدا ۇرپاق قالۋ كەرەك. ۇلكەندەر دە نەمەرە كۇتە-كۇتە شىدامدارى تاۋسىلىپ ءبىتتى. كۇش-قايراتىڭ بار كەزدە باسقا بىرەۋمەن كوڭىل جاراستىرعانىڭ ءجون. ەكەۋمىز اجىراسايىق, – دەگەن كەلىنشەگىنىڭ سوزىنە اۋەلگىدە نە دەرىن بىلمەي قالدى.
«قالاي اجىراسامىن؟ ءوزىمنىڭ ءسۇيىپ قوسىلعان ادال جارىم ەمەس پە؟» دەپ قۇرمەت از قينالعان جوق. بىراق اجاردىڭ اقىلى دا , باتىلى دا باسىم بولىپ شىقتى. «تاڭەرتەڭ ۇلكەندەرگە وسى شەشىمدى جاريالايمىز» دەدى ول.
بالالارىنىڭ شاڭىراعى شايقالعانىن قاي اتا-انا قالاسىن, ۇل مەن كەلىننىڭ سوزدەرى ولارعا نايزاعاي سوققانداي اسەر ەتتى. نەمەرە اڭساپ جۇرگەندەرى دە راس.
– قاراعىم, كەلىن. وسىنشاما جىل الدىمىزدان قيا باسىپ وتكەن جوقسىڭ. ەشقانداي وكپەمىز جوق. قۇداي بەرمەسە, نە ىستەيمىز؟ ارالارىڭدا دانەكەر بولماعاسىن اجىراسقالى وتىرسىڭدار. مەن كورشى-قولاڭ, اعايىن-تۋىستىڭ باسىن قوسىپ, قۇدا-قۇداعايدى دامگە شاقىرىپ, ريزاشىلىعىمدى ءبىلدىرىپ, الداعى ومىرىڭە اق جول تىلەگىمدى ايتىپ, باتامدى بەرگىم كەلەدى, – دەگەن قايىناتاسى سول سوزىندە تۇرىپ, بالاسى مەن كەلىنىن سىيلاستىعى بۇزىلماعان قالپى اجىراستىردى. اجار بۇلاردى, بۇلار اجاردى قيماي قوشتاستى.
ارادا جىل وتكەندە اجار ايەلى قايتىس بولعان, جاسى ۇلكەندەۋ كىسىگە تۇرمىسقا شىقتى. ول كىسى دە بۇرىنعى ايەلىنەن پەرزەنت سۇيمەگەن ەكەن. ولار «ەكى جارتى ءبىر ءبۇتىن بولساق, اعايىننىڭ بىرەۋىنىڭ بالاسىن اسىراپ الارمىز» دەگەن ەدى. مىنە, عاجاپ! اجار كوپ ۇزاماي بويىندا وزگەرىس بارىن سەزدى. شەكەسى تورسىقتاي ۇل كەلدى ومىرگە! سەنەسىز بە, جوق پا؟ مۇنى ەستىگەن بۇرىنعى اتا-ەنەسى قاستارىنا قۇرمەتتى ەرتىپ, ارنايى قۇتتىقتاپ كەلىپ-كەتتى. سودان سوڭ كوپ ۇزاماي قۇرمەت تە ۇيلەندى. بۇل جاقتا دا كەرەمەت جاعداي ورىن الدى. جۋىردا عانا قۇرمەتتىڭ كەلىنشەگى دە ومىرگە ۇل بالا اكەلدى. عاجاپ قوي!
ەگەر... اجىراسپاي جۇرە بەرگەندە شە؟ ون بەس جىل اڭساپ كۇتكەن پەرزەنت ءسۇيۋ باقىتىنا اجىراسقاننان سوڭ يە بولعاندارىن قاراساڭىزشى! ءومىردى ءتۇسىنىپ بولمايمىز-اۋ, ءسىرا. ولار پەرزەنت ءۇشىن اجىراستى عوي. پەرىشتەلەر تىلەكتەرىن قابىل ەتكەن بولار. قالاي دەسەك تە, ولاردىڭ ەكەۋى دە ارماندارىنا جەتتى, باقىتقا كەنەلدى.
