فوتو: سەناتتىڭ ءباسپاسوز قىزمەتى
سەناتتىڭ ءباسپاسوز قىزمەتىنىڭ ءمالىم ەتۋىنشە شتاب مۇشەلەرى «پريرەچنوە اگروفيرماسى» جشس-نىڭ بازاسىندا وبلىستاعى اۋىلشارۋاشىلىق ونىمدەرىن وندىرۋشىلەرمەن جۇزدەستى. ودان بولەك, «ەيكوس» جشس-نىڭ كاسىپكەرلەرىمەن جانە قىزمەتكەرلەرىمەن, سونداي-اق, كوممۋنالدىق سەكتور كاسىپورىندارىنىڭ ۇجىمدارىمەن كەزدەسۋلەر بارىسىندا قاتىسۋشىلار ەلىمىزدە قالىپتاسقان ەكولوگيالىق تۇيتكىلدەر مەن ەنەرگيا تاپشىلىعىنا قاتىستى ماسەلەنى جۇيەلى شەشۋ قاجەت ەكەنىن ايتتى.
«پرەزيدەنتىمىز جولداۋدا اتاپ وتكەندەي, 6 قازاندا قازاقستاندا اەس سالۋ ماسەلەسىنە قاتىستى رەسپۋبليكالىق رەفەرەندۋم وتەدى. بۇگىندە بۇكىل الەم كليماتتىڭ وزگەرۋىنە بايلانىستى قيىندىقتارعا تاپ بولىپ وتىر. كۇن سايىن اۋا-رايى وزگەرىپ جاتىر. قورشاعان ورتانىڭ احۋالىن دا ءبارىمىز كورىپ وتىرمىز. بيىل قازاقستاندا بولعان الاپات سۋ تاسقىنى دا سونداي وزگەرىستەردىڭ سالدارى. مۇنداي جاعدايدا ەكولوگياعا تيگىزەتىن زالالدى ازايتاتىن جانە ەنەرگياعا زيان كەلتىرمەيتىن ءتيىمدى شەشىمدەر قاجەت», دەدى ماۋلەن اشىمباەۆ.
سونىمەن قاتار كەزدەسۋلەر بارىسىندا ەكولوگيالىق قاۋىپسىزدىك ماسەلەسىن شەشۋ كەشەندى ءتاسىلدى جانە مۇددەلى تاراپتاردىڭ قاتىسۋىن تالاپ ەتەتىنى اتاپ ءوتىلدى. ويتكەنى اتالعان سالا بارلىق ماڭىزدى باعىتپەن تىعىز بايلانىستى. وسى ورايدا عىلىمعا باعدارلانعان تاسىلگە جانە قازىرگى الەمدىك تاجىريبەنى زەردەلەۋگە ەرەكشە نازار اۋدارعان ءجون. اتاپ ايتقاندا, بۇل ىستە جاڭا تەحنولوگيالاردى زەردەلەۋ جانە وندىرىسكە يننوۆاتسيانى ەنگىزۋ قاجەت. مۇحتار اۋەزوۆ اتىنداعى پەداگوگيكالىق كوللەدجدە وتكەن كەزدەسۋدە ءبىلىم بەرۋ سالاسىنىڭ وكىلدەرى اتالعان ۇستانىمدى قولدايتىندارىن ءبىلدىردى.
