ەۋرازيالىق ەنەرگەتيكالىق كورپوراتسياسىنىڭ جانە قازاقستان ءاليۋمينيى كومپانياسىنىڭ ۇجىمدارىمەن كەزدەسۋلەردە شتاب مۇشەلەرى ەنەرگەتيكا سالاسىنداعى ماڭىزدى پروبلەمالارعا, ناقتى ايتقاندا, ونىڭ تاپشىلىعىنا جانە ەلەكتر ستانسالارىنىڭ توزۋى مەن يمپورتقا تاۋەلدىلىك ماسەلەلەرىنە جان-جاقتى توقتالدى.
سەنات توراعاسى اتاپ وتكەندەي, ءبىزدىڭ ەلىمىز جان باسىنا شاققانداعى كومىرقىشقىل گازىنىڭ شىعارىندىلارى بويىنشا الەمدە الدىڭعى ورىنداردىڭ ءبىرىن الادى. وسى ورايدا ەلىمىزدە كومىرتەگى قالدىعىن ازايتۋ ءۇشىن وندىرىسكە يننوۆاتسيانى كەڭىنەن ەنگىزۋدىڭ ماڭىزى زور. بۇل رەتتە ەلدەگى ەنەرگيا تاپشىلىعىن اۋاعا كومىرقىشقىل گازىن بارىنشا از شىعاراتىن ەنەرگيا كوزدەرى ارقىلى شەشۋ ماسەلەسى وتە وزەكتى.
«پرەزيدەنتىمىز قاسىم-جومارت توقاەۆتىڭ ماقۇلداۋىمەن 6 قازاندا ەلىمىزدە اەس سالۋ ماسەلەسىنە قاتىستى رەسپۋبليكالىق رەفەرەندۋم وتەدى. رەفەرەندۋمنىڭ ماڭىزى مەن مىندەتتەرىن جان-جاقتى ءتۇسىندىرۋ ءۇشىن حالىق شتابى قۇرىلدى. ونىڭ قۇرامىندا دەپۋتاتتار, پارتيالار مەن ءتۇرلى ۇيىمدار جانە ەل ەرتەڭىنە بەيجاي قارامايتىن بەلسەندى ازاماتتار بار. ءتۇسىندىرۋ جۇمىستارى بارلىق وبلىستا, قالادا جانە اۋىلدا كەڭىنەن جۇرگىزىلىپ جاتىر. وسى ورايدا ازاماتتارىمىزدىڭ بەلسەندىلىگى, باستاماشىلدىعى جانە ەل ەرتەڭىنە سەرگەك قارامايتىنى قۋانتادى. ءبىزدىڭ بۇگىنگى كەزدەسۋىمىز دە جەمىستى بولادى دەپ ۇمىتتەنەمىز. سونداي-اق سىزدەردىڭ ارقايسىڭىز الداعى رەفەرەندۋمعا بەلسەندى قاتىساسىزدار دەپ سەنەمىز», دەدى م.اشىمباەۆ.
سونىمەن قاتار شتاب مۇشەلەرى جاستار باستامالارىن دامىتۋ ورتالىعىندا ءوڭىردىڭ بەلسەندى جاستارىمەن كەزدەستى. سەنات توراعاسى جاس بۋىندى قولداۋ مەملەكەتتىك ساياساتتىڭ باسىم باعىتى ەكەنىن تىلگە تيەك ەتىپ, وسى سالاداعى رەفورمالاردىڭ مانىنە نازار اۋداردى. پالاتا سپيكەرى ەل بولاشاعىنا ىقپال ەتەتىن ماسەلە كۇن تارتىبىنە شىعارىلعان رەفەرەندۋمعا جاستاردىڭ بەلسەندى قاتىسۋى ماڭىزدى ءرول اتقاراتىنىن ايتتى.
شتاب مۇشەلەرى وڭىردەگى ساراپشىلار قاۋىمداستىعىمەن كەزدەسۋدە جالپىۇلتتىق رەفەرەندۋم ەلدىڭ دامۋى جولىندا شەشۋشى مانگە يە ەكەنىنە توقتالدى. سۇحبات كەزىندە اەس-ءتىڭ ەلگە بەرەر يگىلىگىن حالىققا ساپالى ءارى جان-جاقتى ءتۇسىندىرۋدىڭ ماڭىزدى ەكەنى دە ايتىلدى.
