بايقاۋدىڭ ماقساتى – جاستاردى زياتكەرلىك جانە شىعارماشىلىق تۇرعىدا دامىتۋ, سونىمەن قاتار جاستار اراسىندا سالاماتتى ءومىر سالتىن ناسيحاتتاۋ.
ءۇش باعىتقا نەگىزدەلگەن سايىستىڭ شارتى بويىنشا ءار كوماندادا 5 ادام بار. اۋەلى توپتار قازاقستان تاريحى, وتاندىق جانە الەمدىك سپورت, مادەنيەت سالاسى بويىنشا سۇراقتاردان تۇراتىن زياتكەرلىك تەست تاپسىرادى. سودان كەيىن كوماندالار سپورتتىق چەللەندجدەن ءوتۋى كەرەك. ال ءۇشىنشى كەزەڭدە ۇيىمداستىرۋشىلار بەكىتكەن بەس كىتاپ بويىنشا «IQ-buttle» اتتى ينتەللەكتۋالدى ويىنىندا ءبىلىم جارىستىرادى.
رەسپۋبليكالىق بايقاۋدىڭ ىرىكتەۋ كەزەڭىنە ەلىمىزدەگى 500-دەن استام ەلدى مەكەننەن 10 000-عا جۋىق جاس قاتىستى. ۇزدىك 20 كوماندا فينالعا جولداما الدى. قاتىسۋشىلار ءۇش كۇن بويى زياتكەرلىك جانە شىعارماشىلىق جارىستاردا باق سىناستى.
بايقاۋ قورىتىندىسىندا جەتىسۋ وبلىسىنىڭ «Tau stars» كومانداسى 1-ورىن, جامبىل وبلىسىنىڭ «شۋ جاستارى» كومانداسى 2- ورىن السا, 3-ورىندى اتىراۋ وبلىسىنىڭ «Firdaus» كومانداسى يەلەندى. جەڭىمپازدار العىس حاتتارمەن جانە اقشالاي سىيلىقتارمەن ماراپاتتالدى. بايقاۋدىڭ جۇلدە قورى – 1 600 000 تەڭگە.
