ەڭبەكقورلىقتى دارىپتەۋدىڭ ءجونى بولەك

بىرىنشىدەن, بۇل سالاعا ينۆەستيتسيا تارتۋ. بۇگىندە اگرو­ونەركاسىپكە بولىنەتىن قارا­جاتتىڭ 70%-ى – مەملەكەت تاراپىنان. كوممەر­تسيا­لىق بانك­تەر­دىڭ ۇلەسى وتە تومەن. وسى ماسە­لەنى شەشۋ كەرەك. سودان سوڭ اگروونەركاسىپ كەشەنىن تىكەلەي سۋبسيديالاۋ تاسى­لىنەن ارزان نەسيە بەرۋ تاسىلىنە بىرتىندەپ كوشۋ – اسا ماڭىزدى مىندەت. اۋىل تۇرعىندارىنا ءوز ونىمدەرىن وڭدەۋگە جانە ساتۋعا مۇمكىندىك بەرەتىن ينفراقۇرىلىم قۇرۋ دا ماڭىزدى. سونداي-اق «اۋىل اماناتى» جوباسىنىڭ اياسىندا ءار اۋداندا ازاماتتارعا ءتۇر­لى اۋىل شارۋاشىلىعى دا­قىل­دارىن ءوسىرۋدى ۇيرەتەتىن ورتا­لىق اشىلعان دۇرىس بولادى. وسىنداي جوبا «Amanat» پار­­تياسىنىڭ باستاماسىمەن جامبىل وبلىسى مەركى اۋدانىندا جۇزەگە اسىرىلدى. بۇل وزىق تا­جىري­بە رەسپۋبليكانىڭ باسقا وڭىرلەرىندە ەنگىزىلمەك.

سونىمەن قاتار مەملەكەت باسشى­سى­نىڭ  جولداۋىندا  ءبىلىم  بەرۋ ماسەلەلەرىنە ەرەكشە نازار اۋدارىلدى. بىرىنشىدەن, كەلەشەكتە ءوندىرىستىڭ قاي سالالارىندا كادرلار تاپشىلىعى ورىن الادى. وسى باعىتتا ناقتى جۇمىستار جاساۋ كەرەك. مەملەكەت قارجىسىن وندى-سولدى تاراتا بەرمەي, ماماندار دايارلاۋدا مەملەكەتتىك تاپسىرىستى قالىپتاستىرۋ تەتىگىن تۇبەگەيلى وزگەرتكەن ءجون. ءبىزدىڭ ويىمىزشا, مەملەكەتتىك تاپسىرىسقا رەسپۋبليكالىق بيۋدجەتپەن قا­تار, وڭىرلەردىڭ قاجەتتىلىگىن ەسكە­رىپ جەرگىلىكتى بيۋدجەتتەن قارا­جات بولىنگەن دۇرىس. سوندا مامانداردى ماقساتتى دايارلاۋعا مۇمكىندىك تۋادى. ول تۋرالى كوپتەن بەرى ايتىپ كەلەمىز.

ەكىنشىدەن, كەيىنگى جىلدارى تەحني­كالىق جانە كاسىپتىك ءبى­لىم سالاسىن­داعى رەفورمالار ءوز ناتيجەسىن بەرگەن جوق. سوندىقتان مەملەكەت باس­شىسى كوللەدجدە جاقسى وقى­عان تۇلەك­تەر­دى مەملەكەتتىك قىز­مەت­كە قابىلداۋ, 2025 جىلدى جۇمىسشى ماماندىقتارى جىلى دەپ جاريالاۋ, جۇمىسشى مامان­دىق­تارىن دارىپتەۋ ارقىلى قوعامدا ەڭ­بەك­قور جانە ناعىز مامان بولۋ يدەياسىن ناسيحاتتاۋدى ۇسىندى.

ۇشىنشىدەن, اتا-انالار جەكە­مەن­شىك مەكتەپتەرگە مەملەكەت تاراپىنان جاسالىپ جاتقان جاع­دايلار مەن كومەكتى بىلە بەرمەيدى. سوندىقتان ازاماتتارمەن كەرى بايلانىستى كۇشەيتۋ كەرەك.

ارينە, حالىقتىڭ اراسىندا اتوم ەلەكتر ستانسانىڭ قۇرىلىسى دا قىزۋ تالقى­لانىپ جاتىر. بۇل ماسە­لەگە بايلانىستى وسى كەزگە دەيىن كوپتەگەن قوعامدىق تال­قى­لاۋ جيىنى ءوتتى. ەندى 6 قازاندا بولا­تىن جالپىۇلتتىق رەفەرەندۋم ناتي­­جەسىمەن حالىقتىڭ پىكىرى ارقىلى بۇل ما­سە­­لەنىڭ ارى قاراي­عى تاعدىرى شەشىل­مەك.

مەنىڭ بازالىق ءبىلىمىم – فيزيكا. كانديداتتىق جانە دوكتورلىق ديسسەرتا­تسيامدى ەكولوگيالىق ءبىلىم بەرۋ, ەكولو­گيالىق تاربيە, جاستاردىڭ ەكولوگيالىق ساۋاتى مەن مادەنيەتىن قالىپتاستىرۋ ماسەلەلەرى بويىنشا قورعادىم. ەگەر تارازىعا سالىپ, اەس-ءتىڭ ەكولوگيالىق, ەكونوميكالىق, تەح­نو­لوگيالىق, الەۋ­مەتتىك, گەو­سايا­سي ارتىقشىلىقتارىن ساراپ­تاپ قاراساق, اەس ەلىمىزدىڭ بولا­شاعى ءۇشىن كەرەك.

ۇلتتىق ەكونوميكانىڭ دامۋى ەنەرگيامەن تولىق قامتاماسىز ەتىلۋىنە بايلانىستى. ارينە, حا­لىقتى مازالايتىن قاۋىپسىزدىك ماسە­لەلەرىن ءبىرىنشى كەزەكتە جۇيە­لى تۇردە شەشۋ قاجەت.

جالپى, مەملەكەت باسشىسى جول­داۋىندا بۇگىنگى تاڭداعى كۇردەلى ماسە­لەلەردى اشىپ كور­سەتتى. بارلىعىمىز جاقسى ءومىر سۇرگەندى قالايمىز. ولاي بولسا, قولىمىزدان كەلگەنشە پرەزي­دەنتتى قولداپ, تاپسىرمالارىن ىسكە اسىرۋ قاجەت.

ماحمەتعالي سارىبەكوۆ,

شەرحان مۇرتازا اتىنداعى حالىقارالىق تاراز يننوۆاتسيالىق ينستيتۋتىنىڭ رەكتورى