داعدارىس تونگەندە باسشىلاردىڭ قالاي دۇرىس قيمىلدار جاساۋ كەرەكتىگى تۋرالى مەديتسينالىق تەحنولوگيالار جانە اقپاراتتىق جۇيەلەر ورتالىعىنىڭ ساراپشىسى ءارى پرەزيدەنتى اسحات ءاشىموۆ اڭگىمەلەپ بەردى. بۇل ورتالىق 12 جىلدان استام ۋاقىتتان بەرى ءپىب جۇيەسىنىڭ قىزمەتكەرلەرىن جاڭا داعدىلارعا, ونىڭ ىشىندە كوشباسشىلىققا جانە كوممۋنيكاتسيالارعا وقىتادى.
كوشباسشىلار داعدارىستاردى قالاي ەڭسەرەدى؟
شەشىمدى جەدەل قابىلداۋ
داعدارىس جاعدايىندا ۇزاق ويلانۋعا ۋاقىت جوق. قولدا بار اقپاراتقا سۇيەنە وتىرىپ, جىلدام شەشىم قابىلداۋعا قابىلەتتى كوشباسشىلار جاقسى ناتيجەلەر كورسەتەدى. بۇل رەتتە شەشىمنىڭ جىلدامدىعى مەن ساپاسىن تەڭگەرە ءبىلۋ اسا ماڭىزدى.
سونداي-اق, ءوز ارەكەتىڭە سەنىمدى بولۋ كەرەك. Gallup زەرتتەۋىنشە, داعدارىس كەزىندە اشىقتىق پەن سەنىمدىلىك تانىتا بىلگەن كوشباسشىلار قىزمەتكەرلەردىڭ الاڭداۋشىلىعىن 50%-عا دەيىن تومەندەتە الادى, ال بۇل كوماندانىڭ ىنتاسى مەن تيىمدىلىگىنە تىكەلەي ىقپال ەتەدى.
بەيىمدەلۋشىلىك جانە يكەمدىلىك
كوشباسشىنىڭ جاڭا جاعدايداعى ستراتەگياعا جىلدام بەيىمدەلۋى – ساتتىلىكتىڭ باستى فاكتورلارىنىڭ ءبىرى. داعدارىس جاعدايىندا ادەتتەگى ءادىس-تاسىلدەرگە ارقا سۇيەۋگە بولمايدى, سوندىقتان وزگەرىستەرگە دايىن بولۋ ماڭىزدى داعدىعا اينالادى.
ءتيىمدى كوممۋنيكاتسيا
داعدارىس ۋاقىتىندا كومانداداعى قارىم-قاتىناستا ادالدىق تانىتۋ ماڭىزدى. بۇل جاعداي تىم قيىن بولا باستاعان كەزەڭدە دە سەنىمدى ساقتاپ, قىزمەتكەرلەردى ىنتالاندىرۋعا كومەكتەسەدى.
Deloitte مالىمەتىنشە, قىزمەتكەرلەردىڭ 78%-ى كوشباسشىلاردىڭ داعدارىس كەزىندەگى ۋاقىتىلى ءارى ساپالى كوممۋنيكاتسياسى كومپانيا ىشىندەگى سەنىم مەن سەنىمدىلىكتى ارتتىرۋعا كومەكتەسەتىنىن مالىمدەگەن.
مەديتسينالىق تەحنولوگيالار جانە اقپاراتتىق جۇيەلەر ورتالىعىنىڭ ترەنەرى داعدارىستى ءساتتى باسقارۋ كەشەندى ءتاسىلدى تالاپ ەتەتىنىن ايتادى.
«داعدارىس ۋاقىتىنداعى كوشباسشىنىڭ ەڭ ماڭىزدى مىندەتى – پروبلەمالارعا قاتىستى جىلدام ارەكەت ەتۋ عانا ەمەس, سونىمەن قاتار كوماندانىڭ ەموتسيونالدى تۇراقتىلىعىن ساقتاۋ بولىپ تابىلادى», – دەيدى ساراپشى.
داعدارىسقا قارسى باسقارۋ جوباسى: ول نە ءۇشىن قاجەت؟
ساراپشىنىڭ ايتۋىنشا, ۇيىمدارعا داعدارىستى ەڭسەرۋگە كومەكتەسەتىن نەگىزگى قۇرالداردىڭ ءبىرى – داعدارىسقا قارسى باسقارۋ جوسپارى بولىپ تابىلادى. مۇنداي جوسپاردىڭ بولماۋى اۋىر سالدارلارعا, ءتىپتى ابىرويدىڭ جوعالۋى مەن قىزمەتكەرلەردىڭ ىشكى رۋحىنىڭ السىرەۋىنە جانە بيزنەس ناتيجەلەرىنىڭ ناشارلاۋىنا اكەلۋى مۇمكىن.
PwC مالىمەتىنشە, داعدارىستىق كوشباسشىلىق باعدارلاماسى جاقسى ازىرلەنگەن كومپانيالار ەكونوميكالىق داعدارىس كەزىندە مۇنداي باعدارلاماسى ءالسىز بولعان نە ءتىپتى بولماعان كومپانيالارعا قاراعاندا 20%-عا كەم شىعىنعا باتقان.
ازىرلەنگەن جانە ەنگىزىلگەن داعدارىستىق مەنەدجمەنت جوسپارى كەلەسىلەرگە مۇمكىندىك بەرەدى:
- كليەنتتەر جانە كاسىبي قوعامداستىق اراسىندا ابىرويدى ساقتاۋ;
- كومپانيا قىزمەتكەرلەرىنىڭ ىشكى رۋحىن كۇشەيتىپ, سەنىمدىلىك ۇيالاتۋ;
- رولدەر مەن ارەكەتتەردىڭ انىق بولۋىنىڭ ارقاسىندا داعدارىس ۋاقىتىندا جانە ودان كەيىن جۇمىستىڭ ناتيجەلىلىگىن ارتتىرۋ.
جوسپار بىرنەشە كەزەڭدى قامتۋى كەرەك:
- داعدارىستىق جاعدايلاردى ساناتتارعا ءبولۋ. كومپانياعا ءتان داعدارىستاردىڭ تۇرلەرىن جانە ولاردىڭ الەۋەتتى ىقپالىن انىقتاۋ.
- داعدارىستىڭ ءاربىر ءتيپى ءۇشىن ارەكەتتەردى ازىرلەۋ. ءاربىر داعدارىستىق جاعدايدى ەڭسەرۋگە قاجەت قادامداردى تولىققاندى سيپاتتاپ شىعۋ.
- نەگىزگى قىزمەتكەرلەردى تاعايىنداۋ. داعدارىس جاعدايىندا جوسپاردى جۇزەگە اسىرۋعا جاۋاپتى ادامداردى انىقتاۋ.
- كوماندانى اقپاراتتاندىرۋ. داعدارىستىق مەنەدجمەنتكە قاتىساتىن قىزمەتكەرلەردى وقىتۋ جانە اقپاراتتاندىرۋ
قازىرگى زاماناۋي الەمدە داعدارىستىق باسقارۋ كوشباسشىلىقتىڭ اجىراماس بولىگىنە اينالىپ كەلەدى. تەز بەيىمدەلۋ قابىلەتى, كوماندامەن ءتيىمدى كوممۋنيكاتسيا قۇرىپ, ونى قولداۋ – كوشباسشىنى ەڭ قيىن جاعدايلاردا دا تىعىرىقتان الىپ شىعاتىن ماڭىزدى قاسيەتتەر. داعدارىسقا دايىندىق جانە بۇل داعدىلاردى ۇنەمى جەتىلدىرۋ ارقىلى كوشباسشىلار قيىندىقتاردى جەڭىپ قانا قويماي, كومپانيانىڭ ودان ءارى قاراي ءوسۋى مەن دامۋىنا جول اشادى.
