سايلاۋدىڭ الدىن الا قورىتىندىلارى جاريالاندى

كەشەگى وتكەن ءباسپاسوز ءماسليحاتىندا ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ پرەزيدەنت سايلاۋىنىڭ الدىن-الا قورىتىندىلارىن جاريالادى. ول بويىنشا قازاقستان حالقىنىڭ 95,22 پايىزى سايلاۋعا كەلىپ, داۋىس بەرگەن. مەملەكەت باسشىسىن سايلاۋعا ەلەكتوراتتىڭ وتە بەلسەندى تۇردە قاتىسقانىن ق.تۇرعانقۇلوۆ ايرىقشا اتاپ ءوتتى. «ەگەمەن قازاقستان تاريحىندا ءبىرىنشى رەت سايلاۋشىلار وزدەرىنىڭ ازاماتتىق ۇستانىمىن, ەلەكتوراتتىق بەلسەندىلىگىن جانە ەلدىڭ بولاشاعى ءۇشىن ساياسي جاۋاپكەرشىلىگىن ايقىن كورسەتتى. وسىعان, سونداي-اق, سايلاۋ ناۋقانىن ۇيىمداستىرۋ دەڭگەيىنىڭ ارتقانىنا ءبىرىنشى كەزەكتە بايقاۋشىلار مەن ساراپشىلار وزدەرىنىڭ تۇسىنىكتەمەلەرىندە كوڭىل اۋداردى», دەدى توراعا. مۇنىمەن قاتار ول وبلىستىق, استانا جانە الماتى قالالىق سايلاۋ كوميسسيالارىنان كەلىپ تۇسكەن جەدەل دەرەكتەر نەگىزىندە سايلاۋدىڭ الدىن-الا قورىتىندىلارىنىڭ انىقتالعانىن دا جەتكىزدى. ونداعى اقپاراتقا زەر سالساق, ورتالىق سايلاۋ كوميسسياسىنا سول ۋاقىتقا دەيىن كەلىپ تۇسكەن سايلاۋشىلار داۋىسى كەلەسىدەي بولىپتى. ابىلعازى قالياقپار ۇلى قۇسايىنوۆقا سايلاۋشىلاردىڭ – 0,7 پايىزى, نۇرسۇلتان ءابىش ۇلى نازارباەۆقا – 97,7 پايىزى, تۇرعىن ىسقاق ۇلى سىزدىقوۆقا 1,6 پايىزى داۋىس بەرىپتى. وسىنداي جاعىمدى جاڭالىقتى جاريالاعان ورتالىق سايلاۋ كوميس­سياسىنىڭ توراعاسى, ءالى دە اۋماقتىق سايلاۋ كوميسسيالارى حاتتامالارىنىڭ كەلىپ تۇسۋىنە قاراي بۇل دەرەكتەر الداعى ۋاقىتتا تاعى دا ناقتىلاناتىنىن تاپتىشتەدى. بۇعان زاڭ بويىنشا ەكى كۇندىك مەرزىم بەرىلەدى ەكەن. «سايلاۋ تۋرالى» زاڭعا سايكەس 26 ساۋىردە وتكەن قازاقستان رەسپۋبليكاسىنىڭ پرەزيدەنتىن سايلاۋدىڭ سوڭعى ناتيجەسىن ورتالىق سايلاۋ كوميسسياسى سايلاۋدان كەيىن جەتى كۇن مەرزىمنەن, ياعني 2015 جىلعى 3 مامىردان كەشىكتىرمەي جاريالاۋى ءتيىس», دەدى ق.تۇرعانقۇلوۆ. نۇرباي ەلمۇراتوۆ, «ەگەمەن قازاقستان».