سۋرەتتەردى تۇسىرگەن – اسىلبەك ناسىپقالي
بۇدان بۇرىن وبلىستا «قالادان – اۋىلعا!» كەشەندى باعدارلاماسى قولعا الىنعانىن حابارلاعان ەدىك. قازتالوۆ اۋدانىندا وسى باستاما قارقىندى ءجۇرىپ جاتىر. مىنە, بولاشاق اۋىلدىق وكرۋگىنىڭ جاڭاتاڭ جانە كوپكۇتىر ەلدى مەكەندەرىندە 4 وتباسى جاڭا باسپاناعا يە بولدى.
– وڭىردە مەملەكەت باسشىسىنىڭ تاپسىرماسىمەن بىرقاتار ينفراقۇرىلىمدىق جوبا, مەملەكەتتىك باعدارلاما, وڭىرلىك باعدارلامالار دا جۇيەلى جۇزەگە اسىپ جاتىر. سونىڭ ىشىندە «قالادان – اۋىلعا!» جوباسى اۋىلداردى دامىتۋعا سەپ بولدى, جاس وتباسىلارعا دا ۇلكەن قولداۋ. باعدارلاما اياسىندا قازتالوۆ اۋدانىنا كوشىپ كەلگەن جاس وتباسىلاردى قۇتتىقتايمىن. شاڭىراقتارىڭىز بەرەكەلى بولىپ, قۋانىش پەن شاتتىققا تولسىن! — دەدى وبلىس اكىمى تۇرعىن ءۇي كىلتىن سالتاناتتى تۇردە تابىستاپ تۇرىپ.
ايتا كەتەيىك, ءدال وسى جوبا اياسىندا اۋداندا 16 تۇرعىن ءۇي ساتىپ الىنعان. بۇگىنگە دەيىن اۋىلدارعا 14 شاڭىراق كوشىپ كەلىپ, ورنالاسىپتى. وسى وتباسىلاردا 78 جان بولسا, سونىڭ 50-ءى بالا ەكەن. بارلىق وتباسى تۇراقتى جۇمىسپەن قامتىلىپ, مەكتەپ جاسىنداعى 24 بالا مەكتەپكە, 25 بالا بالاباقشاعا ورنالاسقان.
– ءبىز وسى باعدارلاما ارقىلى جاڭاتاڭ اۋىلىنا بيىلعى اقپان ايىنىڭ باسىندا كوشىپ كەلدىك. قالادان كەلگەن بويدا باسىمىزعا ۋاقىتشا تۇرعىن ءۇي بەردى, قورامىزعا سيىر مەن قوي-ەشكى كىرگىزدى. قازىر سول ءتورت ت ۇلىكتىڭ يگىلىگىن كورىپ وتىرمىز. جولداسىم ايات ەكەۋمىز تۇراقتى جۇمىسقا ورنالاستىق. وسى ءۇيدىڭ قۇرىلىسىنا دا كۇيەۋىم ءوزى اتسالىستى. قۇشاق جايا قارسى العان اۋىل حالقىنا العىسىمىز شەكسىز, – دەيدى سۋ جاڭا ۇيگە كىرگەن شىناراي تورەمۇراتوۆا.
قايىڭدى اۋىلى اۋدان ورتالىعىنا ەداۋىر قاشىق ورنالاسقان. اۋىل تۇرعىندارى مادەنيەت وشاعى كەرەكتىگىن ءجيى ايتىپ ءجۇرۋشى ەدى. حالىقتىڭ تالاپ-تىلەگى ورىندالىپ, زامان تالابىنا ساي رۋحاني كەشەن ەسىگىن ايقارا اشتى. «اۋىل – ەل بەسىگى» باعدارلاماسى اياسىندا سالىنعان مادەنيەت ۇيىندە 150 ورىندىق كورەرمەن زالى بار, اۋىلدىق كىتاپحانا دا وسىندا ورنالاسقان.
– سوڭعى جىلدارى وڭىردە, اۋدان-اۋىلداردا جاڭادان ءبىلىم وردالارى مەن مادەنيەت ۇيلەرى كوپ سالىنىپ جاتىر. قايىڭدى اۋىلىنداعى مادەنيەت ءۇيىنىڭ جوباسىن وزگە دە ەلدى مەكەندەردە جۇزەگە اسىرامىز. الداعى ۋاقىتتا قازتالوۆ پەن قايىڭدى باعىتىندا جول سالۋدى دا ويلاستىرىپ جاتىرمىز, – دەپ قۋانتتى ناريمان تورەعاليەۆ اۋىل تۇرعىندارىن.
جوعارىدا اتالعان 8 ءۇيدىڭ تورتەۋى قالادان اۋىلعا كوشىپ كەلگەن وتباسىلارعا بەرىلسە, قالعان 4 باسپانا ءۇي كەزەگىندە تۇرعان مۇقتاج ازاماتتارعا تابىستالدى. جالپى اۋدان بويىنشا بيىل پرەزيدەنت تاپسىرماسىنا سايكەس 28 ەلدى مەكەندە ءۇي كەزەگىندە تۇرعان الەۋمەتتىك وسال توپتاعى وتباسىلارعا ارناپ قوس پاتەردەن 116 ۇيگە قارجى ءبولىنىپ, قۇرىلىس جۇرگەن ەدى. مىنە, سول ۇيلەر قازىر ءوز يەسىن تاۋىپ جاتىر.
– بۇگىن پرەزيدەنتىمىز قاسىم-جومارت كەمەل ۇلىنىڭ باستاماسىمەن اۋىل-ايماقتاردى دامىتۋ بويىنشا بەرىلگەن تاپسىرماسىنىڭ ارقاسىندا باسپانالى بولدىق. وسى باعدارلامانىڭ جۇزەگە اسۋىنا اتسالىسقان بارشا ازاماتقا جانە جاڭا باسپانا سالىپ بەرگەن مەردىگەرگە ريزاشىلىعىمدى بىلدىرەمىن, – دەيدى قازتالوۆ اۋىلىنىڭ تۇرعىنى ارايلىم سانسىزباەۆا.
ءدال وسى كۇنى اۋدان ورتالىعىندا 320 ورىندىق سپورت كەشەنىنىڭ قۇرىلىسى اياقتالىپ, پايدالانۋعا بەرىلدى. نىساننىڭ اشىلۋ سالتاناتىنا وبلىس اكىمى ناريمان تورەعالي ۇلى, اۋدان اكىمى اسلانبەك سارقۇلوۆ, وبلىستىق ءماسليحات دەپۋتاتتارى تۇراربەك تىلەمىس ۇلى, سامات حامزا ۇلى, «كپو ب.ۆ.» كومپانياسى باس ديرەكتورىنىڭ ورىنباسارى مۇحتار مانكەەۆ قاتىستى. ءبىراز جىلدان بەرى قۇرىلىسى تۇرىپ قالعان نىساننىڭ اقىرى حالىق يگىلىگىنە جاراعانىنا ەل-جۇرت ريزا. سپورت كەشەنىندە ۆولەيبول, فۋتزال, باسكەتبول ويىندارىنا ارنالعان زال جانە بوكس, دزيۋدو, كۇرەس, جاتتىعۋ زالدارى بار. ەندى بۇل جەردە اۋىل بالالارىنا ءتۇرلى سپورتتىق سەكتسيا اشىلىپ, جۇمىس ىستەيدى.
باتىس قازاقستان وبلىسى
