مەملەكەت باسشىسى ۇلتتىق قۇرىلتايدا سويلەگەن سوزىندە: «شىن مانىندە, وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك», دەگەن بولاتىن. بيىل ەكىنشى مارتە ءوتىپ جاتقان قازتالوۆتىق كىتاپقۇمارلار سايىسىنا قاراپ, پرەزيدەنتتىڭ تاپسىرماسى شالعايداعى اۋداندا شىن مانىندە جۇزەگە اسىپ جاتقانىن كوردىك.
بيىل بايقاۋ ەرەجەسىندە وزگەرىس بار ەكەن. وقۋشىلاردىڭ جاس ەرەكشەلىگى, وقۋ دەڭگەيى ەسكەرىلىپ, 5–7 جانە 8–11 سىنىپ وقۋشىلارىنا ارنالعان كىتاپتار ءتىزىمى بەكىتىلگەن. جۇلدە قورى دا مولايىپ, 2 ملن تەڭگە بولعان. بايقاۋ تەست جانە اڭگىمەلەسۋ سىندى ەكى كەزەڭنەن تۇردى. وقۋشىلار جاز بويى وقىعان كىتاپتارىن ەسكە ءتۇسىرىپ, رۋحاني سىنعا ءتۇستى.
«مەن وقىعان 30 كىتاپ» بايقاۋى اۋدانىمىزدا ەكىنشى مارتە ءوتىپ جاتىر. بۇل – بىلىمگە قانات قاققان وقۋشىنى جىگەرلەندىرىپ, زيالى ۇلت قالىپتاستىرۋعا سەپتىگىن تيگىزەتىن ءداستۇرلى جوبا. رۋحانياتىمىزدى كەمەلدەندىرىپ, ۇرپاعىمىزدىڭ زەيىنىن اشىپ, تالابىن شىڭداۋعا, اۋىل بالالارىنىڭ كىتاپقا قۇمارلىعىن ارتتىرۋعا قولداۋ كورسەتكەنى ءۇشىن ۇستازدارعا, كىتاپحاناشىلارعا, اتا-انالارعا ريزاشىلىعىمدى بىلدىرەمىن», دەيدى اۋدان اكىمىنىڭ ورىنباسارى سەرىك قايىرليەۆ.
بايقاۋ قورىتىندىسىنا سايكەس قازىلار شەشىمىمەن كىتاپقۇمارلاردىڭ كىشى توبىندا قاراوزەن مەكتەپ-ليتسەيىنىڭ وقۋشىسى رامينا تىلەمىسوۆا باس جۇلدەگە يە بولسا, ءىى ورىندى قاراوزەندىك ايشا راحيموۆا جەڭىپ الدى. ءىىى ورىندى قاراوزەندىك ءسانىم تۇراربەك پەن قاراوبالىق ءازيزا ەرەجەپ ءبولىستى.
ال 8–11 سىنىپ وقۋشىلارى اراسىنداعى دودادا تەرەڭكول مەكتەپ-بوبەكجايىنىڭ وقۋشىسى نۇرايىم راحمەتكە ەشكىم تەڭ كەلمەدى. قازتالوۆ مەكتەپ-ليتسەيىنىڭ وقۋشىسى باحتيار تولياتي – ءىى ورىن, قاراوزەن مەكتەپ-ليتسەيىنىڭ وقۋشىسى اياۋلىم تىلەپبەرگەن مەن بوستاندىق ورتا مەكتەبىنىڭ وقۋشىسى ايمان ماركس ءىىى ورىنعا تابان تىرەدى.
بايقاۋ جەڭىمپازدارى قارجىلاي سىيلىققا يە بولدى. اتاپ ايتساق, ءى ورىن ءۇشىن – 300 مىڭ, ءىى ورىن ءۇشىن – 200 مىڭ, ءىىى ورىن ءۇشىن – 100 مىڭ تەڭگە بۇيىردى. ال قالعان قاتىسۋشىلار 30 مىڭ تەڭگەلىك ىنتالاندىرۋ سىيلىعىن قاناعات تۇتتى.
«مەن وقىعان 30 كىتاپ» بايقاۋى كانيكۋل كەزىندە وقۋشىعا بەرىلگەن تاپسىرما دەسە دە بولادى. ءبىر بايقاعانىم, قازتالوۆتىق وقۋشىلار ەرەسەكتەردىڭ ەسكەرتۋىنسىز-اق كىتاپ وقۋعا قۇشتار ەكەن. وقۋشىلاردىڭ, ۇل-قىزدارىمىزدىڭ ينتەللەكتۋالدىق دارەجە دەڭگەيىن كوتەرەتىن مۇنداي باستامانى وبلىس, ءتىپتى قازاقستان بويىنشا ناسيحاتتاۋ قاجەت», دەيدى پرەزيدەنت جانىنداعى ۇلتتىق قۇرىلتاي مۇشەسى, جازۋشى-جۋرناليست, «ورال ءوڭىرى» وبلىستىق قوعامدىق-ساياسي گازەتىنىڭ باس رەداكتورى, قازاقستان جازۋشىلار وداعىنىڭ باتىس قازاقستان وبلىسىنداعى وكىلى باۋىرجان عۇبايدۋللين.
باتىس قازاقستان وبلىسى
