ساتباەۆ قالاسىندا بيىل ءتورتىنشى مارتە وتكىزىلگەن «ۇزدىك اۋلا» بايقاۋى تۇرعىنداردىڭ وزدەرى تۇراتىن اۋماقتاعى سانيتارلىق تازالىقتى ساقتاۋعا اتسالىسۋىنا ىقپالىن تيگىزە باستادى. ويتكەنى جىل ساناپ بايقاۋعا قاتىسۋشىلار قاتارى كوبەيىپ كەلەدى.
بيىل بايقاۋعا 15 اۋلانىڭ تۇرعىندارى قاتىستى. سولاردىڭ اراسىنان وزىق شىققاندارعا ارنايى سىيلىقتار بەرىلدى. «جاسىل اۋلا» اتالىمى بويىنشا قالاداعى ەردەن كوشەسى, 193-ءۇيدىڭ تۇرعىندارى «جەڭىمپاز» دەپ تانىلدى. ويتكەنى ءۇي اۋلاسى جاسىل جەلەككە ورانعان, ءارتۇرلى گۇلدەر كوز تارتادى. مۇنداي جەردىڭ تازالىعى دا تاماشا بولاتىنى ايتپاي-اق بەلگىلى. ولارعا بەينەباقىلاۋ كامەراسى سىيعا تارتىلدى. ناق وسىنداي بەينەكامەراعا گۋربا كوشەسى, 99-ءۇيدىڭ تۇرعىندارى دا «قالانىڭ وركەندەۋىنە قوسقان ۇلەسى ءۇشىن» اتالىمى بويىنشا يە بولدى. «ميب جانە جس ۇزدىك قىزمەتكەرى» دەپ تانىلعان «قايسار» جەكەمەنشىك پاتەر يەلەرى كووپەراتيۆىنە دانەكەرلەۋ اپپاراتى تابىستالدى. «جايلى كىرەبەرىس» اتالىمىنىڭ جەڭىمپازى اتانعان تاۋەلسىزدىك داڭعىلى, 55-ۇيگە جاڭا ۇلگىدەگى شاڭسورعىش بەرىلدى. اباي كوشەسى, 65-ءۇيدىڭ تۇرعىندارى بيىلعى بايقاۋدىڭ باستى بايگەسىن – تەلەديداردى جەڭىپ الدى.
جەڭىمپازداردى ماراپاتتاپ, سىيلىقتاردى تابىستاعان قالا اكىمى مۇرات بورىباەۆ «قالاعا دەگەن سۇيىسپەنشىلىك – اۋلانى تازا ۇستاۋدان باستالادى» دەپ بەكەر ايتىلماعان. شىن مانىندە سولاي. تازالىقتى ساقتاۋ, سوعان ۇمتىلۋ – تاربيەنىڭ, مادەنيەتتىڭ ءبىر ءتۇرى. سوندىقتان ءۇيدىڭ كىرەبەرىسىنەن باستاپ, ونىڭ تازالىعىن ساقتاۋدى ءوز مىندەتى سانايتىن, قالامىزدىڭ دامۋى مەن وركەندەۋىنە ەلەۋلى ۇلەس قوساتىن بارلىق بەلسەندى جانە بەيجاي قارامايتىن قالا تۇرعىندارىنا زور العىسىمدى بىلدىرەمىن», دەدى.
بايقاۋ كەلەسى جىلى دا جالعاسىن تاباتىن بولادى.
ۇلىتاۋ وبلىسى,
ساتباەۆ قالاسى
