ەلىمىزدە بىرلىگىمىز بەن ىنتىماعىمىزدى كورسەتەتىن, ەرتەڭگە دەگەن سەنىمدى نىعايتاتىن, كەشە مەن بۇگىندى ساباقتاستىرا وتىرىپ, بولاشاققا قاراي نىق قادام باسۋعا جىگەر بەرەتىن ىرگەلى ىستەر جەتكىلىكتى. ولاردىڭ بارلىعىن تىزبەكتەپ شىعۋ ۇزاق ءارى تاۋسىلمايتىن اڭگىمە. اسىرەسە, سوڭعى كەزدەرى قولعا الىنعان قىرۋار جۇمىستار ەلىمىزدىڭ بيىك بەلەستەرگە كوتەرىلۋىنە, جاڭا سيپاتتا دامۋىنا زور ىقپالىن تيگىزىپ وتىرعانىنا ەشكىم داۋ ايتا قويماس.
قازاقستاننىڭ ىشكى تۇتاستىعى, اۋىزبىرشىلىگى تالايدىڭ اۋزىندا ءجۇر. بۇل وزگەلەر ۇلگى تۇتار جاسامپاز ىستەردىڭ قاينار كوزىنە اينالعان جۇرتىمىزدىڭ الەۋەتىنە قىزىعا ءارى قىزعانا قارايتىندار قاتارى كۇن وتكەن سايىن كوبەيىپ كەلە جاتقانىن بىلدىرسە كەرەك. كۇنى كەشە, ياعني, پرەزيدەنتتىك سايلاۋ وتكەن 26 ءساۋىر كۇنى الەم حالقى ىنتىماقتى تۋ ەتىپ, تۇعىرىندا تۇلعالانا تۇسكەن, تاتۋلىعىن مىزعىماستاي ەتىپ بەكىتىپ, بەرەكەسىن بىرلىكتەن تاپقان ەل ەكەنىمىزگە تاعى ءبىر رەت كوز جەتكىزدى.
حالىق ويىنىڭ ءوز كوشباسشىسىن تاڭداۋ ساتىندە ءبىر نۇكتەدە توعىسۋى جاقسىلىقتىڭ بەلگىسى, ەلدىك سانانىڭ وسكەنى, ىرگەنىڭ نىعايعانى, شاڭىراقتىڭ بيىكتەي تۇسكەنى. نەگىزىندە, ەل ىنتىماعىن ايعاقتايتىن نىشان كوپ. ال سونىڭ ىشىندەگى جول باستار ازاماتىن قاپىسىز تانىپ, وعان داۋلەت تىزگىنىن ۇسىنۋدا ۇيىمشىلدىق تانىتا ءبىلۋ ءىسى بىرلىكتىڭ شىنايى سيپاتىن كورسەتەدى.
كەشە استانا تورىندەگى «سارىارقا» ۆەلوترەگىندە مەملەكەت باسشىسى نۇرسۇلتان نازارباەۆتىڭ قاتىسۋىمەن «جەڭىمپازدار فورۋمى» بولدى. ونىڭ نە ءۇشىن ءوتكىزىلگەنىن تاپتىشتەپ ءتۇسىندىرىپ جاتۋ ارتىق شىعار. دەگەنمەن, شارانىڭ كەزەكتەن تىس پرەزيدەنتتىك سايلاۋدا جەڭىسكە جەتكەن ەلباسى نۇرسۇلتان نازارباەۆقا قوشەمەت كورسەتۋ ماقساتىندا ۇيىمداستىرىلعانىن ايتا كەتەلىك.
جيىن بارىسىندا قازاقستاندىق ەسترادا جۇلدىزدارى كونتسەرت بەردى. ەلباسىنا دەگەن ىستىق ىقىلاستارىن ءبىلدىرۋ ءۇشىن ۆەلوترەككە 8 مىڭنان استام ادام جينالدى. ولاردىڭ اراسىندا بەلگىلى قوعام جانە مادەنيەت قايراتكەرلەرى, تانىمال سپورتشىلار, زيالى قاۋىم وكىلدەرى جانە قاراپايىم ازاماتتار بولدى.
جالپى, بۇل شاراعا قاتىسقان جۇرتشىلىق «جەڭىمپازدار فورۋمىنىڭ» وتكىزىلۋىن سايلاۋدا باعى جانعان ەلباسى مەن ونىڭ كومانداسىنا عانا ەمەس, سونىمەن قاتار, بارشا قازاقستاندىقتاردىڭ جەڭىسى قۇرمەتىنە باعىتتالعانىن ۇعا ءبىلدى.
تاعى ءبىر ەرەكشە ىلتيپاتپەن اتاپ وتەر جايت, فورۋمعا اقجارما كوڭىلمەن, شىنايى نيەتپەن كەلگەن حالايىق كۇنى كەشە وتكەن سايلاۋدا قازاقستان حالقى جارقىن بولاشاققا باستار جولدى جاڭىلىسپاي تاڭداعانىن, دۇرىس شەشىم قابىلداعانىن, قيىس پيعىلعا جول بەرىلمەگەنىن شىنايى پەيىلدەرىمەن ايتۋمەن بولدى.
قوشەمەتكە بولەنگەن مەملەكەت باسشىسى جۇرت الدىندا ءوزىنىڭ رياسىز كوڭىلىنەن شىققان العىسقا تولى, ءماندى دە ماڭىزدى ءسوزىن ارنادى:
– قۇرمەتتى حالقىم! قازاقستاندىقتار! بۇگىن ەلىمىز ءۇشىن تاعى ءبىر ۇمىتىلماس تاريحي كەزەڭ جازىلدى. وزدەرىڭىزگە بەلگىلى, جاڭا عانا ورتالىق سايلاۋ كوميسسياسى مالىمدەمە جاسادى. ەلىمىزدىڭ 95 پايىزدان ارتىق سايلاۋشىلارى قاتىسقان شارادا حالىق ماعان 97,7 پايىز داۋىس بەردى. ەڭ ءبىرىنشى العىسىم – حالقىما. وسى جىلداردىڭ بارلىعىندا مەنى قولداپ, سوڭىمنان ەرىپ, شىلبىر مەن تىزگىندى ءبىر قولىما ۇستاتىپ, سەنىپ كەلە جاتقان وتانداستارىمنىڭ جاپپاي سەنىمىن ورىنداۋ – قادىرمەندى مىندەت. وسى مىندەتتى اتقارۋ ءۇشىن ءوزىمنىڭ كۇش-جىگەرىمدى, دەنساۋلىعىمدى, تاجىريبەمدى اياماي قىزمەت ەتۋگە انت بەرگەنمىن. مەن سول انتتى ورىنداپ كەلە جاتىرمىن, – دەدى پرەزيدەنت نۇرسۇلتان نازارباەۆ.
سونداي-اق, ەلباسى سايلاۋدى ءوتكىزۋدە بەلسەندىلىك تانىتقان «نۇر وتان» پارتياسىنىڭ, قوعامدىق كوميسسيانىڭ, 10 مىڭنان استام شتابتىڭ مۇشەلەرىنە العىسىن جەتكىزدى.
– ولار مەنىڭ باعدارلامامدى حالىققا ءتۇسىندىردى. بارشالارىنا شىن جۇرەكتەن العىس ايتامىن. بەلسەندى قاتىسقان جاستارعا دا ريزاشىلىعىمدى بىلدىرەمىن. بارلىق اتقارىلىپ جاتقان شارۋانى قازاقستاننىڭ بولاشاعى مىعىم, تاۋەلسىزدىگىمىزدىڭ تۇعىرى بيىك بولۋى ءۇشىن, ءماڭگىلىك بولۋى ءۇشىن ىستەپ جاتىرمىز. بۇل – جاستار ءۇشىن, بولاشاق ءۇشىن كەرەك. ولار وتانىن ءسۇيىپ, ەلى ءۇشىن قىزمەت ەتەدى دەپ سەنەمىن, – دەدى مەملەكەت باسشىسى.
سونىمەن قاتار, پرەزيدەنت نۇرسۇلتان نازارباەۆ بارشا قازاقستاندىقتارعا سايلاۋداعى قولداۋى ءۇشىن العىسىن ءبىلدىردى.
– بۇكىل قازاقستان كەشە ءبىر كىسىدەي داۋىس بەرۋگە كەلدى. مەن ازاماتتاردىڭ وتباسىلارىمەن, بالالارىمەن, نەمەرەلەرىمەن سايلاۋ ۋچاسكەلەرىنە كەلگەنىن كوردىم. بۇل ماعان ۇلكەن جاۋاپكەرشىلىك جۇكتەيدى, حالقىمىز ءوزىنىڭ تۇرمىسىن, ءال-اۋقاتىن جاقسارتىپ, بالالارىن تاربيەلەۋى جانە بولاشاققا سەنىممەن قاراۋى ءۇشىن نە ىستەۋ كەرەكتىگى تۋرالى كۇنى-ءتۇنى ويلانۋعا ماجبۇرلەيدى, – دەدى ەلباسى.
مەملەكەت باسشىسى ەل حالقىنىڭ سايلاۋعا قاتىسۋ ارقىلى پرەزيدەنتكە عانا ەمەس, ءوز بولاشاعىنا دا داۋىس بەرگەنىنە, تۇتاستىعى مەن ءبىرلىگىن, دەموكراتيالىق تۇعىرىن, ساياسي مادەنيەتىن تاعى ءبىر مارتە پاش ەتكەنىنە, سونىمەن قاتار, شەتەلدەردەگى قازاقستاننىڭ دوستارى ءوز يگى تىلەكتەرىن ايتىپ, قولداۋلارىن ءبىلدىرىپ جاتقانىنا نازار اۋداردى.
– ءبىز دۇنيەجۇزىنىڭ الدىندا تاعى دا ءبىر مارتە ءوزىمىزدىڭ دەموكراتيالىق تۇعىرىمىزدى, ساياسي مادەنيەتىمىزدى كورسەتتىك. دۇنيەجۇزىنەن كەلگەن 850-دەن استام بايقاۋشى, 40 ەلدەن 170 جۋرناليست وسى سايلاۋدى بايقادى, سولاردىڭ الدىندا قازاقستاننىڭ ءبىرلىگىن, سەنىمىن, قازاقستاننىڭ ىشكى تاتۋلىعىن پاش ەتتىك, – دەدى ن.نازارباەۆ.
مەملەكەت باسشىسى سايلاۋدان كەيىن اۋقىمدى جۇمىس كۇتىپ تۇرعانىنا توقتالا كەلىپ, «نۇرلى جول» مەملەكەتتىك باعدارلاماسىن جۇزەگە اسىرىپ, بۇكىل قازاقستان بويىنشا جولدار جەلىسىن سالىپ, ساپالى اۆتوكولىك جانە تەمىرجولداردى, ەلەكتر جەلىلەرىن ىسكە قوسۋ قاجەتتىگىنە توقتالدى.
– سايلاۋ شارالارى اياقتالدى. ەندى ناقتى جۇمىستاردىڭ كەزەگى كەلدى. ءبىز اتقاراتىن جۇمىستارىمىزدى بىلەمىز. سايلاۋ الدىنداعى ناۋقان بارىسىندا مەن ۇسىنعان رەفورمالاردى ءتۇسىندىرۋ جۇرگىزىلدى. ءبىز قازاقستاندى يندۋستريالاندىرۋدى اياعىنا جەتكىزۋگە, بالاما ەكونوميكا قالىپتاستىرۋعا, ساپالى تابىس جانە كاسىبي بىلىكتىلىكپەن بايلانىستى جاڭا جۇمىس ورىندارىن اشۋعا ءتيىسپىز. «نۇرلى جول» باعدارلاماسىن جۇزەگە اسىرىپ, ەكونوميكالىق بايلانىستارىمىزدى بەلسەندىلەندىرۋىمىز جانە ءترانزيتتى مەملەكەتكە اينالۋ ءۇشىن بۇكىل قازاقستاندى جولدارمەن قامتۋىمىز كەرەك. وسىنىڭ ءبارى – جاڭا كەزەڭ, ءسىز بەن ءبىز اتقارۋعا ءتيىستى اۋىر جۇمىس, – دەدى ول.
بۇدان بولەك, پرەزيدەنت ءوزىنىڭ بەس جاڭا ينستيتۋتتىق رەفورمانى ۇسىنعانىن, وسىنىڭ نەگىزىندە بيزنەستىڭ ەركىندىگى قامتاماسىز ەتىلەتىنىن, ەشكىم دە جەكەمەنشىككە كۇدىك ۇيالاتپاۋى ءتيىس ەكەنىن ايتا كەلىپ, «بۇل – جاڭا كەزەڭ, الداعى كۇردەلى جۇمىستاردى بارشا حالىق بىرگە ەڭسەرۋى ءتيىس. مەن سىزدەرگە جاڭا ماقساتتاردى ىسكە اسىرۋدا تابىستار تىلەيمىن», – دەدى.
سونداي-اق, ەلباسى ىشكى جانە سىرتقى ساياساتتاعى نەگىزگى باسىمدىقتاردىڭ ساقتالاتىنىن, سەرىكتەس مەملەكەتتەرمەن دوستىق قارىم-قاتىناستاردى دامىتا بەرۋ كۇن ءتارتىبىنەن تۇسپەيتىنىن جەتكىزدى.
– ءبىز ىشكى تاتۋلىقتى ساقتايمىز, سونداي-اق, وداقتاستارىمىز بەن سەرىكتەستەرىمىزدىڭ الدىنداعى ءمىندەتتەمەلەرىمىزگە ادال بولامىز. ءوز ىشىمىزدەگى كەلىسىمدى نىعايتىپ, ءبىزدىڭ وڭىردەگى جانە بۇكىل پلانەتاداعى بەيبىتشىلىككە اتسالىسامىز. بىزگە سەنەدى, سوندىقتان ءبىز قاقتىعىس بولعان جەردىڭ بارىندە قانتوگىستى توقتاتۋعا ۇندەيمىز. ءبىز كوپكونفەسسيالى جانە كوپەتنوستى ەلدىڭ تاتۋ ءومىر سۇرە الاتىنىن كورسەتىپ وتىرعان قازاقستاننىڭ ءتاجىريبەسىنە قاراۋعا شاقىرامىز, – دەدى مەملەكەت باسشىسى.
ايتۋلى جيىن سوڭىندا نۇرسۇلتان نازارباەۆ پرەزيدەنتتىك سايلاۋدى ۇيىمداستىرۋعا جانە وتكىزۋگە بەلسەنە قاتىسقان بارشاعا تاعى دا العىس ايتا وتىرىپ, قازاقستاندىقتارعا اماندىق-ساۋلىق, ەلىمىزگە تاتۋلىق پەن تىنىشتىق, بەرەكە تىلەدى.
جولدىباي بازار,
«ەگەمەن قازاقستان».
