عىلىمي سەمينار قازاق, ورىس جانە اعىلشىن تىلدەرىندە ءوتتى. جيىندا تۇڭعىش رەت تاريحي التىن وردا كەڭىستىگىنە قاتىستى بىرنەشە مەملەكەت عالىمدارى باس قوستى. ءسويتىپ, ۇلانعايىر اۋماقتا ساقتالعان ارابجازۋلى ەپيگرافيكالىق ەسكەرتكىشتەردىڭ ورتاق تامىرى, ۇقساستىعى مەن ەرەكشەلىكتەرى, ولاردى زەرتتەۋ مەن ساقتاۋ ماسەلەسى كوتەرىلدى. بۇل جيىن «التىن وردادان كەيىنگى قوعامنىڭ ءداستۇرى مەن مادەنيەتىندەگى ساباقتاستىق پەن وزگەرىستەر (باتىس قازاقستان, ەدىل-ورال, داعىستان, حورەزم ايماقتارىنداعى ەپيگرافيكالىق ەسكەرتكىشتەردى سالىستىرمالى زەرتتەۋ)» اتتى جوبانى جۇزەگە اسىرۋدا اتقارىلىپ جاتقان باستى ءىس-شارانىڭ بىرىنە اينالدى.
سەمينار بارىسىندا التىن وردا وركەنيەتى ورنالاسقان تاريحي ايماقتاردىڭ ەپيگرافيكاسى, جاڭادان تابىلعان ولجالار مەن ولاردىڭ ينتەرپرەتاتسياسى جايلى تىڭ مالىمەتتەر ايتىلدى. ءبىر قۋانتاتىن جاعداي – قازاقستاننىڭ ەپيگرافيكالىق ەسكەرتكىشتەرىن كورشىلەس مەملەكەتتەردەگى ارابجازۋلى جادىگەرلەرمەن سالىستىرمالى زەرتتەۋ قولعا الىنعان ەكەن. بۇل التىن وردا وركەنيەتى اسەر ەتكەن تاريحي ايماقتاردىڭ دامۋ جولىن, مادەني داستۇرلەردىڭ تامىرى ورتاق ەكەندىگىن كورسەتەتىن كورنەكى جۇمىس بولادى دەيدى زەرتتەۋشىلەر.
عىلىمي سەمينارعا شىعىس ەپيگرافياسىن زەرتتەۋشى جەتەكشى وتاندىق جىنە شەتەلدىك مامان-عالىمدار قاتىستى. ولاردىڭ اراسىندا ستامبۋلدان يسلام ىنتىماقتاستىعى ۇيىمى جانىنداعى IRCICA ورتالىعى باس ديرەكتوردىڭ كەڭەسشىسى, تاريح عىلىمدارىنىڭ دوكتورى, پروفەسسور اشىربەك ءمۇمينوۆ, ماسكەۋدەن رەسەي عىلىم اكادەمياسى رەسەي تاريحى ينستيتۋتىنىڭ اعا عىلىمي قىزمەتكەرى, تاريح عىلىمدارىنىڭ دوكتورى, پروفەسسور يليا زايتسەۆ, ش.ش. ءۋاليحانوۆ اتىنداعى تاريح جانە ەتنولوگيا ينستيتۋتى, قازاق ەسكەرتكىشتانۋى بويىنشا ورتالىقتىڭ باسشىسى, تاريح عىلىمدارىنىڭ دوكتورى, پروفەسسور سەرىك اجىعالي, وزبەكستان عىلىم اكادەمياسى ۇلتتىق ارحەولوگيا ورتالىعىنىڭ باس عىلىمي قىزمەتكەرى, تاريح عىلىمدارىنىڭ دوكتورى, پروفەسسور باحتيار بابادجانوۆ, تۇركيانىڭ احي ەۆران كىرشەحير ۋنيۆەرسيتەتى تۇرىك ءتىلى فاكۋلتەتىنىڭ دوتسەنتى, فيلولوگيا عىلىمدارىنىڭ كانديداتى وسمان قابادايى, تاعى باسقالارى بار.
سەمينار بارىسىندا رامازان سۇلەيمەنوۆ اتىنداعى شىعىستانۋ ينستيتۋتىنىڭ ديرەكتورى, پروفەسسور دۇكەن ءماسىمحان ۇلى قر عىلىم جانە ءبىلىم مينيسترلىگىنىڭ قاۋلىسىمەن بەلگىلى شىعىستانۋشى عالىم اشىربەك قۇربان ۇلى «عىلىمدى دامىتۋعا سىڭىرگەن ەڭبەگى ءۇشىن» ارنايى ءتوس بەلگىسىمەن ماراپاتتالعانىن حابارلاپ, عالىمعا كوپشىلىك الدىندا تابىس ەتتى.
جيىن كەزىندە شىعىستانۋ ينستيتۋتى قىزمەتكەرلەرى جارىققا شىعارعان «ابات-بايتاق» قورىمىنىڭ ارابجازۋلى ەپيگرافيكالىق ەسكەرتكىشتەرى» جانە ء«ماشھۇر ءجۇسىپ كوپەي ۇلى. «ريسالا-ي جانايز (جانازا كىتابى)» كىتاپتارىنىڭ تۇساۋكەسەرى ءوتتى.
سەمينار مەيماندارى مەن قاتىسۋشىلارى رامازان سۇلەيمەنوۆ اتىنداعى شىعىستانۋ ينستيتۋتىنىڭ ديرەكتورى, پروفەسسور دۇكەن ءماسىمحان ۇلى قول قويعان سەرتيفيكاتقا يە بولدى.
عىلىمي سەميناردىڭ تولىق ەسەبى مەن جيىندا كوتەرىلگەن ماڭىزدى ماسەلەلەر جايلى كەڭەيتىلگەن ماقالا تاياۋدا گازەتىمىزدىڭ بەتىندە جاريالاناتىن بولادى.
الماتى
