قازاقستانعا رەسمي ساپارمەن كەلگەن گەرمانيا كانتسلەرى ولاف شولتس «ورتالىق ازيا – گەرمانيا» سامميتىنە قاتىسىپ, وندا تاراپتار ساۋدا-ەكونوميكالىق جانە بىرلەسكەن ينۆەستيتسيالىق جوبالاردى جۇزەگە اسىرۋ بارىسى مەن اۋقىمدى سالالارداعى ستراتەگيالىق ىنتىماقتاستىقتى تالقىلادى.
سانكتسيالاردى اينالىپ وتپەيدى
گەرمانيا كانتسلەرى ولاف شولتس قازاقستانعا جاساعان ساپارى كەزىندە «گەرمانيا قازاقستانمەن ساۋدا-ساتتىقتى كەڭەيتۋگە مۇددەلى, الايدا ەۋرووداقتىڭ رەسەيگە قاتىستى سانكتسيالارىنا ەش كەدەرگى بولماۋ كەرەك. ياعني سانكتسيالاردى اينالىپ وتپەيمىز. ەكى ەل اراسىنداعى ساۋدا ونداي تەرىس پيعىلدارعا پايدالانىلماۋ كەرەك. وسى ورايدا قازاقستانمەن جاسالعان سەنىمدى ديالوگكە ريزامىن», دەدى.
ەسكە سالساق, 2022 جىلدىڭ اقپانىندا رەسەي اسكەرلەرى ۋكرايناعا باسىپ كىرگەننەن كەيىن باتىس رەسەيگە قارسى قاتاڭ سانكتسيالار ەنگىزىپ, ماسكەۋدى تەحنولوگيالار مەن تاۋارلاردى يمپورتتاۋدىڭ اينالمالى جولدارىن ىزدەۋگە يتەرمەلەگەن ەدى.
«ورتا ءدالىز» باستاماسىنا باسىمدىق
قازاقستاننىڭ ورتالىق ازيانى ترانسەۋروپالىق كولىك جەلىسى ارقىلى ەۋروپامەن بايلانىستىرۋعا باعىتتالعان «ورتا ءدالىز» باستاماسىنا باسىمدىق بەرۋى استانانىڭ رەسەي مەن قىتاي باقىلايتىن ساۋدا جولدارىنا ەندى تاۋەلدى ەمەستىگىن كورسەتەدى.
بەرليننىڭ قورشاعان ورتانى قورعاۋ جانە سۋ رەسۋرستارىن باسقارۋ باستامالارىن, اسىرەسە, ارال تەڭىزىن قۇتقارۋ مەن تۇراقتى اۋىل شارۋاشىلىعىن دامىتۋعا قولداۋ كورسەتۋى – قازاقستانمەن ءوزارا بايلانىس ورناتۋدىڭ تاعى ءبىر مۇمكىندىگى.
قازاقستاندا وتكەن سامميت گەرمانيانىڭ ورتالىق ازياداعى نەگىزگى ەكونوميكالىق جانە قاۋىپسىزدىك سەرىكتەسى رەتىندەگى ءرولىن نىعايتتى. ينفراقۇرىلىمدىق جانە ەنەرگەتيكالىق جوبالارعا ينۆەستيتسيا سالا وتىرىپ, بەرلين ءوزىن قىتايدىڭ ء«بىر بەلدەۋ, ءبىر جول» باستاماسىن, رەسەيدىڭ ايماقتاعى تاريحي ۇستەمدىگىن السىرەتەتىن قۇرال رەتىندە كورسەتەدى.
ورتالىق ازيا ەلدەرى ەكونوميكالىق ەكسپانسيا مەن ايماقتىق تۇراقتىلىقتى ساقتاي وتىرىپ, باسەكەلەس دەرجاۆالار اراسىنداعى قاتىناستاردى ءتيىمدى تەڭەستىرۋى كەرەك. بۇل تەرەڭدەتىلگەن ىنتىماقتاستىق ورتالىق ازيانىڭ الەمدىك دەرجاۆالارمەن ءتيىمدى سەرىكتەستىك تۋرالى كەلىسسوزدەر جۇرگىزۋگە ءوزىنىڭ ستراتەگيالىق ورنالاسۋى مەن رەسۋرستارىن پايدالانا وتىرىپ, حالىقارالىق ارەنادا نەعۇرلىم تالاپشىل ويىنشىعا اينالعانىن كورسەتەدى. الايدا بۇل باستامالاردىڭ ومىرشەڭدىگى ەۋروپالىق سۋبەكتىلەردىڭ ايماقتى دامىتۋعا دەگەن تۇراقتى مىندەتتەمەسىنە جانە ورتالىق ازيا ۇكىمەتتەرىنىڭ ىشكى ساياسي جانە ەكونوميكالىق رەفورمالاردى باسقارۋ قابىلەتىنە بايلانىستى بولادى.
ورتالىق ازيامەن ميگراتسيالىق كەلىسىم
گەرمانيا كانتسلەرى ولاف شولتس العاش رەت ورتالىق ازياعا ساپار شەگىپ, الدىمەن قازاقستانعا تابان تىرەدى.
«ورتالىق ازيا – گەرمانيا» ءسامميتى كەزىندە گەرمانيا بىرقاتار ەلمەن كوشى-قون تۋرالى كەلىسىمگە قول قويدى. سونىمەن قاتار مىس سەكىلدى ماڭىزدى شيكىزاتتى ەكسپورتقا شىعارۋ, وسى سالاداعى ىنتىماقتاستىقتى تەرەڭدەتۋگە باعىتتالعان بىرقاتار كەلىسىم جاساستى. نەگىزى گەرمانيا ورتالىق ازيا ەلدەرىمەن, سونىڭ ىشىندە قازاقستانمەن بايلانىستى نىعايتقىسى كەلىپ وتىر.
مۇناي تاسىمالىن ارتتىرۋعا دايىن
بۇرىنىراق قازاقستان مەن گەرمانيا اراسىنداعى مۇناي تاسىمالداۋ ماسەلەسى قازاقستان پرەزيدەنتى قاسىم-جومارت توقاەۆتىڭ بەرلينگە ساپارى بارىسىندا تالقىلانىپ, ەكى ەل مۇناي ەكسپورتىن ارتتىرۋعا كەلىسكەن ەدى. استانادا وتكەن سامميتتە وسى جانە باسقا دا ماڭىزدى كەلىسىمدەرگە قول قويىلدى.
ءوز كەزەگىندە گەرمانيا كانتسلەرى ولاف شولتس قازاقستان گەرمانيانىڭ ورتالىق ازياداعى ەڭ ماڭىزدى ساۋدا سەرىكتەسى ەكەنىن ايتتى.
گەرمانيا قازاقستانمەن شيكى مۇناي جەتكىزىلىمىن ارتتىرسا, رەسەيگە ەنەرگيا جاعىنان تاۋەلدىلىكتەن ارىلادى.
