فوتو: parlam.kz
پرەزيدەنت قاسىم-جومارت توقاەۆ بيىلعى قازاقستان حالقىنا جولداۋىندا دەنساۋلىق ساقتاۋ سالاسىنا توقتالىپ, وتاندىق مەديتسينانى جەتىلدىرۋدە جەكەمەنشىك سەكتوردى تارتۋدى تاپسىرعان ەدى. دانابەك يسابەكوۆ مۇنداي جۇيەلى جۇمىستاردى جەدەل جاردەم قىزمەتىندە دە قولدانۋ كەرەك دەپ سانايدى. دەپۋتات ەلىمىزدە جەدەل مەديتسينالىق كومەك كورسەتۋ ەرەجەسىن قايتا قاراۋ وتە ماڭىزدى ەكەنىن ايتتى.
«ەرەجەنىڭ 2-تاراۋىنىڭ 11-تارماعىندا دارىگەرلىك بريگادانىڭ ديسپەتچەردەن پاتسيەنتكە دەيىن جەتۋ ۋاقىتى ايقىن بەلگىلەنگەن. دەگەنمەن, ءىرى قالالاردان باستاپ, كەنتتەر مەن اۋىلدارعا دەيىن نورمامەن بەلگىلەنبەگەن ۋاقىتتا جەدەل جاردەم قىزمەتى جەتپەيتىنىن ءجيى ەستيمىز. مۇنداي جاعداي جاقىندا ءبىزدىڭ اۋلەتىمىزگە دە بولعان. ناقتىراق ايتقاندا, 23 شىلدەدە اكەم كەنەتتەن ءوزىن ناشار سەزىنىپ, اۋىرىپ قالدى. جەدەل جاردەم قىزمەتىنە ساعات 13:50-دە شاقىرتۋ بەرىلدى. الايدا جادەل جاردەم قىزمەتكەرلەرى 30 مينۋتتا ارەڭ جەتتى. بۇل ارالىقتا اكەمنىڭ جاعدايى تىم ناشارلاپ قالعان-دى. شىمكەنت قالاسى «جەدەل مەديتسينالىق جاردەم كورسەتۋ ستانتسياسى» ەرەجە بويىنشا پاتسيەتتىڭ جاعدايى 2-ءشى جەدەلدىك ساناتتا بولعاندىقتان 15 مينۋتتا جەتۋى ءتيىس ەدى. بىراق جەدەل جاردەم كەشىگىپ, اكەمىزدەن ايىرىلىپ قالدىق», دەپ كۇرسىندى دەپۋتات.
ونىڭ ايتۋىنشا, بۇل ءبىرىنشى جاعداي ەمەس. جەدەل جاردەم ءوز ۋاقىتىندا كەلەتىن بولسا, كوپتەگەن ناۋقاستى اجالدان اراشالاپ قالۋعا مۇمكىندىك تۋار ەدى. بىراق ەرەجەنىڭ وسى نورمالارى كوپ جاعدايدا ساقتالا بەرمەيدى. كەيدە جەدەل جاردەم قىزمەتكەرلەرىن 1 ساعاتتان استام ۋاقىت بويى كۇتىپ وتىرۋ كەرەك.
«مۇنى قالاي جەدەل جاردەم دەپ اتاۋعا بولادى؟ ماسەلەن, اقش, كانادا, جاڭا زەلانديا, اۋستريا, يرلانديادا جەدەل جاردەم قىزمەتىنىڭ باستى ەرەكشەلىگى – ولار وتە شۇعىل (ەكسترەننىي), شۇعىل (نەوتلوجنىي) دەپ ەكىگە ءبولىنىپ, ناۋقاستارعا قىزمەت كورسەتەدى. وسى تاجىريبەنى بىزگە دە ەنگىزۋ قاجەت دەپ بىلەمىن», دەپ قوستى دانابەك يسابەكوۆ.
وسىعان وراي دەپۋتات دەنساۋلىق ساقتاۋ مينيسترلىگىنە كەلەسى شارالاردى قولعا الۋدى ۇسىندى:
- جەدەل جاردەمنىڭ پاتسيەنتكە جەتەتىن ۋاقىتىن قايتا قاراپ, الەم ەلدەرىنىڭ تاجىريبەسىن زەرتتەۋ.
- جەدەل جاردەم سالاسىنا جەكەمەنشىك سەكتوردى ەنگىزىپ, باسەكەلىستىكتى ارتتىرىپ, سەرۆيستىك قىزمەت سالاسىن جەتىلدىرۋ.
- جەدەل جاردەم بريگادالارىنىڭ جۇمىستارىنا تەكسەرۋ جۇرگىزۋ جانە كولىكتەرىنىڭ جاعدايىن انىقتاۋ, مامانداردىڭ بىلىكتىلىگىن قاتاڭ باقىلاۋعا الۋ.
