فوتو: ۆيدەودان الىنعان كادر
بىرنەشە كۇن بۇرىن كەگەندە 43 جاستاعى ەر ادام, ونىڭ 15 جاسار ۇلى جانە 1968 جىلى تۋعان كورشىسى قايتىس بولعان. جەرگىلىكتى تۇرعىندار ۇيىندە سۋ توقتاپ قالعان سوڭ اكەسى مەن بالاسى جانە ولاردىڭ كورشىسىنىڭ قۇبىردى تەكسەرۋ ءۇشىن قۇدىققا تۇسكەندەرىن مالىمدەدى.
باستاپقىدا ءبىر قاراپ شىعۋعا 15 جاستاعى ءجاسوسپىرىم تۇسكەن ەكەن. بىراق كوپ ۇزاماي سوندا تالىپ قالعان. اكەسى قۇتقارۋعا ۇمتىلعانىمەن, كەرى شىعا الماي, ەس-ءتۇسسىز قۇلاعان. ارتىنان 56 جاستاعى كورشىسى ءتۇسىپ, ول دا تومەندە ءتىل تارتپاي كەتكەن.
ء«بىرىنشى ءىنىمدى الىپ شىقتى. قاراساق, دەنەسى سۋىپ كەتكەن. العاشقى كومەكتەن كەيىن قۇسىپ جىبەرىپ, كوزىن اشتى دا, ءجۇرىپ كەتتى. ودان كەيىن سەرىك دەگەن اعانى شىعاردى. ۇشىنشىسىندە ىشىندە سۋى بار قۇدىقتىڭ تۇبىنە جەتە المادى. ءورت سوندىرۋشىلەر سۋدى سورعىزىپ, سودان كەيىن بالانى شىعارىپ الدى. ول كەزدە بالا كوگەرىپ كەتكەن», دەدى مارقۇمنىڭ تۋىسى دينا ايتباەۆا.
تۇرعىندار قايعىلى جاعدايدىڭ بىرەۋدىڭ سالعىرتتىعىنان ورىن العانىن العا تارتقان. سونداي-اق, ولار قۇدىقتىڭ بەتى كولىك جۇرەتىن جولدان ءبىر قارىس تومەن ورنالاسقانىن ايتتى. توپىراقپەن كومىلىپ جاتقانىنا ءبىر ايدان اسقاندىقتان, بىتەۋ تۇرىپ, اۋا اينالىمى جۇرمەگەندىكتەن, ىشىندە ۋلى گاز پايدا بولۋى مۇمكىن ەكەنىنىن تىلگە تيەك ەتتى.
«سۋ جۇرگىزىلگەننەن كەيىن جول سالىنعان كەزدە تەحنولوگيا بويىنشا قۇدىقتىڭ بەتى كوتەرىلىپ تۇرۋى كەرەك. جول سالعان مەردىگەر كوتەرىپ, اسفالتپەن تەڭەستىرىپ جاساپ كەتۋ كەرەك بولاتىن. تۇرعىندار قۇدىقتىڭ بەتىن اشىپ قويعان. سوڭعى ءبىر جارىم ايدا كەگەن اۋىلىندا درەناجدى كانال جۇرگىزىلدى. سول كەزدە قۇدىقتىڭ بەتىن توپىراقپەن بەكىتىپ كەتكەن», دەدى مارقۇمنىڭ تۋىسى ماقپال شادان.
مارقۇم جانداردىڭ تۋىستارى قۇدىقتىڭ ىشىندە ولاردى توق ۇرۋى مۇمكىن دەپ بولجام جاساعان.
«2020-2021 جىلدارى جولدى قابىلداپ العان كىسى قازىر قىزمەتتە جوق. نە سەبەپتى ءدال سۋدىڭ ۇستىنە جول سالىپ وتكەنىن ايتا المايمىن. قۇدىقتىڭ بەتىن كوتەرىپ, كولىكتەر وتە الاتىنداي ەتىپ جاسايمىز», دەپ حابارلادى كەگەن اۋدانى جولاۋشىلار كولىگى جانە اۆتوموبيل جولدارى ءبولىمىنىڭ باسشىسى جاسۇلان كادىل.
انىقتالعانداي, قازىر مارقۇمداردىڭ دەنەسى قوناەۆ قالاسىندا. ولاردىڭ نەدەن قايتىس بولعانى ساراپتاما قورىتىندىسىنان كەيىن بەلگىلى بولادى.
