ينفوگرافيكانى جاساعان – زاۋرەش سماعۇل ,«EQ»
«جاستارىمىز دەنى ساۋ, مىقتى ازامات بولىپ ءوسۋى كەرەك. سوندىقتان ۇلت ساۋلىعىن ساقتاۋ ءۇشىن بۇقارالىق سپورتتىڭ ماڭىزى ايرىقشا. جاقىندا مەن وليمپياداعا قاتىسۋشىلارمەن كەزدەستىم, سپورتتاعى ناقتى مىندەتتەر مەن باسىمدىقتارعا توقتالدىم. شىن مانىندە, بۇل سالاداعى زاڭنامانى جاڭارتاتىن كەز كەلدى. زاڭعا ەنگىزىلەتىن وزگەرتۋلەر بۇقارالىق سپورت پەن بالالار سپورتىن دامىتۋعا زور سەرپىن بەرۋى ءتيىس. سونداي-اق بولاشاق جەڭىمپازدار شوعىرىن دايارلاۋعا جول اشادى. دەپۋتاتتار وسى ماڭىزدى زاڭ جوباسىنا ايرىقشا ءمان بەرگەنى ءجون دەپ سانايمىن», دەگەن مەملەكەت باسشىسى جاڭا زاڭ جوباسىن قايتا پىسىقتاپ, ءالى دە شيراتا ءتۇسۋ قاجەتتىگىن جۇكتەدى.
بۇقارالىق سپورتتى دامىتۋ – ەلدىڭ ساۋلىعىن نىعايتۋ. ارينە وليمپيادالىق سپورت تۇرلەرىنە ەرەكشە كوڭىل ءبولىپ, قارجىنى قازىمىرلانباي قۇيىپ, چەمپيونداردى دايارلاۋ مەملەكەتتىڭ مارتەبەسى ءۇشىن كەرەك. بۇعان جەتۋ جولىندا بالالار مەن جاسوسپىرىمدەر سپورتىنىڭ قازىرگى احۋالى قانداي, بىزدە ءىزباسارلار دايارلاۋ ءىسى قانشالىقتى قارقىن الىپ كەلەدى؟ وسىعان جەتە ءمان بەرگەن ءجون.
سايلاۋشىلارمەن كەزدەسۋدە, ەل ارالاۋ كەزىندە سپورت مەكتەپتەرىنە دە ارنايى سوعىپ, تىنىس-تىرشىلىگىمەن تانىسامىز. جاقىندا الماتى قالاسىنداعى «شاڭىراق» وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىندە باپكەرلەرمەن, سپورتشىلارمەن جۇزدەسىپ, جاي-كۇيىمەن تانىستىم. وليمپيادا رەزەرۆىن دايىندايتىن ءبىلىم ورداسىندا ەلىمىزدىڭ بولاشاق سپورت جۇلدىزدارى ءوسىپ كەلەدى. باپكەرلەرمەن تىلدەسىپ, قازىرگى سپورت سالاسىنىڭ جاي-كۇيىن تارازىلادىق. ءبىزدىڭ سپورتشىلاردىڭ فيزيكالىق دايىندىعى كەمشىن سوعىپ تۇر. ونى بيىل وتكەن پاريج جازعى وليمپيا ويىندارىندا باعامدادىق.
سپورتشىلاردىڭ تەز ەنتىگىپ قالۋىنىڭ بىرنەشە سەبەبى بار. بىرىنشىدەن, زاماناۋي دارۋمەن تۇرلەرى جەتىسپەيدى. سونىڭ جەتىسپەۋشىلىگىنەن سپورتشىلاردىڭ وكپەسى قاعىپ, القىنىپ قالادى دا, ۇزاق كۇرەسە المايدى. ەكىنشىدەن, قازىرگى وقۋ-جاتتىعۋ تاسىلدەرى ابدەن ەسكىرگەن. جاڭاشىلدىق, جانكەشتىلىك جوق. ۇشىنشىدەن, سپورتشىلاردىڭ جارىستارعا تىڭعىلىقتى دايىندالۋدىڭ ورنىنا توي-تومالاقتان قولدارى بوسامايدى. وسىنداي جۇيەلى كەمشىلىكتەر كەسىرىنەن ناتيجەمىز تومەن بولىپ جاتىر. سوندىقتان پاريجدەگى قاتەلىكتەردەن ساباق الىپ, ءار سپورت ءتۇرى بويىنشا تەرەڭدەي تالداپ, كەمشىلىكتى تولتىرۋ ماڭىزدى.
مەملەكەت باسشىسى بۇقارالىق سپورتتى دامىتۋعا دا كۇش سالۋدى مىندەتتەدى. ەندەشە, اۋىلدارعا دا قالالىق وركەنيەت بارۋى ءتيىس. حالىق تىعىز ورنالاسقان اۋىلداردا سپورتتىق ساۋىقتىرۋ كەشەندەرى بوي كوتەرىپ, شاعىن ەلدى مەكەندەردە دە سپورتتىق الاڭدار سالىنسا قۇبا-قۇپ. سپورتتىق زالدار جەتىسپەيتىن اۋىلدار دا بار. بالالار سپورتىن دامىتۋ ارقىلى ءبىز ۇلت ساۋلىعىن ارتتىرامىز. ءتۇرلى جوبالار, ارنايى باعدارلامالار دا اشىلىپ جاتىر. سونىڭ يگىلىگىن حالىق كورۋى ءتيىس.
دانيار قاسقاراۋوۆ,
ءماجىلىس دەپۋتاتى
