فوتو: اقوردا
«اقوردا» رەزيدەنتسياسىندا وتكەن جيىندا پرەزيدەنت قاسىم-جومارت توقاەۆ ارنايى ءسوز سويلەپ, كورنەكتى مەملەكەت جانە قوعام قايراتكەرى, گەنەرال-پولكوۆنيك, ۇلتتىق قاۋىپسىزدىك جانە قورعانىس سالالارىنىڭ ارداگەرى ءسات توقپاقباەۆتى قالىڭ جۇرتشىلىق قۇرمەتتەيتىنىن, ونىڭ ەڭبەك جولى ەل ومىرىمەن تىعىز بايلانىستى بولعانىن ايتتى.
«ءسىز قاستەرلى وتانىمىزعا ادال قىزمەت ەتتىڭىز. ەندى عانا تاۋەلسىزدىك الىپ, دەربەس مەملەكەت بولعان جىلدارى اسا جاۋاپتى مىندەتتەردى اتقارۋعا بىلەك سىبانا كىرىسىپ كەتتىڭىز. ەلىمىزدىڭ تىنىشتىعى مەن تۇتاستىعىن ساقتاۋ ءۇشىن وراسان زور ۇلەس قوستىڭىز. شىن مانىندە, مۇنى ناعىز ەرلىك دەپ باعالاۋعا بولادى. قازىر دە قوعامعا پايدالى ىستەردى اتقارىپ جۇرگەنىڭىزدى ءبىز جاقسى بىلەمىز. ەلىمىزدىڭ لايىقتى ازاماتىسىز», دەدى مەملەكەت باسشىسى.
ءوز كەزەگىندە ءسات توقپاقباەۆ مەملەكەتىمىزدىڭ قاۋىپسىزدىگى جانە ەلىمىزدىڭ تىنىشتىعى جولىنداعى ەڭبەگىن باعالاعانى ءۇشىن قاسىم-جومارت توقاەۆقا العىس ايتتى.
«ادىلەتتى قازاقستان قۇرۋ ىسىندەگى زور ەڭبەگىڭىزدى جانە سۇيىكتى وتانىمىزدى حالىققا جايلى ەلگە اينالدىرۋ ماقساتىندا جۇزەگە اسىرىپ جاتقان ساياساتىڭىزدى تولىعىمەن قولدايمىن. تاۋەلسىزدىگىمىزدىڭ باياندى بولۋى جولىندا سىزبەن ءاردايىم بىرگەمىن! ەلىمىزدىڭ ءىشى داۋدان, سىرتى جاۋدان امان بولسىن! وتانىمىزدا تىنىشتىق, بىرلىك, اۋىزبىرشىلىك ءاردايىم سالتانات قۇرسىن», دەدى ءسات توقپاقباەۆ.
سالتاناتتى جيىنعا مەملەكەتتىك كەڭەسشى ەرلان قارين, پرەزيدەنت اكىمشىلىگىنىڭ باسشىسى ايبەك دادەباي, ۇلتتىق قاۋىپسىزدىك كوميتەتىنىڭ توراعاسى ەرمەك ساعىمباەۆ قاتىستى.
