مەرەكەلىك ءىس-شارالار اباي الاڭىندا وتكەن «الماتى – ءبىزدىڭ ورتاق ءۇيىمىز» اتتى وتباسىلىق فەستيۆالدەن باستالىپ, قالا اكىمى ەربولات دوساەۆ الماتىلىقتاردى قۇتتىقتادى.
- الماتى ارقاشان الدىڭعى شەپتە بولىپ, وڭ وزگەرىستەردىڭ جارقىن ۇلگىسى بولۋى كەرەك, بۇعان بار كۇشىمىزدى, ءبىلىمىمىزدى جانە تاجىريبەمىزدى جۇمسايمىز. الماتىنى ءاربىر ادام ءوز ۇيىندەي سەزىنەتىن جايلى ءارى قاۋىپسىز قالاعا اينالدىرۋ – ءبىزدىڭ قولىمىزدا, – دەدى مەگاپوليس باسشىسى.
قالا باسشىسى ءداستۇر بويىنشا قالانى دامىتۋعا ۇلەس قوسقان ازاماتتاردى «الماتى قالاسىنىڭ قۇرمەتتى ازاماتى» اتاعىمەن ماراپاتتادى.
ولاردىڭ قاتارىندا كوزى ناشار كورەتىن سۋرەتشى الەكسەي ۋتكين, كەسكىندەمەشى ەربولات تولەپباي, كومپوزيتور ەرۇلان قانافيانوۆ, اقىن ۇلىقبەك ەسداۋلەت, تەحنيكا عىلىمدارىنىڭ دوكتورى جۇماباي بايناتوۆ, اقساقالدار كەڭەسىنىڭ توراعاسى احمەتجان شاردينوۆ, پەريناتولوگيا جانە بالالار كارديوحيرۋرگياسى ورتالىعىنىڭ ديرەكتورى گۇلنار نۇرلانوۆا, قۇرمەتتى ۇشقىش دميتري دۋشيموۆ جانە كاسىپكەر, مەتسەنات نۇرلان سماعۇلوۆ بار.
سونىمەن قاتار, قۇرمەتتى اتاق مەملەكەتتىك قۋىرشاق تەاترىنا بەرىلدى.
