سۋرەت: اشىق دەرەككوزدەن
جۋىردا سولتۇستىك قازاقستان وبلىسى قورعانىس ىستەرى دەپارتامەنتىنىڭ كەزەكتى اسكەرگە شاقىرۋ ءبولىمىنىڭ باستىعى ءانۋار ىبىراەۆقا جولىعىپ, ءبىراز مالىمەتكە قانىققان ەدىك. ول بيىل دا وبلىسىمىزدان 500 جاستىڭ اسكەرگە شاقىرىلاتىنىن ايتتى. ال بارلىق ەسەپتە تۇرعان 14 097 جاستىڭ ىشىنەن 743 ادام قازىر اسكەرگە بارۋدان باس تارتىپ, قاشىپ جۇرگەن كورىنەدى.
«اكىمشىلىك قۇقىق بۇزۋشىلىق كودەكسىنىڭ 647-بابىنا سايكەس اسكەرگە شاقىرعانعا سەبەپسىز كەلمەگەن ادامدارعا 5 اەك كولەمىندە ايىپپۇل سالىنادى. ال 387-باپقا سايكەس اسكەرگە بارۋدان باس تارتقاندارعا 1 000 اەك كولەمىندە ايىپپۇل نەمەسە 400 ساعات قوعامدىق جۇمىس نەمەسە 1 جىلعا دەيىن باس بوستاندىعىنان ايىرۋ جازاسى بەرىلەدى. ال قورعانىس مينيسترلىگى تاراپىنان اسكەردىڭ تارتىمدىلىعى تۋرالى كوپتەگەن شارا جاسالعان. مينيسترلىك قارجى نارىعىن رەتتەۋ جانە دامىتۋ اگەنتتىگىمەن كەلىسۋ ارقىلى اسكەرگە الىنعاندارعا ميكرونەسيەلەر بويىنشا «كرەديتتىك كانيكۋل» بەرۋگە قول جەتكىزدى. دەمەك اسكەري مىندەتىن اتقارۋ كەزەڭىندە ساربازدار نەسيە قارىزدارى مەن ولاردىڭ ءوسىم پايىزىن تولەۋدەن بوساتىلادى», دەيدى ءا.ىبىراەۆ.
سونداي-اق ونىڭ ايتۋىنشا, قورعانىس مينيسترلىگى 2022 جىلدىڭ 22 قازانىندا ەلىمىزدىڭ 70-تەن اسا جوو-سىمەن اسكەري قىزمەتىن وتەگەندەرگە وقۋ ورنىنىڭ ەسەبىنەن وقىتۋعا ورىندار بەرۋ تۋرالى كەلىسىمگە قول قويعان. اسكەري مىندەتىن وتەپ كەلگەن ازامات ەكى جىل كولەمىندە بۇل جەڭىلدىكتى الا الادى.
وكىنىشتىسى, قازىر اسكەرىمىزدە ءتۇرلى كەلەڭسىز وقيعا كوبەيىپ تۇر. ء«بىر جىلعا قويان تەرىسى دە شىدايدى» دەسەك تە, بۇزىق ارەكەتتەر اسكەردە دە ءجيى كورىنىس بەرىپ, وعان بارعىسى كەلمەيتىندەر سانى كوبەيىپ كەلەدى. قازىر كەيىنگى كەلگەندەردى ءتىپتى باسىنۋ, ۇرىپ-سوعۋ عانا ەمەس, قىلمىسقا يتەرمەلەۋ, ءماجبۇر ەتۋ دە ءجيى ەستىلىپ تۇرادى. مۇنىڭ باستى سەبەبى وفيتسەرلەردىڭ ءوز مىندەتىن لايىقتى ورىنداي المايتىنىندا سياقتى. تۇنگى كازارمانى ولار بۇزاقىلاردىڭ بيلىگىنە تاستاپ, ۇيىنە كەتەدى. ال تۇندە ەكى يىعىن ج ۇلىپ جەپ جۇرگەن بۇزاقىلار ەرىككەن ارەكەتتەرىنە كىرىسىپ, جاستارعا, جۋاستارعا الىمجەتتىك كورسەتەدى. ەگەر وفيتسەرلەر كەزەكپەن كازارماعا جاتىپ, كەزەكشىلىك اتقارسا, مۇندايعا جول بەرىلمەس ەدى. كەيدە ءتىپتى وفيتسەرلەردىڭ وزدەرى ساربازداردى ۇرادى ەكەن دەگەن اڭگىمەلەر ەستىپ قالامىز. مۇندايدى, ارينە, ءوزىنىڭ اسكەري انتىن بۇزعاندىق دەپ تانۋ كەرەك. ويتكەنى وكىمەت ولاردى ەلىمىزدى قورعايتىن, ەبى مەن ءتاسىلى جەتىلگەن, كاسىبي دايىندىعى جوعارى, پاتريوتتىق سەزىمدەگى ساربازداردى تاربيەلەسىن دەپ بەس جىل بويى تەگىن وقىتىپ, دايىندادى. ال مىناداي قىلىقتار وكىمەتتىڭ ماقساتىنا مۇلدە كەرەعار. ساربازداردى ۇرىپ-سوققان جەردە ەشقانداي پاتريوتيزم بولماسى بەلگىلى. كەرىسىنشە, ولاردا وتانعا دەگەن جەككورۋشىلىك ويانادى.
بىلتىرعى قىركۇيەك ايىندا «باتىل تويتارىس-2023» اتتى ستراتەگيالىق كوماندالىق-شتابتىق اسكەري وقۋ-جاتتىعۋ جيىنىندا پرەزيدەنت قاسىم-جومارت توقاەۆ: «قازاقستان ارمياسى كەز كەلگەن سىن-قاتەرگە دايىن بولۋى قاجەت. بۇل – زاماناۋي ءارى كاسىبي اسكەرگە قويىلاتىن باستى تالاپ. ءبىزدىڭ ءبىر عانا وتانىمىز بار. ول – قازاقستان. ەلىمىزدى, جەرىمىزدى, ازاماتتارىمىزدىڭ قاۋىپسىزدىگىن قامتاماسىز ەتۋ, ولاردى قورعاۋ – بارشامىزعا ورتاق قاسيەتتى پارىز!» دەگەن ەدى. وفيتسەرلەرىمىزدىڭ باستى باعدارى وسى بولۋى كەرەك. ال ساربازداردى ۇرىپ-سوعۋمەن ەشكىم ەشقانداي جاقسى ناتيجە كورسەتە المايدى. ءتارتىپ بۇزعاندار بولسا, وندايلاردى زاڭدى تۇردە جازالاۋعا ارنالعان وقشاۋلايتىن ورىندار بار, بىراق قول جۇمساۋمەن ەشكىمدى تۇزەتۋگە بولمايدى.
كورشىمىزدىڭ بالاسى بيىل اسكەرگە شاقىرىلۋى كەرەك-ءتى. قازىر شەشەسى بالاسىن اسكەردەن الىپ قالۋدىڭ قامىمەن زىر جۇگىرىپ ءجۇر. بالانىڭ ءوزىنىڭ دە اسكەرگە بارعىسى جوق. «نۇرجان, اسكەرگە بارعىڭ كەلمەي مە؟» دەپ سۇراعان ەدىم, ات-تونىن الا قاشتى. نە سەبەپتى بارعىڭ كەلمەيدى دەسەم: «ۇرىپ-سوعادى ەكەن, ءومىر بويى مۇگەدەك بولىپ قالۋىم مۇمكىن عوي, ونداي جەرگە قالاي بارامىن», دەدى بالا.
مىنە, ءبىزدىڭ اسكەر تۋرالى قازىر وسىنداي تۇسىنىك ابدەن قالىپتاسقان. كەلەڭسىز دۇنيەنىڭ حابارى تەز تارايدى, جاپپاي تارتىپسىزدىك بولماعانىمەن, ءار جەردە ءبىر بولىپ قالعان سوراقى وقيعالار قازىر اسكەردىڭ جالپى سيپاتىنا اينالىپ كەتكەن. سوندىقتان اسكەر باسشىلىعىنىڭ مىندەتى اسكەري قىزمەتتىڭ تارتىمدىلىعىن, وتانعا قىزمەتتىڭ باعالاناتىنىن ناسيحاتتاۋ ابزال.
سولتۇستىك قازاقستان وبلىسى
