فوتو:senate.parlam.kz
ايتا كەتەيىك, زاڭ كەدەندىك وپەراتسيالار پروتسەسىن جەدەلدەتۋگە جانە ءتيىستى راسىمدەر قۇجاتتارىنىڭ سانىن قىسقارتۋعا ارنالعان. سونداي-اق قۇجات ساۋدا-ەكونوميكالىق قاتىناستاردى دامىتۋعا جانە تۇركى مەملەكەتتەرى ۇيىمىنا مۇشە ەلدەر اراسىنداعى ءوزارا ەكونوميكالىق ينتەگراتسيانى نىعايتۋعا ىقپال ەتپەك.
«مەملەكەت باسشىسى بيىلعى جولداۋىندا ەلىمىزدىڭ ترانزيتتىك الەۋەتىن ارتتىرۋ ماسەلەسىنە ەرەكشە توقتالىپ, ناقتى تاپسىرمالار بەرگەن بولاتىن. بۇل – تاۋەلسىز مەملەكەتىمىزدىڭ الدىندا تۇرعان ستراتەگيالىق ماڭىزى بار مىندەتتەردىڭ ءبىرى. بۇگىن قارالعان زاڭ وسى ماقساتقا قول جەتكىزۋدى كوزدەيدى. كەلىسىم تۇركى مەملەكەتتەرى ۇيىمىنا مۇشە مەملەكەتتەر اراسىندا جەڭىلدەتىلگەن كەدەندىك باقىلاۋ ورناتۋ ءۇشىن قۇقىقتىق نەگىز قالىپتاستىرادى. ماقۇلدانعان زاڭ جۇكتەردى تاسىمالداۋ كولەمىن ارتتىرىپ, تاراپتار اراسىندا ساۋدا-ەكونوميكالىق بەلسەندىلىكتىڭ وسۋىنە وڭ اسەرىن تيگىزەدى دەپ سەنەمىز», دەدى ماۋلەن اشىمباەۆ.
نۇرلان بەكەنوۆ سەنات وتىرىسىندا تۇركى مەملەكەتتەرى ۇيىمىنا مۇشە مەملەكەتتەر اراسىنداعى كەدەندىك ءدالىزدى وڭايلاتۋ تۋرالى زاڭدى تالقىلاۋ بارىسىندا 2024 جىلدىڭ 8 ايىندا ۇيىمعا مۇشە مەملەكەتتەرمەن قازاقستاننىڭ سىرتقى ساۋداسىنىڭ كولەمى 10,4 ملرد دوللاردى قۇراعانىن اتاپ ءوتتى.
«تۇتاستاي العاندا, كەلىسىمدى راتيفيكاتسيالاۋ قازاقستان ءۇشىن ورتالىق ازيانى الەمدىك ساۋدا ورتالىقتارىنىڭ بىرىنە اينالدىرۋعا جانە قازاقستاننىڭ حالىقارالىق ەكونوميكالىق ارەناداعى پوزيتسياسىن نىعايتۋعا ودان ءارى جاردەمدەسەتىن جاڭا پەرسپەكتيۆالى ساۋدا جولىن اشادى», دەدى نۇرلان بەكەنوۆ.
