فوتو: قىزىلوردا وبلىسىنىڭ قوعامدىق دامۋ باسقارماسى
كول جاعاسىن قوقىستان تازارتۋعا مەملەكەتتىك قىزمەتكەرلەر, ەرىكتىلەر, بەلسەندى جاستار, اۋىل تۇرعىندارى اتسالىستى. ولار تۇرمىستىق قوقىستاردى جيناپ, جاعالاۋدى قۋراعان بۇتاقتار مەن ارام شوپتەردەن تازارتتى. بىرلەسكەن جۇمىستىڭ ناتيجەسىندە 5 توننادان استام قوقىس شىعارىلدى.
اۋىل تۇرعىنى جومارت بەكەتوۆ اتالعان اكتسياعا اۋىل تۇرعىندارىنىڭ جۇدىرىقتاي جۇمىلىپ, بەلسەنە قاتىسىپ جۇرگەنىن ايتادى.
ء«وزىنىڭ تۇراتىن جەرىن تازا ۇستاۋ ءار ادامنىڭ بورىشى دەپ بىلەتىن اۋدان تۇرعىندارى «تازا قازاقستان» اكتسياسىنان سىرت قالماي, بارلىعى قولدارىنان كەلگەنشە ۇلەستەرىن قوسىپ جاتىر. اركىم تەك ءوز ءۇيىنىڭ اۋلاسىن تازالاپ قويماي قوعامدىق ورىنداردى دا بىرلەسە تازالاۋدا. اتاڭنان مال قالعانشا, تال قالسىن دەپ اعاش كوشەتتەرىن وتىرعىزۋدا», دەدى ج.بەكەتوۆ.
اۋدانداعى تازالىق جۇمىسىنا 26 تەحنيكا جۇمىلدىرىلىپ, 1630 توننا قوقىس شىعارىلعان, 4000 عا جۋىق اعاش وتىرعىزىلعان.
سونىمەن قاتار قارماقشى اۋدانىندا دا تازالىق اكتسياسى وتكىزىلدى. ەكولوگيالىق شاراعا ءبىر جاعادان باس, ءبىر جەڭنەن قول شىعارا وتىرىپ كىرىسكەن حالىق «قورقىت اتا» ەسكەرتكىشىنىڭ اينالاسىن تازالادى.
اۋداندىق ءماسليحاتتىڭ, ارداگەرلەر كەڭەسىنىڭ, قوعامدىق كەڭەس جانە ايەلدەر كەڭەسىنىڭ توراعالارى اۋدان تۇرعىندارىن تابيعاتتى ايالاۋعا شاقىردى.
شارا سوڭى V دۇنيەجۇزىلىك كوشپەلىلەر ويىندارىن قولداۋعا ارنالعان مەرەكەلىك سازدى شاراعا ۇلاسىپ, رەسپۋبليكالىق اكتسياعا اتسالىسقان بەلسەندىلەر ماراپاتتالدى.
